O La’u Tusi sa tuu i le Maa Faamanatu

Marianne Chaplin Stovall, Kalefonia, ISA

I le aluga o le tau mafanafana o le 2003, sa ou i ai i Michigan, ISA, e sailia se tuaa e suafa ia Ropati Hall. I le faaiuga o la’u malaga, sa ou toe asia se fanuatanu sa ou i ai muamua i le 20 tausaga talu ai.

Ina ua ou asia le fanuatanu i le taimi muamua, sa ou matauina ni fualaau i se tasi o maa faamanatu o loo i ai le faaiu Hall. O le taimi lenei sa ou tusia ai se tusi, tusi ai ma le aso, ma faapalasitika ina ia puipuia ai mai le tau. Ona ou tuua lea o le tusi ma le agaga tatalo i le maa faamanatu, ma le faamoemoe o le a maua e se tasi o le a mafai ona fesoasoani mai ia te au e aoao atili e uiga ia Ropati Hall. Sa ou toe foi i le aiga i Kalefonia ma le faamoemoe ae le talitonu tele o le a i ai se mea o le a tupu mai lenei tusi.

Sa ou tuua le tusi ma le agaga tatalo i le maa faamanatu, ma le faamoemoe o le a maua e se tasi o le a mafai ona fesoasoani mai ia te au e aoao atili e uiga ia Ropati Hall.

O le vaiaso mulimuli ane, sa ou maua ai se tusi mai se tausoga mamao e igoa ia Deke Bentley.

“O ananafi sa ou maua ai se aafiaga uiga ese,” na ia tusia. “I le 3:00 p.m. Sa ou alu e faatau mai ni sitoloperi ae ou filifili loa e tu i le Fanuatanu o le Auala Valevalenoa e siaki tuugamau a ou tuaa. Ou te le i alu ai iina mo ni nai tausaga. I autafa o tuugamau sa i ai lau kata.”

Sa alu Deke i le fanuatanu i le aso lava na ou tuua ai le tusi. Sa ou valaau loa ia te ia i le taimi lena. I le aluga o la ma talanoaga, sa ou iloa ai e nofo o ia i Hillsdale, e silia ma le 50 maila (80 km) mai le fanuatanu.

I nai masina mulimuli ane, sa ou toe foi ma le naunautai i Michigan e asiasi ia Deke. Na ia tau mai ia te au sa i ai tagata o lona aiga o loo tanuina i le fanuatanu e feagai tonu lava ma lona fale, ma sa ia fesili mai pe ou te fia alu ai iina. Sa ia tau mai ia te au e i ai i le fanuatanu ni maa faamanatu se fa o le au Halls, e toalua e na te le iloa se mea e uiga i ai.

Sa faasino mai e Deke ia te au ia maa faamanatu. O [maa faamanatu] e lua e na te le iloa se mea e uiga i ai, o Matini ma Anna Hall e ona. Ou te le i aumaia au faamaumauga, ae sa ou manatua manino le sailia o se Matini Hall.

Sa ma faanatinati loa i le falefaamasino a le itumalo i le itula ao lei tapunia, ma le faamoemoe i se faamaumauga o le oti o le a faailoa mai ai matua a Matini. Sa i ai lava! O le tama o Matini o Ropati Hall! Sa faamautinoa mai e le Agaga Paia ia te au o lau sailiiliga umi ua faaiuina.

O Deke, e le o se tagata o le Ekalesia, sa ia faapea mai, o le mauaina o Ropati Hall na foliga mai “e toetoe lava a faaleagaga.” Sa ou ataata, ma le iloaina o le Agaga sa taitaiina au.

“Atonu sa e faanoanoa e te lei tuua lau tusi i le 20 tausaga talu ai,” o le tala lea a Deke, “o le mea moni sa ou siitia mai i Hillsdale i le tolu tausaga talu ai!”

O lenei aafiaga sa avea o se lesona ia te au faapea e moni lava o le talafaasolopito o aiga o se vaega o le galuega a le Atua ma e Na te taitaia i tatou i a tatou taumafaiga amiotonu.