O Le Mana o le Perisitua Ua Avanoa mo Tagata Uma

Saunia e Linda K. Burton

Peresitene Aoao o le Aualofa

O le pule o le perisitua e faaeeina atu e ala i le faauuga, ae o le mana o le perisitua e avanoa mo tagata uma. O le ola amiotonu o le agavaa lea mo i tatou taitoatasi e valaaulia ai le mana o le perisitua i o tatou olaga.

Ua faamanuiaina i tatou e ola i lenei vaitau o le talafaasolopito o le Ekalesia pe a tuuina mai ni fesili e uiga i le perisitua. E i ai le fiafiaga sili ma le manao ia iloa ma malamalama atili e uiga i le pule, mana, ma faamanuiaga e faatatau i le perisitua a le Atua. O lou faamoemoe ina ia mafai e le aoaoga faavae o le perisitua ona “to ifo i luga [o tatou agaga] e pei o le sau mai le lagi” (MF&F 121:45; faaopoopo le faamamafa). Ou te molimau atu faapea ua faanatinati e le Alii Lana galuega, ma e matua taua tele mo i tatou le malamalama pe faapefea ona faataunuuina e le Alii Lana galuega ina ia mafai ona tatou maua le mana lea e oo mai i le ogatasi ai ma Lana fuafuaga ma faamoemoega.

Ua faataunuuina lava e le Alii Lana galuega, o le “aumaia le tino ola pea ma le ola faavavau o le tagata” (Mose 1:39), e ala i le mana o Lana perisitua. E ala i le [mana o le Lona perisitua] na foafoa ai le lagi ma le lalolagi. O sauniga o le perisitua, ua mafai ai ona faatoilalo aafiaga o le Pa’u ona o le Togiola a Iesu Keriso. Talu ai ua tuuina mai le pule o le perisitua i le tagata e faamanuia ai fanau a le Tama Faalelagi, ua Ia finagalo ina ia tatou valaaulia le mana o le perisitua i o tatou aiga ia faamanuia ma faamalosia ai o tatou aiga ma o tatou olaga taitoatasi.

I le aoaoga a taitai i le lalolagi atoa i le 2013, sa saunoa malosi mai ai Elder Dallin H. Oaks o le Korama a Aposetolo e Toasefululua e faapea: “O alii e le o le perisitua!”¹ Mo au, o se lapataiga lena faatasi ai ma se valaaulia mo i tatou uma e suesue, mafaufau loloto, ma o mai ia sili atu le malamalama i le perisitua. Afai e fesili atu se tasi, atonu o se tamaitiiti po o se uo e auai i se isi faatuatuaga, ia te oe i fesili nei, e mafai ona e taliina?

O le a le Perisitua?
Aisea e taua tele ai le perisitua?
O a ki o le perisitua?
O ai e umia ki o le perisitua?

O le a le perisitua?

O le perisitua o le mana ma le pule faavavau a le Atua lea e Na te faamanuia, togiola, ma faaeaina Ana fanau. Na faamalamalama mai e Elder David A. Bednar o le Korama a Aposetolo e Toasefululua le perisitua i le auala lenei: “O le perisitua o le auala lea e galue ai le Alii e ala i tama tane ia laveai agaga. … E faamoemoe i se tasi e umia le perisitua, na te faaaogaina lenei pule paia e tusa ai ma le mafaufau, finagalo, ma faamoemoega o le Atua. E leai se mea o faatatau faapea e faapito’au le perisitua. O le perisitua e faaaogaina i taimi uma e auauna atu ai, faamanuia, ma faamalolosia ai isi tagata.”²

Ao ou suesue, mafaufau loloto, ma saili ia malamalama i le perisitua, ua fesoasoani ia te au e iloilo ai le tulaga o le lalolagi e aunoa ma le [perisitua].Sa iloaina e Elder Robert D. Hales o le Korama a Aposetolo e Toasefululua lenei manatu ina ua ia saunoa mai e faapea: “E mafai ona e mafaufau i le pogisa ma le valevalenoa o le olaga faaletino pe ana fai e leai se perisitua? Ana fai e le i ai le mana o le perisitua i le fogaeleele, semanu e saoloto le tiapolo e fealua’i ma nofotupu e le mataofia. Semanu e leai se meaalofa o le Agaga Paia e taitai ma faamalamalamaina ai i tatou; leai ni perofeta e saunoa mai le suafa o le Alii; leai ni malumalu e mafai ona tatou osia ai feagaiga paia faavavau; leai se pule e faamanuia pe papatiso ai, e faamalolo pe faamafanafana ai. … Semanu e leai se malamalama, leai se faamoemoe—na o le pogisa.”³

O le manatu e leai se mana o le perisitua e atuatuvale. O au, o se tasi, e tu i luga ma olioli ma le lototoa i lenei mana paia ua toefuatai mai i le lalolagi e ala i se perofeta a le Atua i lenei tisipenisione mulimuli ma mamalu o le atoaga o taimi!

