Dalhin sa Tahanan ang Turo sa Primary

Si Jeuscristo ang Ating Tagapagligtas

Alamin ang iba pa tungkol sa tema ng Primary sa buwang ito!

Isang 12-taong-gulang na batang babae ang nakahiga sa kanyang kama, at palubha nang palubha ang sakit. Nakamasid sa kanya ang kanyang mga magulang na wala nang magawa. Wala na silang magagawa para iligtas siya.

Pagkatapos ay naalala nila ang kamangha-manghang kuwentong narinig nila tungkol sa isang lalaking kasa-kasama nila na nagngangalang Jesus. Sabi ng mga tao, kaya Niyang pagalingin ang mga maysakit at bigyan ng paningin ang mga bulag. Baka-sakaling mailigtas Niya ang buhay ng kanilang anak!

Tumakbo si Jairo na ama ng bata para hanapin si Jesus. Nagsumamo siya kay Jesus na pagalingin ang kanyang anak. Pagkatapos ay dumating ang isang alila na may kakila-kilabot na balita. Huli na ang lahat. Patay na ang bata. “Huwag kang matakot,” sabi ni Jesus kay Jairo, “manampalataya ka lamang” (Marcos 5:36).

Pagdating nina Jesus at Jairo sa bahay ni Jairo, pumasok sila sa silid kung saan nakahiga ang bata. Hinawakan ni Jesus ang kamay ng bata at sinabihan itong magbangon. Nang tumayo ito, namangha ang kanyang mga magulang. Binuhay na muli ni Jesus ang kanilang anak!

Sa araw na iyon ipinakita ni Jesus kung gaano kalaki ang pagmamahal Niya sa bata at sa pamilya nito sa paglilingkod sa kanila. Ipinakita ni Jesus kung gaano kalaki ang pagmamahal Niya sa atin sa maraming magaganda at kamangha-manghang paraan:

• Tumulong Siya sa paglikha ng magandang daigdig at lahat ng nilalang dito.

• Nagkusa Siyang pumarito sa lupa upang maging Tagapagligtas natin, kahit alam Niyang magiging napakahirap nito.

• Ginugol niya ang Kanyang buhay sa lupa sa pagbabasbas, pagpapagaling, at pagtuturo sa iba.

• Naging sakdal ang Kanyang buhay.

• Kusang-loob siyang nagdusa para sa ating mga kasalanan sa Halamanan ng Getsemani at namatay sa krus upang tayo ay mabuhay na mag-uli at makabalik sa langit.

Awit at Banal na Kasulatan

• “Ako ay Namangha,” (Mga Himno, blg. 115)

• I Juan 4:14

Mga Ideya na Pag-uusapan ng Pamilya

Maaari ninyong basahin nang sama-sama ang kuwento tungkol sa anak ni Jairo (tingnan sa Lucas 8:41–42, 49–56). Pagkatapos ay maaari ninyong itaas ang larawan ng Tagapagligtas sa kasunod na pahina at anyayahan ang mga kapamilya na sabihin kung ano ang pakiramdam nila tungkol sa ilan sa magaganda at kamangha-manghang paraan na ipinapakita Niya ang Kanyang pagmamahal sa atin. Maaari ding magsalitan ang mga kapamilya sa pagbasa ng isa sa mga talata ng “Ako ay Namangha.” Matapos basahin ang bawat talata, anyayahan ang pamilya na sabay-sabay na kantahin ang koro. Pagkatapos ay talakayin ang mga paraan o magdrowing ng mga larawan nito na maipapakita ng inyong pamilya na mahal nila ang Tagapagligtas.