Savali a Faiaoga Asiasi

O Le Misiona Paia a Iesu Keriso: Auauna Atu

Ia suesue ma le agaga tatalo i lenei mataupu ma saili ia iloa le mea e faasoa atu. E faapefea e le malamalama i le soifuaga ma le misiona a le Faaola ona faateleina ai lou faatuatua ia te Ia ma faamanuia ai isi e te tausia e ala i faiaoga asiasi? Mo nisi faamatalaga, alu i le reliefsociety.lds.org.

Faatuatua, Aiga, Toomaga

O se vaega lenei o se faasologa o Savali a Faiaoga Asiasi e faaautu i vaega o le misiona a le Faaola.

Ao tatou auauna atu i isi, ua avea i tatou ma e mulimuli moni ia Iesu Keriso, o le sa faia le faataitaiga mo i tatou. Ua saunoa mai Peresitene Thomas S. Monson e faapea: “Ua siomia i tatou e i latou e manaomia lo tatou gauai atu. … O i tatou o lima o le Alii i luga o le fogaeleele, ua i ai le tiutetauave e auauna atu ai ma siitia Ana fanau.”¹

Sa aoao mai Sister Linda K. Burton, peresitene aoao o le Aualofa, e faapea: “Ae a faata’ita’i i ai, e mafai e i tatou taitoatasi ona avea atili e faapei o le Faaola pe a tatou auauna atu i fanau a le Atua. Ina ia fesoasoani i le faaleleia atili [o le auauna atu] i le tasi ma le isi, ou te fia fautuaina atu ni upu se fa ia manatua: “Muamua matau, auauna ai.” … A tatou faia lena mea, ua tatou tausia feagaiga ma o la tatou auaunaga, e faapei ona saunoa Peresitene Monson, e molimauina ai lo tatou avea ma ni soo.”²

E mafai ona tatou tatalo i taeao taitasi ia iloa avanoa e auauna atu ai i isi. “O le a taiala oe e le Tama Faalelagi ma o le a lagolagoina oe e agelu,” sa saunoa David L. Beck, peresitene aoao o Alii Talavou. “O le a tuuina atu ia te outou le mana e faamanuia ai olaga ma laveai ai agaga.”³

Mai Tusitusiga Paia

Mataio 20:25–28; 1 Nifae 11:27–28; 3 Nifae 28:18

Mai lo Tatou Talafaasolopito

I le konafesi aoao ia Oketopa 1856, sa faasilasila atu ai e Peresitene Polika Iaga (1801–77) faapea o loo sopoia pea e paionia o taavaletoso ia laufanua valevalenoa ma e ao ona fesoasoani tagata uma i le aoina o sapalai mo i latou i se taimi vave. Sa tusia e Lusi Meserve Samita e faapea sa “to ese e fafine o latou ofuloto [o laulavalava tetele o se vaega o sitaili, i na ona po ma sa maua ai le mafanafana], o totini, ma mea uma lava sa mafai ona latou faaavanoaina, iina lava i le Tapeneko, ma faaputu [i latou] i totonu o taavaletoso.”

Ao amata ona taunuu paionia sa laveaiina i le Aai o Sate Leki, sa tusia e Lusi faapea, “E leai se isi galuega sa … ou faia i lo’u olaga sa sili ona faamalieina ai au, e tusa ma le autasi o lagona sa i ai. Sa na ona ou alu lava i se faleoloa ma faailoa atu i ai lo’u manao; afai o se ie, sa na ona fua lava ma ‘oti mai e aunoa ma se totogi.”⁴

Sa saunoa Peresitene Siaosi Alapati Samita (1870–1951) i le auauna atu i isi: “O le a tutusa lo tatou fiafia e faavavau ma le ala tatou te tuuto atu ai i tatou lava e fesoasoani ai i isi.”⁵

Mafaufau i le Mea Lenei

1. E mafai faapefea ona taitaia i tatou e le tatalo ia avea ma meafaigaluega i aao o le Alii?

2. E mafai faapefea e le auauna atu i isi ona fesoasoani ia i tatou e tausia a tatou feagaiga?

Faamatalaga

1. Thomas S. Monson, “O Le A Se Mea Ua Ou Faia mo Se Tasi i le Aso?” Liahona, Nov. 2009, 86.

2. Linda K. Burton, “Muamua Matau, Ona Auauna Atu ai Lea,” Liahona, Nov. 2012, 78.

3. David L. Beck, “O Lou Tiute Paia e Auauna Atu,” Liahona, Me 2013, 56.

4. Lucy Meserve Smith, i le O Afafine i Lo’u Malo: O Le Talafaasolopito ma le Galuega a le Aualofa (2011), 39–40.

5. George Albert Smith, i le O Afafine i Lo’u Malo, 83.

Faamatalaga itiiti mai le ata vali O Ai Na Na Pa’i Mai Ia Te A’u? saunia e Gary L. Kapp