Aua Ne’i Lavea
Puipui faafitauli lapopoa e mulimuli mai e ala i le faaleleia o faafitauli laiti i le taimi nei.
E fiafia lava Andrei i vaalele talu mai lava lona laitiiti. Ae e ui e toatele e moemiti ia felelei i ni vaalele, ae e le o alu le ulu o Andrei i ao [o le lagi]; e fiafia o ia i fao ma nati. O loo suesue le alii e 16 tausaga le matua mai Romania ia avea ma se enisinia vaalele.
I Romania e mafai ona filifili le tupulaga pe auai i se aoga maualuga e sauni ai mo le kolisi po o se aoga o matata eseese. Ona e fiafia tele Andrei i vaalele, o lea sa faigofie ai lana filifiliga e auai i le aoga matata eseese mo le fauina ma le faaaogaina o vaalele.
O enisinia o vaalele e le faapea na o le faaleleia o vaalele e malepelepe. O se tasi o mea aupito taua latou te faia o le siakia ma le tausia lea o vaalele ina ia le i ai se faaletonu. Latou te siakiina e le aunoa mea uma i luga o se vaalele, mai pe’ape’a e oo i kia e tulaueleele ai ma vaega taitasi i le va lena.
“E faigata tele ona maua sina faafitauli laitiiti e ono mafua ai le lavea o se vaalele,” o le tala lea a Andrei. “Ae o le mauaina e faigofie atu nai lo le taumafaiga e toe faapipii atoa le vaalele.”
O le faatumauina e le aunoa o se taimi faatulagaina e tausia ai ma le le manao e misi le siakiina, e taua tele—mo vaalele ma mo tagata o le Ekalesia—ina ia mafai ona faailoa ma faaleleia ai faafitauli a o lei oo ina lamatia faale-enisinia pe faaleagaga.
Tausiga Faaleagaga
O Andrei e nofo i Bucharest, o se nuu e lata i le lua miliona tagata. Ae peitai, o le Ekalesia e fai lava si mu’amu’a i Romania, ma e na o le lua paranesi e mafai ona maua i tagata o le Ekalesia i Bucharest. E mamao lava le fale o Andrei ma lona aiga mai isi tagata o le latou paranesi. E lagona e Andrei le malosi o faatosinaga a le lalolagi e siomia ai o ia i le aoga i ana uo. Ua ia iloa le faigofie tele ona lavea—i se faaupuga faaleagaga—pe afai na te le tausisia pea le tausia faaleagaga i taimi uma.
O le olaga e mafai ona faigata. Faatasi ai ma le taimi e faaalu e Andrei i ana meaaoga, soka, ma le komepiuta, na te faaavanoaina foi le taimi e tatalo, anapogi, suesue i tusitusiga paia, ma le faataunuuina o ona tiutetauave o se ositaulaga. Na te faamautinoaina foi e “alu” i le seminare, lea na te faia i luga o le initoneti ona o le mamao [o lo latou fale].
O le faia o na mea o se vaega o le tausiga masani faaleagaga lea e fesoasoani e faailoa ma faasa’o ai vaivaiga a o le’i oo atu i se laveaga matautia i le uiga faaleagaga.
“E i ai lava nisi o mea e tatau lava ona e faia e le aunoa—e fatuina ai se mausa,” o lana tala lea. “E le mafai ona e tuua e pule ai le olaga.”
Laveaga Faaleagaga
Ua aoaoina e Andrei afai tatou te le faia e le aunoa ni tausiga faaleagaga, e mafai e malosiaga e pei o le atuatuvale po o faatosinaga a tupulaga ona faatoilaloina lo tatou tetee atu i faaosoosoga. A tupu lena mea, e le umi lava ae leiloa lo tatou ala, lo tatou taitaiga, ma iu ai i lo tatou malosi faaleagaga.
E pei foi ona leiloa e se vaalele ua leai se malosiaga ia lona maualuga, a tatou agasala, e leiloa o tatou malosiaga faaleagaga ma lo tatou maualuga, ma tatou taumamao ai mai le lagi ma e le umi po o se taimi mulimuli ane ae oo atu i se laveaga faaleagaga.
E ui e mafai ona toe tuufaatasia i tatou e le Togiola a le Faaola pe a uma ona tatou lavevea, e sili atu lava le lelei o le faalagolago i Lona mana e fesoasoani ia i tatou e faaleleia ai le faafitauli a o laitiiti—a o le’i tupu ai se faalavelave faaleagaga.
O Le Matautia o le Faamisi
E le’i faapea lava ua oo atu i le mafaufau o Andrei e faamisi le tausiga faale-enisinia o se vaalele. O le faamisi [o le tausiga o se vaalele] e le o se mea lea e fai i ai se filifiliga. “E i ai tulafono e uiga i lena mea,” o lana tala lea. Ae afai na te faia le faamisi o le tausiga—pe na o le tasi lava—ua ia tautino mai “atonu e leai lava se mea e tupu.”
Ae atonu o le faafitauli tele lava i le faamisi e le faapea o le a lavea ai le vaalele i le taimi lena, ae o le le lavea. “Afai e leai se mea e tupu pe a ou faamisi nei, o le a faigofie atu ona faaosoosoina au e faamisi taeao,” o lana tala lea.
Afai e misi soo le tausiga, o uunaiga ma faafitauli e tulei atu i luga o le vaalele—po o o tatou luga—o le a mafua ai ona faaletonu se mea i se taimi e le o mamao po o se taimi mulimuli mai. “O le a iu lava ina tatou lavevea,” o lana tala lea.
O le mafuaaga lena ua tuuina mai ai e le Atua ia i tatou ia tulafono e faatatau foi i le tausiga e le aunoa faaleagaga. “Ia outou potopoto faatasi soo [i le lotu]” (3 Nifae 18:22; faaopoopo le faamamafa). Tatalo e le aunoa (tagai i le 3 Nifae 18:19). Suesue i tusitusiga paia ma le filiga (tagai i le 3 Nifae 23:1–5). “Ia tuu le amiomama e teuteuina ai ou mafaufauga e le aunoa” (MF&F 121:45; faaopoopo le faamamafa). Asiasi i le malumalu e le aunoa.1
O le tausia o na tulafono ma le faatinoina e le aunoa o le tausiga faaleagaga o le a tumau ai ona tatou felelei sa’o.
“Na fausia le vaalele ina ia aluese mai le eleele, ia tuua le lalolagi,” o le tala lea a Andrei. “O le mea lena o loo finagalo mai ai le Alii mo i tatou. O le tausia e le aunoa, o le a tatou taunuu ai ma le saogalemu i le mea tatou te fia o i ai—toe foi atu i le lagi.”
Ata pue o le vaalele na saunia e le iStockphoto © Christopher Pattberg; taumatau: ata na saunia e Adam C. Olson
Ata pue o apaau na saunia e Adam C. Olson; ata pue o le laupapa kilipi na saunia e John Luke