O Faamanuiaga o le Seminare

Aperila 2012

O Faamanuiaga o le Seminare

Saunia e Brittany Beattie

Mekasini a le Ekalesia

I le lalolagi atoa, o le seminare ua aumaia ai le autalavou e pei o oe e latalata atili atu ia Iesu Keriso.

E le o tuua na o oe i lau faaiuga e auai i le seminare. I le lalolagi atoa, e faitau selau afe le autalavou o loo fai le seminare ma se vaega o o latou olaga, e o atu i o latou potuaoga i le pasi, vaa, uila, ma isi auala. O nisi o talavou e alapopo ona o lea i le mamao ina ia taunuu tonu i le taimi, o isi e fai malaga i afiafi, ae o isi foi e suesue i le fale mo ni nai aso o le vaiaso.

O le auai i le seminare e manaomia ai le ositaulaga, ae ua iloa e le autalavou i le lalolagi atoa o le auai i le seminare e matuai aoga ai lava taumafaiga uma. Ma o i latou o e auai ai, e i ai se mea ua tutusa uma ai i latou: o o latou aafiaga i le seminare ua latou latalata atili atu ai i le Faaola ma lo tatou Tama Faalelagi.

Mauaina o Faamanuiaga Folafolaina

Aisea ua taua ai lava le seminare ia te oe? O nisi o mafuaaga e aofia ai folafolaga nei mai perofeta ma aposetolo o aso e gata ai:

E “avea o se faamanuiaga mai le Atua mo le laveaiga o Isaraelu i aso nei i se taimi ua sili ona luitauina.”¹
O le a latou “saunia oe e tuu atu le savali o le talalelei toefuataiina ia i latou e te maua le avanoa e te feiloai i ai.”²
E fesoasoani e te “maua mai ai se malamalamaaga taua o le upumoni.”³
O le seminare “e maua ai avanoa matagofie e aoao ai mataupu o le a outou faafiafia ai outou. E maua ai avanoa matagofie tou te fegalegaleai ai ma i latou o outou lava ituaiga.”⁴
“O le a faateleina ai lo outou malamalama i mataupu o le talalelei. O le a faamalosia ai lo outou faatuatua. O le a outou atiina ae ai foi ni fegalegaleaiga ma faauoga lelei.”⁵
“Ua maua ai … itu faaleagaga, malosi e tetee i mea leaga ua siomia ai i tatou, ma le faateleina ai o le poto i le talalelei.”⁶
O se “tasi auala sili ona lelei e sauniuni ai mo se misiona.”⁷

Sailia o se Auala e Auai Atu Ai

O le alu i le seminare o lona uiga o le a e tuua ai se isi mea e te fiafia e fai ina ia e maua ai le taimi e auai atu ai. Peitai o se ositaulaga lea e alagatatau ona fai. Sa filifili Elijah Bugayong o Filipaina e fai lena faaiuga i lona tausaga mulimuli o le aoga maualuga. I le faagasologa o le aoga maualuga, sa tulua mai lava o ia i lana vasega. Sa naunau o ia ina ia tulaga muamua i lona tausaga faaiu ma sa oo lava foi ina mafaufau e faapea e faataatia ese le seminare, lea sa auai ai lava i tausaga na muamua atu, ina ia mafai ona ausia lana sini.

Ona oo lea i se tasi aso, sa faapea ona sui ai ona manatu. “Sa ou [tilotilo atu] i la’u laulau fai meaaoga,” o lana tala lea. “Sa ou vaaia se faaputuga tusi i ona autafa, o la’u tusi fusifa faatasi ai ma la’u api ma la’u tusilesona o le seminare. Sa ou fesili ifo i lo’u loto, ‘O lē fea e sili ona taua?’”

Sa maua e Elijah lana tali i le Mataio e 6:33: “A ia outou muai saili le malo o le Atua, ma lana amiotonu; ona faaopoopoina atu lea o ia mea uma ia te outou.” Sa tonu loa ia te ia e auai faamaoni atu i le seminare ae sue isi auala e faapaleni ai lona taimi ina ia mafai ona galue i lana aoga. I le faaiuga o le tausaga, sa sili aoao ia i le aoga ma sa manumalo foi i se sikolasipi i le iunivesite.

