O ALA O FAASALALAUGA E TAUA
E alala le tusitala i Iuta, ISA.
O ala uma o faasalalauga e te faaaogaina e i ai sona aafiaga ia te oe. Pe o lau filifiliga o ala o faasalalauga e faagaeetia, i ai se faamoemoega, ma e musuia?
Ina ua aumai Tanielu, Satakara, Mesako, ma Apeteniko i le faamasinoga a le Tupu o Nepukanesa, sa faatonuina i latou e aai i meaai a le tupu ma feinu i uaina a le tupu. Ae sa latou filifili e aai i fua o laau (o se meaai e gaosi mai le saito) ma inuina le vai. Ina ua mavae aso e 10, “ua sili ona lalelei o latou mata mona tino lelei i tama uma e na aai i mea taumafa a le tupu. … [Ma] ua foaiina e le Atua ia te i latou le faautauta ma le atamai: a o Tanielu ua poto ia i faaaliga uma lava ma miti” (Tanielu 1:15, 17).
E ui lava e masani ona tatou faaaogaina lenei tala e faaali ai mataupu faavae taua e uiga i le Upu o le Poto ma meaai tatou te faaaogaina moni, e aoaoina isi mataupu faavae e uiga i faatusatusaga o mea tatou te faaaogaina. E aofia ai ala o faasalalauga o tatou faaaogaina mo faafiafiaga—soo se mea mai faatufugaga, tusi, siva, ma musika i masini omiomi ma ala o faasalalauga faaleagafesootai. E pei lava ona faia e Tanielu ma ana uo se faaiuga atamai e aloese mai meaai e tele, meaai mamafa o le a latou le maua ai le malosi latou te manaomia—ma e ono taitaieseina ai i latou mai a latou aoaoga i le maota o le tupu—o lea e tatau ai ona tatou iloatino i le filifilia o faafiafiaga lelei (tagai MF&F 25:10).
O fautuaga nei e mafai ona fesoasoani ia i tatou e filifili ai faafiafiaga e aoga mo lo tatou taimi taua i lenei olaga faataitai.
Aloese mai Manatu-Māmā
Tatou te liliu atu i faafiafiaga mo se toomaga mai popolega o aso taitasi. E mafai ona avea o se taimi e malolo ai ma faasoa le ata ma talanoaga lelei ma aiga ma uo.1 O le malosi faafouina ua tatou lagonaina mai nei gaoioiga e sau mai le uunaiga a le Agaga Paia, o ona fua o le “alofa, olioli, filemu, onosai, mataalofa, agalelei, faamaoni, agamalu, [ma] le le gaoiā” (Kalatia 5:22–23). Ina ia mafai ona lagona le toe faafouina pe a maea a tatou mea faafiafia, e tatau ona tatou filifili ia faafiafiaga tatou te avanoa ai mo musumusuga ma le mana faamalolo o le Agaga Paia.
Ina ia aloese mai le aveesea o le mafutaga a le Agaga Paia ma le faaleagaina o tatou agaga, ua fautuaina i tatou ia aua nei “faatasi atu, matamata, pe auai foi i soo se mea inosia, le mama, faatupu vevesi, pe faaponokalafi i soo se itu.”2 Ae o nisi taimi o faasalalauga e foliga ua faaleaogaina ai le anotusi le mama e mafai ona faatamaia e ala i le faalavelave mai ia i tatou mai lo tatou faamoemoega o le olaga.
E ui e mafai e faafiafiaga lelei ona fesoasoani ia i tatou ia lagona le fiafia, o isi tulaga o faafiafiaga e mafai ona taitaia i tatou ia manatu mama. I le Mataupu Faavae ma Feagaiga ua poloaiina i tatou e le Alii: “Ia taofi mai ia outou upu faatauvaa uma, mai toega uma, mai o outou manao tuinanau uma, [ma] ma lo outou faamaualuga ma manatu-māmā uma” (88:121). O nisi o faafiafiaga e aveesea i tatou mai le faamoemoega o le ata o le faaolataga e ala i le faatumuina o tatou mafaufau i mea ua faamatalaina e Elder Dallin H. Oaks o le Korama a Aposetolo e Toasefululua o mafaufauga le aoga ma mea e le taua.3 O na faafiafiaga manatu-mama e mafai ona vave pu’ea tatou ma avea “le le faaaloalo fuafuaina e faaletaua ai le paia ma e sili ona leaga ai le manatu mama i mea paia ma upu masoa.”4
Avea ma se Sui Malosi
E ui lava e mafai ona faigofie atu le faatagaina o faafiafiaga tatou te faalogologo i ai, matamata i ai, ma faitau i ai e ulufale i o tatou loto ma mafaufau e aunoa ma le mafaufauina, o se vaega taua o le olaga o le aoao pe faapefea ona avea ma sui—ia aoao “e fai mo i [tatou lava] ae le faamalosia” (2 Nifae 2:26). O se vaega o le avea ma sui moni o le faautauta lea e uiga i faafiafiaga e te faaaogaina.
