O Paionia i Atunuu Uma
O Au Paia o Aso e Gata Ai i Italia O Se Talatuu o le Faatuatua
E alala le tusitala i Iuta, ISA.
O le talafaasolopito o le Ekalesia i Italia ua amatalia i vaitaimi o le Feagaiga Fou, ina ua avea le taulaga o le Malo a Roma ma aiga i se vaega o ni Kerisiano faamaoni. E le i faamaumauina e le Tusi Paia pe o ai le muai tagata na auina atu le talalelei i Roma, ae sa i ai iina mo le “tele o tausaga” se lala o le Ekalesia (Roma 15:23) ina ua auina atu e le Aposetolo o Paulo se tusi i Roma e tusa ma le t.a. 57.
Sa faamatalaina e Paulo le au Kerisiano i Roma o se “tutumu i le agalelei” (15:14). Sa ia masani ma nisi o i latou, ma sa i ai i lana tusi se lisi umi o Au Paia pele o e na ia auina atu i ai le faamalo (tagai 16:1–15).
Sa faaviivii e Paulo le faatuatua o na Kerisiano ma tau atu ia i latou o loo ia tatalo ma faatauanau mo i latou. Sa ia momoo e vaai ia i latou ma faamoemoe o le a faatagaina o ia e le Atua e asiasi atu ia i latou i se taimi vave (tagai 1:8–15).
Ina ua oo i le taimi e malaga ai i Roma, ao avea ai ma se pagota, ae o le faanaunauga o tagata o le Ekalesia i lona taunuu ai, lea na faimalaga mai ai nisi mo le 43 maila (69 km) e faafeiloai o ia i le Apio Foro. I le vaai atu ia i latou, “sa ia faafetai atu i le Atua, ma loto tele ai” (Galuega 28:15).
Mulimuli ane, sa puapuagatia ai Paulo i le maliu fasia i Roma, lea sa matua sauaina ai tagata Kerisiano e Nero ma isi taitai. Na iu lava ina pau atu le Ekalesia i le liliuese, ae sa tuua e Au Paia i Roma i aso anamua se talatuu o le faatuatua i le nofoaga autu o le malo, faatulagaina ai se tulaga mo le faaKerisiano ina ia salalau atu i le lalolagi atoa.
O Se Nuu ua Natia e le Alii
I le 1849, sa valaauina Elder Lorenzo Snow (1814–1901) o le Korama a Aposetolo e Toasefululua e faatu se misiona i Italia. Ao ia mafaufau i le nofoaga e amata ai, sa ia aoao e uiga i le au Waldensians, o se nuu lolotu i mauga o Piedmont o Italia matu i sisifo.
Sa onosaia e le au Waldensians sauaga ogaoga i le silia ma le fitu seneturi ona o o latou talitonuga. Ao le i oo mai le Porotesano Toefaatulagaina e tusa ma nai selau tausaga, sa latou talaiina atu faapea sa pau atu le Ekalesia anamua a Keriso i le liliuese. Sa latou vavaeeseina i latou lava mai le Ekalesia Katoliko Roma ma sa taua o ni tagata e ese o latou talitonuga, tuliesea mai nuu, sauaina ma fasiotia. Nai lo le teenaina o lo latou talitonuga, sa latou sosola atu i mauga maualuluga.1
“Sa foliga ua oo mai i lou mafaufau se aofaiga tele o le malamalama ina ua ou mafaufau i le [au Waldensians],” o le faamaumauga lea a Elder Snow. I se tusi atu i le aiga, sa ia tusia ai, “Ou te talitonu sa natia e le Alii tagata iina i le lotolotoi o mauga o Alpine.”2
I isi itulagi o Italia, sa le fiafia tele le tulafono i gaoioiga faafaifeautalai. Peitai, i le lua tausaga ao le i taunuu Elder Snow, sa tuuina atu le saolotoga faalelotu i le au Waldensians i le itulagi o Piedmont i le maea ai o sauaga mo le tele o seneturi.3 E le na o lena, ae o nisi o i latou sa mauaina miti ma faaaliga tulagaese e saunia ai i latou mo le mauaina o le savali a faifeautalai.4
Sa faapaiaina e Elder Snow, faatasi ai ma soa faifeautalai e toalua, ia Italia mo le talaiina o le talalelei i le aso 19 Setema, 1850. Sa faamaumauina e Elder Snow faapea, “Mai lena aso sa amata ona tutupu avanoa mo le folafolaina o la matou savali.”5
I le isi fa tausaga, sa feagai taumafaiga a faifeautalai ma manuia faapea ma le tetee. Sa latou lolomiina tamai tusi e lua a faifeautalai ma se faaliliuga faaItalia o le Tusi a Mamona. Sa latou papatisoina se fuainumera o tagata liliu mai. Ae e oo atu i le 1854, sa faaitiitia le galuega—na valaauina faifeautalai i isi eria, o tagata liliu mai na sili ona faamaoni na malaga atu i Iuta, ma sa faatupulaia ia sauaga. I le 1862, o talaiga uma sa faia sa le toe faaauauina, ma sa tapunia le misiona i le 1867.