Sa filifili Spencer Douglas o Alapama, ISA, e faataatiaese nisi o ana gaoioiga faaleagafesootai ina ia ona maua atoatoa le seminare. Mo ona tausaga muamua e lua o le seminare, sa ala o ia i le 4:00 i le vaveao e alu i ai, ae o tausaga mulimuli e lua sa ala i le 5:00 i le taeao. Fai mai o ia, “Sa le mafai ona ou auai i le tele o gaoioiga e fai i le leva o le afiafi faatasi ma a’u uo aua e tatau ona ou vave moe. Ana leai, semanu e le mafai ona ou auai atoatoa i le seminare ma aoao i le taeao e sosoo ai.” Mo Spencer, sa le o le tau lava ia auai atu i le vasega, sa faatatau foi i le mataala ma le saunia e aoao.

Na aoao mai Elder Dallin H. Oaks o le Korama a Aposetolo e Toasefululua: “E le faapea a lelei se mea ona lava ai lea o se mafuaaga e faia ai. O le aofaiga o mea lelei e mafai ona tatou faia e sili mamao atu nai lo le taimi avanoa e faataunuu. O nisi mea e lelei tele nai lo le lelei, ma o mea na e tatau ona matuai taulai atu i ai le faamuamua i o tatou olaga.”⁸ O se fautuaga taua lena e ao ona manatua a o e filifili i le ala e faamuamua ai le seminare i au fuafuaga faataatitia.

Sauniuniga mo Misiona

O le seminare foi e avea o se sauniuniga lelei tele mo le galuega faafaifeautalai o le a e faia—o se faamisiona o le uarota i le taimi nei ma faapea foi pe a e auauna atu o se faifeautalai faamisiona i le lumanai. Ua iloa e Franco Huamán Curinuqui o Peru o lona aoaoina o tusitusiga paia i le seminare na fesoasoani ia te ia e saunia ai mo lana misiona.

Fai mai o ia o lenei sauniuniga e matuai aoga ai lava le ala i le 4:00 i le vaveao e alu i le seminare, na alu i vaa ina ua lolovaia le eria, ma sosoo ai ma le asa i le palapala ina ia oo atu i le vasega. Fai mai a ia, “Ou te manao ia uma le seminare ae amata vasega o le inisitituti ina ia mafai ona ou sauniuni mo se misiona. O le a faaauau pea ona ou tuputupu ae i le Ekalesia.” E taua le seminare ia te ia aua e aoao ai e uiga i mau ma tauloto fuaitau taua, lea o le a fesoasoani e avea ai o ia ma se faifeautalai lelei atu.

Faamanuiaina i Tulaga Uma o le Olaga

A o fai e le autalavou i le lalolagi atoa le taumafaiga e auai atu i le seminare, ua latou maua foi le malosi e sili atu nai lo le suesueina o tusitusiga paia. Na iloa e Cameron Lisney o Egelani sa faamanuiaina o ia i itu uma o lona olaga. “E le gata ina fesoasoani le seminare i le itu faaleagaga o mea, ae e fesoasoani foi i le aoga ma tulaga faaleaoaoga,” o le tala lea a Cameron.

Fai mai o ia, “o le vave amata o le aso e matala ai lou faiai. Fai mai nisi o a’u uo o i latou e pisi tele e le mafai ai ona auai—ia, e le faapea o le a e toe faamanatuina le matematika i le 6:00 i le taeao a ea?” A o faagasolo au suesuega, “o le a fesoasoani le Alii i au suega, ma afai e te alu i le seminare, o le a atili ai ona fesoasoani mai o Ia,” o le tala lea a Cameron.

Ioe, sa fesoasoani le seminare ia Cameron e faamalosia ai foi lana molimau. Fai mai o ia, “O le amataga o la’u molimau na oo mai i le polokalama o le seminare. A o ou talavaou lava i le 14 o o’u tausaga, sa ou matuai tauivi i le talalelei. Ou te le’i fiafia i le lotu, ma sa ou oo i mea sa le tatau ona ou oo i ai. Sa semanu lava ou te fati mo’i lava i ni nai masina.” Peitai ina ua valaaulia e se uo ia Cameron e auai i le seminare, sa ia filifili ai la te o. Ona amata ai lea ona oo moni mai faamanuiaga.

