Mulimuli i Musumusuga Laiti
O musumusuga uma mai le Agaga Paia e taua le faalogo i ai.
Ata na tusia e Greg Newbold
Afai e ato atu e se asiosio se ogalaau tele i luga o lou moega i le po, masalo e te manao ia iloa ao lei tupu.
O Wilford Woodruff (1807–98), lea na avea mulimuli ane ma Peresitene lona fa o le Ekalesia, na tofa i fafo i lana taavaletoso ma lona faletua ma le la tama ae musumusu atu le Agaga, “Nofo i luga e aveese [lau] taavale solofanua lena.”1 Na mafai lava ona ia teena e avea o se manatu ese, ae peitai sa ia usitaia. I le afa itula mulimuli ane, na gaulele ai e se asiosio se laau tele ma lele atu i le ea. Na pau tonu lava le laau i le mea lea sa i ai le taavaletoso.
O le tele ia o ia ituaiga faataitaiga o vavega ia na tutupu o se taunuuga o le mulimuli i musumusuga.
Ae a se musumusuga lea e uunaia ai oe e valaau atu i se uo i le na o le fai atu lava talofa? Po o se musumusuga e tuu se isi pea totini i totonu o lau atofaafafa mo leisi au savaliga sopo? O le mulimuli i uunaiga faapena e foliga mai ai o le a le taitai atu ai i taunuuga matautia, ae e taua lava i latou.
Masalo e lei lelei le aso o le uo lea sa e valaau atu i ai. E mafai ona faafiafia o ia i le valaau atu i le telefoni. I le savaliga sopo, e mafai ona faauigaina le isi pea totini faapea o le eseesega lea i le va o se tafaoga mafana ma ni manuaga tiga pe afai na faafuasei ona susu ou vae.
Na aoao mai Peresitene Thomas S. Monson faapea: “Tatou te vaavaai. Tatou te faatalitali. Tatou te faalogo mo lena leo filemu ma itiiti. Pe a talanoa mai, e usitaia e alii atamamai ma tamaitai. Aua nei faatuai ona tatou mulimuli i musumusuga a le Agaga.”2
O nisi taimi, o uunaiga e faanatinati. Peitai, i le tele lava o taimi, e toafilemu. Na folafola mai e le Tama Faalelagi e faatonuina i tatou i “lea fuaitau i luga o lea fuaitau, ma lea mataupu i luga o lea mataupu, o sina mea itiiti i i ma sina mea itiiti i o” (2 Nifae 28:30).
Na aoao mai Elder David A. Bednar o le Korama a Aposetolo e Toasefululua: “O le tele lava o taimi, e oo mai faaaliga i nai faaopoopoga laiti mo sina taimi, ma e tuuina mai e tusa ai ma o tatou manaoga, agavaa, ma tapenapenaga.”3
Atonu lava, o le a leai se tasi o i tatou o le a manaomia le ‘alo mai se ogalaau na atoina mai ia i tatou e se asiosio. Ae e mafai ona tatou mautinoa o le a i ai lava iina ni mea lelei itiiti ma faatauvaa e mafai ona tatou faia ao tatou gauai atu i le Agaga.