Sa malosi le Misiona a Italia mo le 12 tausaga, ae i le aluga o lena taimi, e 12 aiga ma tagata taitoatasi e toafitu sa liliu mai ma faimalaga atu i Iuta. O le au Waldensians o e na opogiina le talalelei sa faatumulia ai le Ekalesia i Iuta ma le malosi, ma o le aso e faitau afe tagata o le ekalesia ua toe saili i tua o latou gafa i au Waldensians faamaoni e toe 72 o e na tuua aiga o o latou augatama ae faatasi atu ma Au Paia o Aso e Gata Ai i luga o Mauga Papa.6
Faanatinatiina o le Galuega
I le maea ai o le tapunia o le Misiona a Italia, sa leai se galuega faafaifeautalai aloaia sa faia i Italia mo le toeitiiti selau tausaga. Ina ua toe amata ona susulu le malamalama o le talalelei i Italia, ua i le lotolotoi o le Taua lona Lua, ina ua nofoia aai i Italia atoa e le aufaigaluega faamiliteli o le Au Paia o Aso e Gata Ai. Sa faatulagaina e nei tagata o le au paia ni vaega e feiloai i sauniga o Aso Sa, ma sa faaauau pea e vaega ina ua maea le taua ao atofaina tagata o le ekalesia i nofoaga autu o le militeli i Italia.
O le isi 20 tausaga, sa faanatinati ai e le Alii Lana galuega. Sa amata ona auai i le Ekalesia ia tagatanuu o Italia ina ua maea ona feiloai atu i faifeautalai i atunuu lata ane. Sa faatulagaina ni vaega o tagata faamiliteli i Naples ma Verona i lala i lalo o le taitaiga a le Misiona a Swiss. Sa toe faaliliuina e le misiona le Tusi a Mamona i le faaItalia ma lolomiina. Sa latalata le taimi mo faifeautalai e auina atu i Italia.
I le 1964, sa faatulagaina Italia o se itu i le Misiona a Swiss, ma e lei umi ae auina atu faifeautalai o e tautatala faaItalia i le tele o aai. I le 1966, sa faatulagaina le Misiona a Italia, o le 99 tausaga mulimuli ane, na tapunia ai le uluai Misiona a Italia. O Elder Ezra Taft Benson (1899–1994) o le Korama a Aposetolo e Toasefululua sa ofoina le tatalo o le toe faapaiaina o Italia mo le talaiina o le talalelei.
I le sefulu tausaga mai le taimi na tatalaina ai le misiona, sa faateleina le fuainumera o tagata o le ekalesia i Italia mai pe tusa ma le 300 i le 5,000. E oo atu i le 1982 ua faaluaina lena fuainumera. O tausaga talu ai nei, na matautia le tuputupu ae. Mai le 2005 i le 2010, e fa siteki fou sa fatuina, ua oo atu ai le aofaiga o numera o siteki i le fitu. I le taimi nei ua toeitiiti 25,000 tagata o le Au Paia o Aso e Gata Ai i Italia.
Faatulagaina o le Ekalesia
O Elder Craig A. Cardon o le Fitugafulu o se tasi o le faitau afe o Au Paia o Aso e Gata Ai o e na sailia o latou tuaa i tua ia Phillipe Cardon, o se tagata liliu mai Waldensian o e na faimagalaga atu i Iuta i le 1854. Ua molimauina e Elder Cardon le tatalaina o le galuega a le Alii i le laueleele a ona tuaa, muamua o se faifeautalai i le Misiona faatoa tatala a Italia Roma i le 1960 sosoo ai ma avea ma peresitene o le Misiona a Italia Roma i le 1980.
Ina ua valaauina Elder Cardon e avea ma se peresitene o le misiona i le 1983, o falelotu uma i Roma sei vagana ai le [falelotu] e tasi sa avea ma ni fale mautotogi. I na aso, o fale fou a le Ekalesia sa totogiina se vaega e ala i foai mai tagata o le ekalesia i le eria. Talu ai sa manaomia tupe e fau ai ni fale, sa foliga faigata le aofaiga o tupe na manaomia mo tagata o le ekalesia ina ia mafai ona foai atu ni mea se tele. Ina ua uma ona iloiloina ma le agaga tatalo, sa valaaulia tagata o le ekalesia i Italia e ave le tupe semanu e latou te faaaluina i le Kerisimasi o lena tausaga ma foai atu i le tupe o le fale. Nai lo meaalofa, o le a tuu e aiga se piliki i lalo o le latou laau Kerisimasi e fai ma sui o a latou osigataulaga.