“Sa amata ona ou toe lagonaina le Agaga,” o le tala lea a Cameron. “Sa amata ona ou ua’i atili atu i le lotu ma auai i au lesona o le Aoga Sa ma le perisitua. Sa amata ona faigofie, ma sa amata ona ou lagonaina le fiafia sili atu. Sa iu lava ina ou maua sa’u lava molimau e uiga i le talalelei.” I le mavae ai o le lua masina o le seminare, sa feiloai loa Cameron ma lona epikopo ma sa faauuina ai o se aoao i le Perisitua Arona.

Ua iloa e Cameron o le seminare ua fesoasoani ia te ia e tu malosi atu ai e tetee i faaosoosoga o le lalolagi. “A o faaauau le seminare,” sa fai mai o ia, “sa ou iloa e faigofie atu le taulimaina o luitau e faapea ona tuuina mai e le lalolagi. E fai lava si faigata o le avea ma se tagata talavou i le lalolagi o loo tatou ola ai—o loo siomia i tatou i itu uma e le agasala. Ou te molimau atu ia te outou, afai e te alu i le seminare, o le a e maua le malosi e puipuia ai oe lava mai agasala. O le seminare e atiina ae ai se talipupuni faaleagaga e puipuia ai oe. E tele tofotofoga ma faaosoosoga eseese na tauai mai i lo’u ala, ma sa avea le seminare ma se fesoasoani tele lava i le faatumauina o a’u i le ala sa’o ma le vaapiapi.”

Faamalosia o le Tasi ma le Isi

O le seminare foi e mafai ai ona outou faatasitasi ma isi tupulaga o e tutusa o outou talitonuga. Fai mai Vika Chelyshkova o Rusia, “E musuia au e tagata e tutusa o matou manatu o e e i ai o latou tulaga faatauaina lelei ma o e foi e talitonu i le Atua e pei o a’u.” Sa ia faaopoopo mai, “Afai e i ai soo sa’u fesili lava, e mafai ona ou talanoaina faatasi ma lo’u faiaoga seminare ma isi tamaiti aoga. E mafai ona faasoa atu o’u manatu ma la’u molimau i isi e faamalosia ai lo’u lava faatuatua ma faatuatua o isi. O le faitauina faatasi o tusitusiga paia ma mafaufau loloto i lo latou aano faaleagaga, tatou te latalata atili atu ai i le Atua ma le tasi i le isi.”

Ua vaaia foi e Ksenia Goncharova o Iukureini ni taunuuga faapena. Fai mai o ia, “A faasoa atu o tatou aafiaga i le tasi ma le isi, e faapena ona tatou malolosi atu ma tatou malamalama lelei atu i mau. A tatou talanoa i faataitaiga mai o tatou olaga i le taimi o lesona, ou te iloa ai le ala o loo galue ai le talalelei i lo’u olaga ma i olaga o isi.”

O Le Iloaina o le Tama Faalelagi ma Iesu Keriso

Sa fesiligia se vaega o tagata talavou pe na faapefea ona faamanuiaina i latou e le seminare. O a latou tali ua faaalia ai se autu sili ona taua—o le seminare ua fesoasoani ia i latou e faalatalata atili atu ai i le Tama Faalelagi ma le Faaola. Na aoao mai Elder David A. Bednar o le Korama a Aposetolo e Toasefululua e faapea: “E taua autu uma lava e te suesueina i le seminare. O tausaga taitasi a o e taulai atu i le lomiga e tasi o tusitusiga paia, o le taulaiga autu lava o le Alii o Iesu Keriso.”⁹

O faamatalaga nei a nisi o le tupulaga e uiga i le auala ua avatu latalata teisi ai i latou e le seminare ia Iesu Keriso.