Ae peitai, ua apoapoai mai ia i tatou Elder Oaks, i lo tatou tauina o le perisitua: “E ui ina tatou faasino i e ua umia le perisitua o ‘le perisitua,’ ‘aua nei galo ia i tatou, o le perisitua, e lē ā i latou o ē ua umiaina. Ua latou umiaina i se faalagolagoga paia ia faaaoga mo le manuia o alii, tamaitai, faapea foi ma fanau.”⁴

Aisea e taua tele ai le perisitua?

Ua tatou iloa “o le fuafuaga paia o le fiafia, ua mafai ai ona faaauau fegalegaleaiga faaleaiga i tala atu o le tuugamau. Ua mafai i sauniga paia ma feagaiga ua maua i malumalu paia ona toe foi atu ai tagata taitoatasi i le afioaga o le Atua ma toe faatasia ai aiga e faavavau.”⁵ E pei ona aoao mai Elder Russell M. Nelson o le Korama a Aposetolo e Toasefululua e faapea, “Ua toe fuataiina le pule o le perisitua ina ia mafai ona faamauina aiga e faavavau.”⁶

“E manaomia le pule o le perisitua e faatino ai ia sauniga o le talalelei. … O sauniga taitasi e tatalaina le faitotoa mo faamanuiaga lauusiusi faaleagaga.”⁷ Sa tuuina atu e Iesu ki paia o le malo ia Peteru ma le tiute e faapea “o se mea e te fusifusia i le lalolagi, e fusifusia foi lea i le lagi: o se mea foi e te tala i le lalolagi, e tatalaina foi lea i le lagi” (Mataio 16:19).

O a ki o le perisitua?

O se faamalamalamaaga faigofie o ki o le perisitua o loo maua i le New Era: Me 2012

“Faatasi ai ma seti o ki, e mafai ona e faia le tele o mea o le a le mafai ona e faia i se isi tulaga—ulufale atu i fale, ave ia taavale, ma tatalaina keli, i le lotolotoi o isi mea. O ki, e matele lava lona uiga, o le pule ma le faatagaga.

“O le mea moni foi lena e tasi i ki o le perisitua. Latou te pulea le faatagaga i faamanuiaga ma sauniga o le perisitua. … O ki o le perisitua o i ai aia tatau e pulefaamalumalu ai ma taitai le Ekalesia. … E masani ona faaaoga ki i se eria faafaafanua, e pei o se uarota, siteki, po o le misiona. E masani ona latou faaaofia ai foi le pule i luga o sauniga ma gaoioiga faapitoa (mo se faataitaiga, papatisoga, faamanatuga, galuega faafaifeautalai ma faalemalumalu).”⁸

O ai e umia ki o le perisitua?

“O Iesu Keriso o loo umia ki uma o le perisitua e faatatau i Lana Ekalesia.Na Ia faaee atu i luga o Ana Aposetolo taitasi ki uma e faatatau i le malo o le Atua i le fogaeleele. O le Aposetolo sinia o loo soifua, o le Peresitene o le Ekalesia, ua na o le pau lea o le tagata i luga o le fogaeleele ua faatagaina e faaaogaina ki uma o le perisitua (tagai MF&F 107:91–92). … [Ona ia] faamatuu atu lea o ki o le perisitua i isi taitai perisitua ina ia mafai ai ona latou pulefaamalumalu i eria o o latou tiutetauave. … E le maua e peresitene o ausilali ma o latou fesoasoani ni ki. Latou te maua le pule e faamatuu atu i ai e galulue ai i o latou valaauga.”⁹

Peitai, e i ai se eseesega i le va o le pule o le perisitua ma le mana o le perisitua. E faaeeina atu le pule o le perisitua e ala i le faauuga, ae o le mana o le perisitua e avanoa mo tagata uma. Talu ai o le mana o le perisitua o se mea e tatou te mananao uma ia i ai i o tatou aiga ma auaiga, o a mea e manaomia ona tatou faia ia valaaulia ai lena mana i o tatou olaga? O le matafaioi o le i ai o le mana o le perisitua o le amiotonu faaletagata lava ia.

Malamalama i le Aoaoga Faavae o le Perisitua

Muamua, saili ia agavaa mo le meaalofa o le Agaga Paia. Aua e sili atu ona malamalama le mataupu faavae o le perisitua e ala i faaaliga, e taua le mauaina o le fesoasoani a le Agaga Paia e faaali mai ai ma to ifo i o tatou agaga le mataupu faavae.

