O Se Faamanuiaga Mo Lou Uso
E alala le tusitala i Chihuahua, Mekisiko.
Ata na tusia e David Habben
Sa ou aoao e uiga i le mana ma faamanuiaga o le perisitua i se taimi faanoanoa. I ni nai tausaga ua mavae, ao 14 tausaga o lou uso laitiiti, sa lavea lana pasika ma gaulele ai le afa o lona vae. Na valaau mai lou tama ma tau mai ia te au o loo latou aveina o ia i le falemai. Sa i ai se lagona le lelei i lou manava ao ou alu atu faatopetope i le falemai. Ina ua ou taunuu atu iina, sa ou vaaia se tasi o tama o lo matou aiga. Sa ia tau maia ia te au le tuga tele o le faalavelave.
O le fefe i le mea o le a ou vaai i ai, sa ou tatalaina le faitotoa i le mea lea sa i ai lou uso ma laa atu i totonu o le potu. Sa ou laa tasi atu, moeiini ou mata, ma faafuasei lava ona maua le filemu. E pei lava foi ona le galo ia te au le lagona le lelei lea sa ou lagonaina, o le a le galo foi ia te au le lagona o le filemu ma le mafanafana lea na lofituina ai au. Sa ou iloaina le lagona—o le lagona o le Agaga.
Ona ou faalogoina lea o le talanoa a lou tama. Sa la tuuina atu ma le tama o lo matou aiga se faamanuiaga faaleperisitua i lou uso. Sa ia faamanuiaina ma le agamaulalo lona atalii i le suafa o Iesu Keriso ina ia manuia, ia faamaloloina, ina ia toe lelei lona vae.
Ina ua maea le faamanuiaga, sa filemu tagata uma mo sina taimi. Sa ou iloa i lena taimi e tatau ona ou ola agavaa ina ia maua le Perisitua Mekisateko ma ia mafai ai ona faia faamanuiaga mo lau fanau o i le lumanai.
Ina ua matou potopoto i le potu tele i fafo atu o le potu o lou uso, na amata ona talanoaina e ou matua le mea e tatau ona la faia. Sa la fesiligia pe tatau ona tuua Mekisiko ma ave o ia i se fomai i le Iunaite Setete pe fai le taotoga iinei. Po o le a lava se filifiliga na la lagona e sili ona lelei mo lou uso, sa ou iloa ua uma ona ia maua le tausiga sili e mafai ona ia mauaina. Ua ia mauaina se faamanuiaga e ala mai i alii se toalua o umiaina le perisitua, o lea la po o le a lava le mea e filifili i ai ou matua, o le a manuia lou uso.
Sa la filifili e nonofo i Mekisiko mo le taotoga. Sa tuuina e fomai i totonu o le vae a lou uso se uamea ma ni fao sikulu e 10. Na manuia lelei, ma i ni nai masina mulimuli ane sa ia auai atu i se au soka. Na taunuu le faamanuiaga e pei lava ona tau mai e lou tama.
Ou te iloa o le perisitua o le mana ma le pule a le Atua ua tuuina atu i alii. O se meaalofa maoae lea ua Ia tuuina mai ia i tatou.
Lesona i Aso Sa
Autu o le Masina Lenei: Perisitua ma Ki o le Perisitua