Sa Tali le Perofeta i Lau Tatalo
Derrick Fields, Misuri, ISA
I le faaiuga o lou tausaga lona lua, sa ou talosaga ai i le polokalama o le faia o mamanu faakalafi i lau iunivesite. Sa lei taliaina au, ae sa ou agavaa e toe talosaga i le tausaga e sosoo ai. Sa ou le fiafia e faatalitali mo le isi tausaga e faauu ai.
O le mea e sili ona latalata i la’u matata o le pueata. O lea sa ou tatalo ai e uiga i le suia o lau matata ma sa lelei le lagona e uiga i ai. Sa na o lou manao lava ia maua lau faailoga!
I le amataga o le semesa o le tautoulu, sa i ai au vasega i ata tifaga ma le talafaasolopito faaleagafesootai i le pueina o ata. Sa ou fiafia i [vasega] uma e lua. Ae ao ou tilotilo atu i le polokalama o lau vasega o ata tifaga, sa ou matauina le manaomia e tamaiti aoga o le matamata i le tele o ata mo tagata matutua. I lau vasega o le pueina o ata, sa taua ai e le faiaoga o ata o le a matou suesueina o le faatupu vevesi, atuatuvale, ma feusuaiga. Sa ia fai mai o le tele lena o le uiga o le pueina o ata i nei aso.
Sa ou matua faanoanoa tele ao ou fuafuaina le mea e fai. Sa ou iloa e le aoaoina e le talalelei ia ituaiga o mea, ae e manaomia nei vasega. Sa ou mafaufau i le mau e uiga i le i ai i le lalolagi ae le ni o o le lalolagi (tagai Ioane 15:19). E mafai ea ona ou i ai i nei vasega ae le ni o o le vasega?
Sa ou tatalo ia iloa le mea e fai ma ia maua le faatuatua e faia ai le mea sao. Sa ou fefautuaai foi ma lou toalua, matua, ma lou uso. Ao ou talanoa i lou uso, sa ia faamanatu mai ia te au le fuaiupu lenei: “Aua se a le aoga i le tagata pe afai na te maua le lalolagi uma, a e maumau lona ola? se a foi se mea e avatu e le tagata e togiola a’i lona ola?” Mataio 16:26).
Sa ou iloa e taua le aoga, ae pe sa sese kosi suesueina? E mafai faapefea ona ou alu ese le tumau mai le aoga, ao lea ua matua latalata mai lava le mauaina o le faailoga o le kolisi?
I le leva o le po i se tasi po ao ou ala faatasi ma lo ma pepe na ma’i, sa oo mai se manatu ia te au e sue Peresitene Thomas S. Monson i le Initoneti. E lei umi ae ou matamata i se lauga o le konafesi aoao na tuuina mai e Peresitene Monson ia Oketopa 2011. Sa ou faalogo ma le totoa ao ia talanoa e uiga i le faaitiitia o mea mama ua taliaina e le lalolagi, ma saunoa mai o amioga le talafeagai ma le mama ua oo ina taliaina e le toatele.
Ona ia saunoa mai lea i le mea tonu na manaomia ona ou faalogo i ai: “E tatau ona tatou faaeteete i se lalolagi ua mamao ese lava mai mea faaleagaga. E taua lo tatou teenaina o soo se mea e le ogatusa ma o tatou tulaga faatonuina, teena i le faagasologa ina ia lafoaia ai le mea e sili ona tatou manaomia: o le ola e faavavau i le malo o le Atua.”1
O nei upu sa uunaia malosi au faatasi ma le mana tele. Ao tafe ifo loimata i ou mata, sa ou iloa sa tali mai e se perofeta soifua lau tatalo.
E ui lava ina ua ou tolopoina au fuafuaga mo le faauuga, ou te iloa o le a faamanuia e le Alii lou aiga ma au ao matou mulimuli i le perofeta, teena le manatu o le lalolagi, usiusitai i poloaiga, ma lagolagoina tulaga faatonuina o le talalelei.