Samuelu

“Ua uunaia pea a’u i le tala i le tama o Samuelu, ma lana tali atu i le valaau a le Atua.” —Peresitene Thomas S. Monson¹

Sa le fanau lou tina, o Hana, ma sa tatalo i le malumalu mo se atalii, ma folafola atu e tuuina atu o ia i le Alii. Sa tali le Alii i ana tatalo; ma sa ia fanaua au. Ao ou laitiiti, sa ia aumaia au i le malumalu e auauna atu ia te Ia. O iina sa tausia ai ma aoao ai au e le faitaulaga o Eli.²

Ao tamaitiiti, sa ou faalogo i se leo o valaau lou igoa i se tasi po. E faatolu ona ou alu atu ia Eli, ae na te le i valaauina au. Sa ia faapea mai o le Alii sa valaau ia te au. Sa ou mulimuli i le fautuaga a Eli ina ua faafa ona ou faalogo i lou igoa ma tali atu, “Fetalai mai ia; aua o loo faalogologo atu lau auauna.”³ Sa fetalai mai le Alii ia te au, ma ao ou tuputupu ae, sa faatasi o Ia ia te au. Sa ia valaauina au e avea ma Ana perofeta.

Ina ua ou matua, sa ou tofia ou atalii e fai ma faamasino i Isaraelu.Sa le amiotonu ou atalii, o lea sa talosaga ai toeaiina o Isaraelu mo se tupu. Sa ou lapataia tagata i tulaga lamatia o le i ai o se tupu, ae sa faaauau pea i o latou talosaga. Sa poloaiina au e le Alii e tatau ona ou “usitai i a latou upu.”⁴

Sa auina mai ia te au e le Alii ia Saulo—“o le taulealea aulelei”⁵—ma ou faauuina o ia e avea ma “pule i [le] nuu o Isaraelu.”⁶ Sa avea o ia ma o latou tupu. Ae peitai, ina ua poloaiina e le Alii Saulo e faaumatia sa Amaleka ma mea uma ua ia i latou, sa ia le usiusitai. Sa ia faasaoina manu a sa Amaleka ma ofoina atu o ni taulaga. Sa ou aoaoina Saulo e faapea “o le faalogo e sili lea i le taulaga, ma le usiusitai e sili lea i le ga’o o mamoe poa”⁷

Ona o le le usiusitai o Saulo, sa poloaiina au e le Alii e faauuina se tupu fou mai atalii o Iese. Sa faailoa mai e Iese ona atalii matutua e toafitu, ae e lei filifilia i latou e le Alii.⁸ Sa faaali mai e le Alii ia te au o le uii, o Tavita, e tatau ona avea ma tupu. Masalo o foliga po o le maualuluga, atonu na foliga mai ai ia uso matutua o Tavita e pei o ni tupu o i le lumanai, peitai sa filifilia e le Alii lenei atalii leoleo mamoe talavou e taitaia Lona nuu.⁹

God Appears in a Night Vision to the Boy Prophet Samuel, saunia e Harry Anderson; Israelites Desire a King, saunia e Paul Mann; auiliiliga mai Samuel Instructing Saul, saunia e Ted Henninger; atapue o le scroll saunia e forplayday/iStockphoto/ThinkStock