Mata Ou Te Fiafia e Faavasega ia Igoa?
E alala le tusitala i Veracruz, Mekisiko.
Sa ou auai i la matou sini o le siteki e faavasega igoa e 50,000. I le taimi muamua sa faigata. O nisi taimi o vaega ia sa ou sii maia i faaputuga o igoa sa faigata ia tusitusi, ma o nisi taimi sa ou manao e toe faafoi ae sii mai se isi faila. Ae sa ou iloaina afai e mafaufau uma tagata faapena, o le a tuu na faaputuga seia oo i le taimi mulimuli. Sa ou vaai faalemafaufau atu i le tele o laina o tagata o loo faatalitali i le lalolagi o agaga, ao ou filifili e faaauau pea ona taumafai e faitau na igoa ma faamaumau i latou e aunoa ma le faia o se mea sese.
Sa ou aoao ia i ai le alofa mo na tagata. Sa ou iloa latou te manaomia moni le fesoasoani, ma e tatou te manaomia foi le fesoasoani mai ia i latou. Sa oo ina ou malamalama atili o le fuafuaga atoatoa a le Tama Faalelagi e manatua ai tagata uma. Pe a tatou mulimuli i uunaiga ma faatonuga a Ona taitai filifilia, o le a tatou molimauina Lona alofa mutimutivale ma lē gata.
Ua avea le faavasegaina o igoa ma se aafiaga matagofie mo au. Ua ou aoao e faataua ma fiafia i le tele o mea e uiga i le talafaasolopito o aiga. Sa ou mauaina foi meaalofa o le faatauaina sili mai lo tatou Alii e ala i le usitaia o se mea faigofie e pei o le auai i le faavasegaina o igoa.