Nai lo le faaaogaina o ala o faasalalauga mo faafiafiaga ma le le manatu i ai, e tatau ona tatou mataala i le aofaiga o taimi o tatou faaaluina i ai ma o a savali e—e iloa gofie po o natia—o auina mai. Ua faamalamalama mai e Ryan Holmes, faatonu o Vaega o Masini Faasalalau i le Iunivesite o Polika Iaga, faapea e tatau ona tatou “faaaoga tatau le tekinolosi” ma iloilo ma le faaeteete “ona taunuuga uma.”5 Ua fai mai Amy Petersen Jensen, faauluulu o le matagaluega o Theatre ma Media Arts i le Iunivesite o Polika Iaga, e taua le “filifili e auai i talanoaga o ala o faasalalauga aoga ma aloese mai faaaoga o ala o faasalalauga le aoga.”6
Faaaoga ma le Atamai le Taimi
O se vaega o le avea ma se sui o le mataala lea i le aofaiga o le taimi o tatou faaaluina i faafiafiaga. Ona o le tele o mea e filifili mai ai, e faigofie ona maileia i le foloina “po o a lava mea e oo mai ia te oe e ala mai i le tesi, imeli, fafagaina o faamatalaga, faagasologa, ma faalauiloaga o faamatalaga fou”7 Ae pe a tatou faia, tatou te faamaumauina ia “aso o lo [tatou] vaavaaiga” (2 Nifae 9:27) i gaoioiga faamaumau taimi ia e le fesoasoani ia i tatou ina ia malosi atili ai, atamai atili, avea atili ma sui agaalofa a Iesu Keriso.
Nai lo le faamaumauina o le afiafi atoa i se vitio fou tautaua, ata lauiloa fou o le tv, po o le faafouina o faaleagafesootai, e mafai ona tatou naunau e faatulaga taimi e fiafia ai i faafiafiaga anoa ia faafouina i tatou. Ua faapea mai Brother Holmes, “Ia faia se filifiliga atamai. Filifili oe po o le a, o afea, ma pe faapefea ona e faaaoga ala o faasalalauga faatekinolosi.”8
Filifili Ala o Faasalalauga e Faagaeetia
O le isi vaega taua o le filifilia ma le faaeteete o a tatou faafiafiaga o le silafia lea o savali o loo auina mai e ala o faasalalauga.
O tulaga uma o faafiafiaga e fesootai mai se mea, pe o ana savali e faamoemoeina pe leai. Ao latou fiafia i se ata tifaga po o se tusi, mo se faataitaiga, fesili ia te oe lava po o a ni savali e fesootai mai ia te oe e ala i ona faatusa, mataitusi, upu, ma ata. O a ni ona mea taua? O a amioga e na te fautuaina? O le mea e aupito sili ona taua, mata na te fesoasoani ia te oe e mafaufau i ai ma faamamalu Iesu Keriso? Mata e fesoasoani ia te oe ia malamalama i Lona tulaga paia? Mata e aoao oe i se mea e uiga i le taulaga? e uiga i le alofa? e uiga i le manatu faapito? Mata o tau maia se mea e uiga i le taua o aiga po o le paia o le faaipoipoga? Afai e le mafai ona e maua ni upumoni e faatatau i le talalelei mai le savali o lau faafiafiaga, e le o taua ma aoga ai lou taimi.
Atonu o le faaosoosoina nisi e fai mai, “Ua na o se faafiafiaga—e le o le aoga po o le lotu. Ou te le manaomia le aoaoina mai ai o se mea.” Ae pe o e iloaina pe leai, “po o le a lava se mea o e faitauina, faalogo i ai, pe matamata i ai e i ai sona aafiaga ia te oe.”9
Pe a gauai atu o tatou mafaufau ma loto i le iloiloina o ala o faasalalauga o tatou faaaogaina, ua tatou maua ni taimi o faaataataga. E taua e Polofesa Jensen nei taimi o se “talanoaga”: “o se fefaasoaai o manatu—o se fefaasoaaiga po o le talanoa mai ma talanoa atu ao tatou faalogo ma tali atu. O talanoaga sili tatou te faia e masani lava o taimi tatou te salamo ai faalilolilo, aua e tele lava o le taimi o talanoaga lea e suia ai o tatou mafaufau, saili se ala fou, pe filifili ina ia lelei atili. O suiga ia tatou te faia i o tatou agaga i vaitaimi ia e masani lava e itiiti, faatauvaa, faateleina, toafimalie, ma aoga.”10
Tatou te saili atu i “nisi mea e mama, matagofie, pe logoleleia pe tauleleia”—e oo lava i o tatou taimi paganoa (Mataupu Faavae o le Faatuatua 1:13). I le avea ai ma sui o Iesu Keriso e tatau ona tatou tausisi “o mea uma e [tatou te] faitau pe [matamata i ai] … aoao se mea lelei pe atiae se mea lelei ia i [tatou lava] po o [o tatou aiga].” O tatou fegalegaleaiga ma faafiafiaga e tatau ona avea ma ni “uiga faamomoeina ma paia … lea e [fesoasoani ia i tatou] ia maua ma faasoa le vaai mamao a lo tatou Tama Faalelagi.”11
Ua tatou iloa e faagaeetia i tatou i na faafiafiaga o ituaiga amio mama, matagofie, ma tauleleia—o ala o faasalalauga e taua—, e saunia ai i tatou mo faigata o le olaga, ma faamalosia ai lo tatou avea ai ma soo.
Ata na tusia e Cienpies Design/Shutterstock