Lona lua, auai i le malumalu paia. Ua tatou iloa o malumalu “ua silisili ona paia i fale uma ua saunia mo tapuaiga”¹⁰ ma saunia le nofoaga lelei e aoao ai e uiga i le perisitua e ala i le agaga o faaaliga.

Lona tolu, faitau i tusitusiga paia. O le saili, mafaufau loloto, ma le suesueina o tusitusiga paia o valaaulia ia mo le Agaga Paia e faaali mai ia i tatou upumoni taua e uiga i le perisitua. Ou te fautuaina atu mea nei ia te outou mo lo outou manatunatuga faaeteete ma le agaga tatalo: Mataupu Faavae ma Feagaiga 13, 20, 84, 107, ma le 121, ma Alema 13. Ona ou valaaulia lea o outou e taulotoina le tautoga ma le feagaiga o le perisitua, lea e mafai ona maua i le Mataupu Faavae ma Feagaiga 84:33–44. O le faia o lena mea, ou te folafola atu ai o le a faalautele e le Agaga Paia lou malamalamaaga o le perisitua ma musuia ma siitia oe i se auala matagofie.

Ou te valaaulia foi outou e mafaufau loloto i le Mataupu Faavae ma Feagaiga 121:34–46 ma fesili ifo ia te outou lava e pei o le:

O pupu ea lo’u loto i mea o lenei lalolagi?
Pe ou te manao ea e maua viiga o alii po o tamaitai?
Pe ou te taumafai e ufiufi au agasala?
Pe ou te faamaualuga ea?
Pe ou te faatinoina le puleaina po o le puleaga po o le faamalosi i luga o la’u fanau, lo’u toalua, ma isi?
O ou taumafai ma le faamaoni e faataitai mataupu faavae e pei o le faatauanau, agamalu, faapalepale, agalelei, mataalofa, alofa e le lualuagia (o lona uiga o le alofa faamaoni, pe mai i le loto)?
E teuteuina ea e ou manatu le mama e le aunoa?
Pe ou te manao i le Agaga Paia e avea ma au soa tumau?

O upu faatauanau, agamalu, faapalepale, agalelei, mataalofa, ma le alofa e le lualuagia na avea o se uiga fou sili ona patino ia te au ao ou manatua se faamanuiaga sa ou talosagaina mai i lou tama i tausaga ua mavae.

Ina ua avea au ma se talavou matutua nofofua, sa ou tauivi ma se faaiuga faigata. E pei ona ou faia i ni nai taimi, sa ou alu atu i lou tama ma talosagaina se faamanuiaga faaletama. Ma le faamoemoeina o ia e vave lava ona faatino la’u talosaga, sa ou te’i ina ua ia tali mai, “O le a ou manaomia sina taimi e saunia ai e tuuina atu ia te oe lenei faamanuiaga. E te MALIE e faatalitali mo ni nai aso?”

O le mea e malie ai, i le 40 tausaga mulimuli ane, sa galo mea na ia saunoa ai i lena faamanuiaga faaletama, ae o le a le galo lava ia te au le migao loloto sa i ai i lou tama mo le perisitua paia ao ia saunia o ia lava faaleagaga e tuuina mai se faamanuiaga faaletama. Sa ia malamalama i mataupu faavae ua aoaoina i le Mataupu Faavae ma Feagaiga 121 ma sa naunau e ola ai ina ia mafai ona agavaa mo le mana o le perisitua e faamanuia ai lona aiga.

O Saunoaga a Perofeta Soifua

O se faamanuiaga mo au le galulue faatasi ai ma perofeta, tagatavaai, talifaaaliga musuia e toetoe lava i aso taitasi. Afai tatou te mananao moni lava ia iloa aoaoga faavae o le perisitua, ua ia i tatou se punaoa ola na tuuina mai e le Atua ma faatuatuaina: o perofeta, tagatavaai, ma talifaaaliga. Ou te molimau atu o i latou o ni tagata o le Atua o umia le mana o le perisitua e ala i le amiotonu faaletagata lava ia.