“O le mea sa tupu i lena taimi sa o se vavega,” o le tala lea a Elder Cardon. “Sa sili atu le saofaga i le mea na manaomia. Ona o lenei mea ma le faaauau ai o le faatuatua o le sefuluai a le Au Paia, sa sasaa atu e le Alii se faamanuiaga oa faaleagaga i luga o le misiona ma luga o Au Paia i le eria atoa ao latou tali atu ma le naunautai e faia mea uma latou te mafaia e atiina ae ai le Ekalesia. Ou te talitonu o le latou tautinoga o se vaega taua o le mea sa faatagaina ai le faaauau pea o le Ekalesia i le tulaga mo se siteki ina ia faatulaga ma le fausiaina o se malumalu i Roma i le taimi nei.”7
Ao le i valaauina o se Pulega Aoao, sa toe foi atu Elder Cardon i Italia i le 2005 ina ia auai i le faatulagaina o le Siteki a Roma Italia. O se aafiaga matagofie. “O le malosi lenei o le perisitua,” o lana tala lea, “o ki o le perisitua, o le faauigaga faatusitusiga paia o se nofoaga o le sulufaiga—o se siteki—ua faavaeina nei i Roma.”
O Se Malumalu i Roma
I le konafesi aoao ia Oketopa 2008, ina ua fofogaina e Peresitene Thomas S. Monson o le a fausia se malumalu i Roma, na sosolo atoa i le Maota Autu mo Konafesi se maofa ma musumusu o le fiafia mai le faapotopotoga. I faapotopotoga o Au Paia i Italia o e na matamata e ala i le satelite sa alalaga ma le olioli. E manatua e se tasi o tuafafine, “Sa matou o i o matou aiga ua peiseai ua fai ni o matou apaau, faatasi ai ma le olioli i o matou loto.”
Aisea e matua taua ai le manatu o se malumalu i Roma? E ese mai i le nofouta i le matua taua faaleagaga o le malumalu, ua i ai i tagata o le ekalesia se lagona o le taua o le talafaasolopito o le aai, na saunoa ai Elder Cardon: “O lona puleaina ma le mana i lona vaitau iloga; o ona tagata suesue, o tusiata, saienitisi, ma tagata fau mea o e na saofaga i le tele o mea i le lalolagi; ma le faamanuiaga lea ua avea ai le mana faalelotu o Roma i le fesoasoani lea e faalauiloa atu le faaKerisiano i le lalolagi atoa, ua avea ma vaega uma o le talafaasolopito o Roma, ua faamatagofieina nei i se malumalu o le Alii.” I le sauniga o le suatiaina o le laueleele i le 2010, na saunoa ai Peresitene Monson, “E tusa ai ma le fausiaina o le malumalu i luga o lenei nofoaga, e matua taua tele i le Au Paia o Aso e Gata Ai.”8
Mo le silia ma le 40 tausaga, sa faimalaga tagata o le ekalesia i Italia i le Malumalu o Bern Suitiselani, o nisi e malaga mo le lua aso e oo ai iina. E talitonu Massimo De Feo, lea sa avea ma peresitene o le siteki a Roma ma i le taimi nei o se Fitugafulu Eria, o le Malumalu o Roma o se faailoga ua vaaia e le Alii le tele o tausaga o le auaunaga ma le ositaulaga mai le Au Paia o Aso e Gata Ai ma silafia lo latou manao tele mo se malumalu.
Ina ua faia le faasilasilaga e uiga i le malumalu, sa saunoa Elder De Feo, o le fiafia sa lagonaina sa pei o se fale tapuai pe a malo se au i le sekone mulimuli; o le olioli na tutusa ma le mea sa ia vaai faalemafaufau i ai atonu o o tatou lagona ia i le muai olaga ina ua fofogaina le ata o le faaolataga. Sa fusifusi, ataata, ma fetagisi le Au Paia. O se fiafia moni.
“E ofoofogia le auauna atu i le Alii i aso nei,” o le tala lea a Elder De Feo, “matua faapitoa lava mo Italia, ma Roma.” Ua ia molimau mai, “Ou te iloa ua matua faamanuia e le Alii lenei vaega o Lona malo.”9
Tagata o le Au Paia i Italia
|
1854 |
66 |
|
1965 |
287 |
|
1975 |
3,929 |
|
1985 |
12,000 |
|
1995 |
17,000 |
|
2005 |
21,791 |
|
2013 |
25,453 |
Ua fesoasoani le Autalavou a le Siteki o Roma Italia i Sasae e faamama ma vali se fale mo e e leai ni malutaga.
Ua feiloai atu Elder Ezra Taft Benson (ogatotonu) i faifeautalai o le Misiona a Italia fou faatoa faatuina.
O le falelotu a le Uarota a Catania i luga o le talafatai o Sicily. Sa faatuina le Paranesi a Catania i le 1967, i le tausaga ina ua maea ona faatulagaina le Misiona a Italia.
Ata na pueina e Massimo Criscione, sei vagana ua faamatalaina; ata pue o Cinque Terre saunia e Daniel John Anderson; ata pue o mauga © Corbis
Ata pue o le faatagata o Constantine, saunia e Tetra images/Thinkstock
Agavale mamao: ata pue na saunia e Massimo Criscione ma Kimberly Reid; taumatau: Koluma faaRoma saunia e hamai/iStockphoto/Thinkstock