Savali a le Au Peresitene Sili
“Ua Toetu o Ia”
O Le Molimau a se Perofeta
“O le valaau lenei mo tagata Kerisiano uma,” ua tautino mai e Peresitene Thomas S. Monson, ua toetu mai Iesu le Nasareta mai le oti. “O le moni o le Toetu ua maua ai e se tasi le filemu lea e mafai ona mafaufau i ai” (tagai i le Filipi 4:7).1
I fuaitau o loo i lalo, o loo faasoa mai ai e Peresitene Monson lana molimau ma le agaga faafetai mo le Toetu o le Faaola ma tautino mai e faapea, ona ua faatoilaloina e le Alo le oti, o lea o fanau uma a le Tama o e e o mai le lalolagi o le a toe ola.
Ola i Talaatu o le Olaga Faitino
“Ou te talitonu e leai se tasi o i tatou e mafai ona malamalama i le taua atoa o le mea sa faia e Keriso mo i tatou i Ketesemane, ae ou te faafetai i aso taitasi o lo’u ola mo Lana taulaga togiola mo i tatou.
“I lona toe taimi lava, semanu e mafai lava ona Ia toe foi. Ae sa le’i foi o Ia. Sa Ia oo atu i le taele o mea uma ina ia mafai ai ona Ia faasaoina mea uma. O le faia o lena, sa Ia ofoina mai ai mo i tatou le ola i talaatu o le olaga faitino. Sa Ia toe aumaia i tatou mai le Pau o Atamu.
“E oo ifo i le lualoto o lo’u lava agaga, ou te matua faafetai ia te Ia. Sa Ia aoaoina i tatou i le ala e ola ai. Sa Ia aoaoina i tatou i le ala e oti ai. Sa Ia faamautinoaina lo tatou faaolataga.”2
Aveesea o le Pogisa o le Oti
“I nisi tulaga mautinoa, e pei o mafatiaga maoae ma ma’i, e oo mai ai le oti o se agelu o le alofa mutimutivale. Ae o le tele lava o tulaga, tatou te manatu ai o le oti o se fili i le fiafia faaletagata.
“O le pogisa o le oti e mafai ona aveesea e le malamalama o upumoni faaalia. Na fetalai le Matai, ‘O a’u nei o le toetu ma le ola. O le faatuatua mai ia te a’u e ui lava ina oti, a e ola lava ia: O tagata ola uma o e faatuatua mai ia te au, e le oti lava e oo i le faavavau.’
“O lenei faamaoniga—ioe, o se faamaoniga mai le lagi—o le i ai o se olaga i tala atu o le oti, atonu o le manuia lava lea na folafola atu e le Faaola i Lona au soo: ‘Ou te tuuina atu ia te outou le manuia: o lo’u manuia ou te avatu ai ia te outou: ou te le avatu ia te outou faapei ona avatu e le lalolagi. Aua le atuatuvale o outou loto, aua foi tou te matatau.’”3
E Le O Iinei O Ia
“Ua toe soifua lo tatou Faaola. O le mea aupito mamalu, faamafanafana ma faamautinoa o mea uma i le talafaasolopito o le tagata ua tupu—o le manumalo i le oti. Ua soloiesea le tiga ma le mafatiaga o Ketesemane ma Kalevaria. Ua mautu le faaolataga o le tagata. Ua toe laveaia le Pa’ū o Atamu.
“O le tuugamau gaogao i lena uluai taeao o le Eseta, o le tali lea i le fesili a Iopu, “Afai e oti le tagata, e toe ola mai ea o ia?” Outou uma o mafai ona lagona mai lo’u leo ou te folafola atu, Afai e oti le tagata, o le a toe ola mai o ia. Ua tatou iloa, aua ua ia i tatou le malamalama o le upumoni ua toe faaalia mai. …
“O’u uso e ma tuafafine pele, i lo tatou ituaso o le faanoanoaga ogaoga, e mafai ona tatou maua le filemu a’ia’i mai upu a le agelu i lena uluai taeao o le Eseta: ‘E le o iinei o Ia: auā ua toe tu mai o ia.4
O Le A Toe Ola Tagata Uma
“Tatou te talie, tatou te fetagisi, tatou te galulue, tatou te taaalo, tatou te fealofani, tatou te ola. Ona tatou oti lea. …
“Ae semanu tatou te tumau ai pea i le oti pe ana le seanoa le Tagata e toatasi ma Lana misiona, o Iesu lea o Nasareta. …
“Ma lo’u loto atoa ma le mafanafana o le malosi o lo’u agaga, ou te sii a’e ai lo’u leo o se molimau faapitoa ma folafola atu faapea o loo soifua le Atua. O Iesu o Lona Alo, le Alo e Toatasi o le Tama i le tino. O Ia o lo tatou Togiola; o Ia o lo tatou Puluvaga i le Tama. O Ia lea na maliu i luga o le satauro e togiola mo a tatou agasala. Na avea ma uluai fua o le Toetu. Talu ai sa maliu o Ia, o le a toe ola ai tagata uma.”5
O Se Molimau Patino
“Ou te faailoa atu la’u molimau patino e faapea o le oti ua faatoilaloina, ua mauaina le manumalo i le tuugamau. Ia avea afioga na fofogaina mai e Ia ma le paia o lē na faataunuuina ina ia avea ma malamalama moni i tagata uma.Ia manatuaina.Ia faapelepele i ai.Ia faamamalu i ai. Ua toetu o Ia.”6
Aoao Atu mai Lenei Savali
A uma ona faafesoaai i upusii mai savali a Peresitene Monson, ia matau le molimau ua ia tuuina mai e uiga i le uiga moni o le Eseta. E mafai ona e fai atu i tagata o le aiga ia fesili nei: “O le a le uiga ia te oe o le molimau mai o se perofeta soifua e uiga i nei upumoni i le aso? E faapefea ona e faaaogaina i lou olaga?” Mafaufau e faaopoopo atu i ai ma lau molimau.
O Toma Masalosalo, na saunia e Carl Heinrich Bloch