Toʻu Tupú
Te u Toe Mamata Kiate Ia
Naʻe ʻai ʻe he tangataʻeikí ke mau ongoʻi ʻe kimautolu ʻoku mau makehe. Naʻá ne ʻofa ʻiate kimautolu pea faʻa fakamolemole. Naʻá ne fai hono lelei tahá ke fakapapauʻi ʻoku mau fiefia, peá ne fakamahinoʻi ʻokú ne fie maʻu ke mau maʻu ʻa e lelei tahá. Naʻá ku fuʻu ʻofa lahi ʻiate ia.
Naʻe mālōlō ʻeku tangataʻeikí ʻi ha fakatuʻutāmaki ʻi heʻeku kei kalasi onó. Naʻá ku fuʻu loto-mamahi moʻoni mo hoku fāmilí. Ko e fuʻu mole lahi ia ki homau fāmilí. Ne u fakafalala ki he tangataʻeikí he ko ia ne u fakafalala ki aí, ko e tokotaha ia ne u kumi tokoni mei ai heʻeku faingataʻaʻiá. Hili ʻene mālōloó ne ʻikai ke u kumi ha tokoni, ka ne u fakatoka e ʻitá mo e mamahí. Ne u fakakaukau ko e fehālaaki ia ʻa e ʻOtuá. Ne ʻikai ke u toe lau folofola mo fai ʻeku lotú. Ne u kei ʻalu pē ki he lotú koeʻuhí ko e me’a ia ne loto e fineʻeikí ke u faí. Naʻá ku feinga ke fakamamaʻo mei heʻeku Tamai Hēvaní.
Ko e toki fuofua taimi ʻeni ke u ʻalu ai ki ha kemi ʻa e Kau Finemuí. Ne u saiʻia he feʻiloaki mo e kaungāmeʻa foʻoú, ka naʻe ʻikai pē ke lau ʻeku folofolá. Naʻe fai haʻamau fakataha fakamoʻoni ʻi he pō fakaʻosi ʻo e kemí. Ne u ongoʻi ha meʻa ne fuoloa ʻeku taʻeongoʻí: ʻa e Laumālié. Ne u tanganeʻia he tamaiki fefine ne nau tuʻu hake ʻo fai ʻenau fakamoʻoní, ka naʻá ku tangutu pē he naʻá ku fakakaukau ʻoku ʻikai ke ʻi ai haʻaku fakamoʻoni. Ka naʻe fakafokifā pē ʻeku ongoʻi ke tuʻu ki ʻolunga ʻo fakamoʻoni. Ne u fakaava hoku ngutú, ʻo fifili pe ko e hā e meʻa te u lea ʻakí. Naʻá ku pehē pē ne u fiefia ke kau he kemi ʻa e Kau Finemuí. Pea fakaʻohovale ʻeku pehē ʻoku ou ʻilo naʻe pekia ʻa Sīsū Kalaisí koeʻuhí ko au pea ʻoku ʻofa ʻa e Tamai Hēvaní ʻiate au pea ʻoku moʻoni ʻa e Siasí.
Naʻe fakafonu ʻaki au ha ongoʻi nonga fakaofo. ʻOku ou fakamālō ko e meʻa ne u aʻusiá he ʻoku ou ʻiloʻi te u toe sio ki heʻeku tamaí koeʻuhí ko e Fakalelei mo e Toetuʻu ʻa e Fakamoʻuí.