I se konafesi talu ai nei, sa aoao mai ai Elder M. Russell Ballard o le Korama a Aposetolo e Toasefululua e faapea: “I le fuafuaga sili a lo tatou Tama Faalelagi e maua ai le mana o le perisitua, ua i ai i alii le tiutetauave tupito e taitai ai le perisitua, ae e le o i latou o le perisitua. E eseese matafaioi ae tutusa lava le taua ua i ai i alii ma tamaitai. E pei lava ona le mafai e se tamaitai ona fanauina se tamaitiiti e aunoa ma se alii, e faapena foi, e le mafai e se alii ona faaaogaina atoa le mana o le perisitua e faavae ai se aiga e faavavau e aunoa ma se tamaitai. I se isi faaupuga, i se vaaiga e faavavau, o le mana foafoa atoa ai ma le mana o le perisitua e faaaogaina uma e se tane ma se ava.”¹¹

O loo ou aoaoina faapea o uunaiga mama a tamaitai o se meaalofa e faaatoatoaina ai le mana o le perisitua. O le talanoa atu ai i tamaitai o le Ekalesia, na faamalosiau mai ai, Peresitene Howard W. Hunter (1907–95) faapea, “Matou te augani atu ai ia te outou ina ia auauna atu ma le uunaiga mamana mo le lelei i le faamalolosi o o tatou aiga, la tatou ekalesia, ma o tatou nuu.”¹² I se konafesi aoao lata mai, na saunoa atu ai, Elder D. Todd Christofferson o le Korama a Aposetolo e Toasefululua i tamaitai, “Po o e nofofua pe faaipoipo, pe ua fanau maia se fanau pe leai, pe ua e matua pe talavou pe feoloolo, o lau taitaiga amiotonu e taua.”¹³

E pei ona saunoa Elder Ballard, “E leai se mea i le lalolagi e patino, e tusa lona faafailelega, pe suia ai olaga nai lo le uunaiga a se tamaitai amiotonu.”¹⁴

Ua tatou talanoaina ni nai fesili e faatatau i le perisitua paia a le Atua, ae e mautinoa lava o loo i ai isi [fesili].

Muamua ia Usiusitai, Ona Malamalama ai lea

Ou te faaiu atu i se aafiaga sa fesoasoani ia te au e taulimaina ni fesili e lei taliina. I nai tausaga ua mavae, sa valaaulia au ma lou toalua i se faapotopotoga o le tele o taitai atamamai o le Ekalesia. Sa valaauina talu ai nei se taitai pulefaamalumalu fou, ma i le faaiuga o le fonotaga sa tuuina mai ai se fesili faigata ma faafefinauai. I le iloaina o le faigata o le fesili, sa vave ona ma ofoina atu ma lou toalua se tatalo faamaoni i le Tama Faalelagi mo lenei taitai fou. Ao ia oo mai i le pulelaa e tali atu le fesili, sa ou molimauina se suiga i ona foliga ao ia tu ma le mataina, faalaugatasia ona tauau, ma saunoa atu ma le mana o le Alii.

O lana tali o se mea e faapenei: “Uso, ou te le iloa le tali i lau fesili. Ae o le a ou tau atu ia te oe le mea ou te iloa. Ou te iloa o le Atua o lo tatou Tama Faavavau. Ou te iloa o Iesu Keriso o le Faaola ma le Togiola o le lalolagi. Ou te iloa na vaai Iosefa Samita i le Atua le Tama ma Lona Alo Pele, o Iesu Keriso, ma sa avea ma tufuga aao lea na toefuatai mai ai le mana o le perisitua i le fogaeleele. Ou te iloa e moni le Tusi a Mamona ma o loo i ai le atoaga o le talalelei a Iesu Keriso. Ou te iloa ua i ai sa tatou perofeta soifua i le aso o le o loo saunoa mo le Alii ia faamanuia o tatou olaga. Leai, ou te le iloa le tali i lau fesili, ae o mea nei ou te iloaina. O mea o loo totoe ou te faamoemoe i le faatuatua. Ou te taumafai e ola ai i lenei faamatalaga faigofie o le faatuatua sa ou aoaoina i tausaga ua mavae mai ia Marjorie Hinckley, faletua o Peresitene Gordon B. Hinckley, o le na saunoa mai, ‘Muamua ou te usiusitai, ona ou malamalama ai lea.’”

O le perisitua a le Atua o se talitonuga paia ua tuuina mai e faamanuia ai alii, tamaitai, ma fanau ina ia mafai ona tatou toe foi atu o ni aiga ma nonofo faatasi e faavavau i le afioaga a le Atua. O le ola amiotonu o le agavaa lea mo i tatou taitoatasi e valaaulia ai le mana o le perisitua i o tatou olaga. Faamoemoe o le a to ifo i o outou agaga lenei aoaoga faavae ma atili ai ona tatou latalata atu ia Ia o le Ona le Ekalesia ma le mana ma le pule o le perisitua lenei.

Ata na tusia e Jerry Garns, sei vagana ua faamatalaina; taumatau: ata na tusia e Cody Bell

Taumatau: ata pu’e na saunia e Dan Carter

Taumatau: ata na tusia e Cody Bell