“Ua ou aoao ai i mea ua fai e le Faaola mo a’u, o le faitauina o nei tala mai le toatele o perofeta ma le iloaina o lo’u taua ia te Ia. Ua ou iloa o Lona alofa tele ia te au na maliu ai ma puapuagatia mo o’u tiga.”
“O le seminare o se auala sili lea e amata ai lo’u aso. E tusa lava pe o le a lo’u lelavā, ou te lagona le Agaga ma lagona le malosi, o lea la pe a tulai mai ni mea faigata i lo’u aso, ou te iloa e aunoa ma se masalosalo e alofa lo’u Faaola ia te a’u, ma e sili atu ona ou maua le to’a e tu atu ai mo le mea tonu.”
“O a’u ou te liliu mai i le Ekalesia, sa amata ona ou alu i le seminare ae ou te le’i papatiso. Ana le seanoa le seminare, ou te le iloa pe ou te papatiso. Ana leai le seminare, semanu ou te le maua le Faaola i lo’u olaga i le taimi nei pe iloa foi e mafai ona faamagaloina a’u agasala. Sa le’i i ai tele le Tama Faalelagi po o Iesu Keriso i lo’u olaga. Sa fesoasoani le seminare ou te maua ai i Laua ma avea ai i Laua ma se vaega e faavavau o lo’u olaga ma olaga o la’u fanau i le lumanai.”
“O le alu i le seminare i aso taitasi sa fesoasoani ou te ola latalata atu ai i lo’u Alii ma le Faaola, o Iesu Keriso, e ala i le aoao e uiga i Ana aoaoga, Lona alofa tele mo a’u, ma le ala e mafai ona ou toe foi atu ai e nonofo faatasi ma Ia.”
“Pe a ou i ai i le seminare, ou te maua ai se uiga loloto atu i tusitusiga paia. E fesoasoani e faamanatu mai ai ia te au i taeao uma ia ou faapei o Keriso i au mea e fai i aso taitasi.”
“O le seminare na aoaoina ai au i le ala e faitau ai a’u tusitusiga paia e le gata ia fiafia i ai ae ia sailia foi le faatatauga i le anotusi. Ua ou aoaoina ai aoaoga ma mataupu faavae e fesoasoani e faamalosia ai la’u molimau i se Tama Faalelagi alofa ma Iesu Keriso, o le a faapea ona ou tauaveina i aso uma o totoe o lo’u ola.”

Faatasi ai ma le anoano o faamanuiaga e oo mai i le auai i le seminare, e faigofie lava ona iloa le mafuaaga ua faamuamua ai e le autalavou i le lalolagi atoa le seminare i a latou fuafuaga faatulagaina.

O Se Faamanuiaga o Ona Taunuuga e mo le Olaga Atoa

“I le tele o tausaga ua mavae sa ou maua ai se avanoa e faiaoga ai i le seminare i le taeao po. Sa fai le vasega mai le 6:30 i le 7:30 i le taeao i aso taitasi o le aoga. Mo le lua tausaga sa ou maitauina pea tamaiti aoga tautulimomoe o tautevateva mai i le vasega, ma luiina lo latou faiaoga e faaala i latou. E uma loa ona faia le tatalo ma le mafaufauga faaleagaga, sa ou vaaia mafaufau atamamai ua ala mai ma le fiafia e faateleina lo latou malamalama e uiga i tusitusiga paia. O le vaega sili ona faigata o le vasega o le faaumaina lea o le talanoaga i le taimi e tatau ai ina ia auina atu i latou i a latou vasega masani o le aoga maualuga. A o faagasolo pea le tausaga aoga, sa ou mataituina le mauaina e tamaiti aoga taitasi o le faatuatuaina e ia o ia lava, maua foi le agaga faauo, ma se molimau ua faatupuina i le talalelei.

“I nai tausaga ua mavae, sa ou i ai i se faleoloa i se aai e le mamao tele ma iinei, ma sa ou faalogo atu ai i se tasi o valaau mai i lo’u igoa. Sa ou liliu atu ma sa faafeiloai mai au e ni tagata se toalua sa i ai i lau vasega seminare i aso ua mavae. Ua avea nei i laua o se tane ma se ava. Sa la faafeiloai mai ia te a’u o laua alo lalelei e toafa. A o matou talanoa, sa ou ofo lava i le tele o tamaiti aoga seminare sa laua feiloai i ai, ina ua mavae nei tausaga e tele. O lenei lava mea o se faamaoniga lea o se fusi faapitoa lea na tupu mai i seminare i le taeao po.”

Elder L. Tom Perry o le Korama a Aposetolo e Toasefululua, “Mauaina o le Upumoni,” Liahona, Ian. 1998, 72.

O Le Seminare sa Faatosinaina le Soifuaga o Peresitene Henry B. Eyring

O Mildred Bennion o se tasi lea sa i ai i le vasega muamua lava o tamaiti aoga seminare i le Seminare a Granite i le 1912. O le a avea mulimuli ane o ia ma tina o Peresitene Henry B. Eyring, Fesoasoani Muamua i le Au Peresitene Sili.

Sa malamalama o ia i le taua o le seminare i lona olaga, ma sa manao foi ia maua e lana fanau na lava faamanuiaga sa ia lagonaina mai le seminare, o lea sa fai ai e lona aiga se faaiuga taua lava: “Sa matou siitia atu i Iuta ma le ositaulaga tele i mea tautupe ina ia mafai e o maua atalii ona auai i le Seminare ma le Inisitituti ma maua ni uo i o tatou lava tagata. O lena mea e tatau ona taliina ai le fesili e uiga i o’u lagona e uiga i mea faapena” (sii mai i le C. Coleman, History of Granite Seminary, 142).

O loo faaauau pea le taua o aoaoga faaleLotu i le auaiga o Eyring a o avea ai o Peresitene Henry B. Eyring i le 1971 ma peresitene o le Kolisi a Ricks (ua ta’ua nei o le BYU–Idaho), o se kolisi a le Ekalesia, ma tautua ai o se Komesina o Aoga a le Ekalesia mai le 1980 i le 1985 ma faapena foi mai le 1992 i le 2005.

O Le Talafaasolopito o le Seminare

O se vaaiga lenei i le tuputupu ae o le seminare i le aluga o tausaga.

1888: Sa vaai e Peresitene Uilifoti Uitilafi le faatulagaina o le Ofisa o Aoga a le Ekalesia e taitai taumafaiga faaleaoaoga a le Ekalesia, e aofia ai vasega faalelotu e fai pe a tuua le aoga.

1912: Faatulagaina uluai vasega seminare e fai i le taimi o aoga, e toa 70 tamaiti aoga e tuua le aoga maualuga mo se periota e tasi ae auai atu i le seminare. O vasega sa fai i le isi itu o le auala mai le Aoga Maualuga a Granite i le Aai o Sate Leki, Iuta, ISA.

1925: Oo le lesitalaga i le 10,000 tagata aooga.

1948: Na maua ai i Kanata, o le atunuu muamua lea i fafo atu o le Iunaite Setete na fai ai seminare.

1950: Faavaeina o vasega seminare i aso taitasi (sa ta’ua muamua o le “seminare e fai i le taeao po”) i Kalefonia, lea e faapotopoto ai tagata aooga i falelotu o le Ekalesia a o lei amata le aoga.

1958: Oo le lesitala i le 50,000 tagata aooga.

1958: Na maua ai i Amerika Tutotonu, sa muamua faalauiloa i Mekisiko.

1962: Na maua ai i Europa, sa muamua faalauiloa i Finelani ma Siamani.

1963: Na maua ai i Asia, sa muamua faalauiloa i Iapani.

1965: Oo le lesitalaga i le 100,000 tagata aooga.

1967: Faalauiloa le seminare e aooga ai i le fale i afioaga maotua, lea e suesue ai tamaiti i le fale i aso e fa o le vaiaso ae auai faatasi i le aso e tasi o vaiaso taitasi.

1968: Na maua ai i Ausetalia.

1969: Na maua ai i Amerika i Saute, sa muamua faalauiloa i Pasila.

1972: Na maua ai i Aferika, sa muamua faalauiloa atu i Aferika i Saute.

1983: Oo le lesitalaga i le 200,000 tagata aooga.

1991: Na oo atu le lesitalaga i le 300,000 tagata aooga.

2012: Maua i atunuu ma teritori e 134 o le lalolagi atoa, ma le tusa i le 370,000 o tagata aooga sa lesitalaina.

Ata mai faaaloaloga a le OAE; ata na tusia e Scott Greer

Ata na tusia e Christina Smith

Taumatau: atapue o le au faauu i le seminare a Provo, Iuta mai faaaloaloga a le LDS Church Archives