Maofa i le Alofa o Iesu Mo Au

Saunia e Cesar Lima Escalante

E alala le tusitala i le Aai o Mekisiko, Mekisiko.

I se tasi o Aso Sa ao lei faia le sauniga faamanatuga, sa sau le epikopo ia te au ma fesili mai, “E mafai ona e fesoasoani e faamanuia le faamanatuga?” Sa ou fai atu ioe e mafai ona ou faia.

Sa ou alu ma aumai lau tusipese ma fufulu ou lima ae ou te lei nofo i lou nofoaga i le laulau faamanatuga. Sa ou tatalaina le tusipese, ma o le viiga muamua sa ou vaaia o le “Ou Te Tu Ma Ofo” (Viiga, nu. 107). E lei amataina le sauniga i lena taimi, o lea na amata ai ona ou faitauina le laina muamua: “Ou te tu ma ofo i le alofa o Iesu.” Na vave ona faatumulia lou loto i se lagona o le alofa loloto.

O le po na tea sa ou faitau ai i le Tusi Paia e uiga i taimi mulimuli o le soifuaga o Iesu Keriso—o vaega e aofia ai le Talisuaga Mulimuli, le Faatoaga o Ketesemane, ma Lona Maliu ma le Toetu. Sa ou vaai faalemafaufau i le faatigaina, sauaina, ma tauemuina e i latou na faasatauroina o ia. Sa ou vaai faalemafaufau foi o faataunuuina e Iesu Lana taulaga togiola i le Faatoaga o Ketesemane ao momoe Ona soo.

Sa ou iloaina o lea o le a ou faamanuiaina le falaoa ma le vai ua suitulaga i Lona tino ma le toto. O le faamanatuga e faataga ai i tatou ia faafou le feagaiga sa tatou osia ina ua tatou papatiso, lea ia manatua ai pea o Ia, ia tausi i Ana poloaiga, ma tauave i o tatou luga Lona suafa.

Ina ua amata le sauniga faamanatuga, sa i ai i lou mafaufau nei manatu uma. Sa ou matua lagona le faagaeetia faapea sa puapuagatia Iesu i se auala tiga ma ofoofogia e le oo i ai lo tatou malamalama. Ona oo mai lea o se manatu ia te au faapea sa Ia onosaia mafatiaga ona o Lona alofa mo i tatou—mo au.

Sa ou lagonaina le alofagia e le Alii sa le mafai ai ona taofi ou loimata. Sa ou lagona e pei ou te le agavaa i le mea sa faia e le Faaola mo au. Ae sa ou lagona foi e atoatoa Lona alofa mo au. O le a tuuina atu e se uo lona ola e sui a’i ana uo (tagai Ioane 15:13). Ina ua amata le pese faamanatuga, sa ou tu faatasi ma se tasi o uso e amata le sauniga.

Sa ma gagaua i tua le ie laulau matagofie lanu paepae lea sa ufiina le falaoa. Ao ou uuina le falaoa, sa ou iloa sa i ai lou tiutetauave i le tofitofiina e avea o se vaega o le sauniga, ae sa ou musu. O le falaoa e suitulaga i le tino o Keriso. Sa ou mafaufau i fitafita na faatiga i le Alii, ma sa ou le manao e tofitofi le falaoa. Ina ua ou tofiina le vaega muamua, sa ou mafaufau i auala tiga ma maasiasi sa feagai ai ma Iesu ao lei maliu o Ia—le pale tuitui, le sasaina, le mafatiaga. Sa faaauau pea ona tafe ifo i lalo i ou alafau ou loimata ao ou saunia le falaoa.

Ona oo mai lea o se manatu ia te au faapea o nei mea tiga ma le maasiasi na tutupu na manaomia. O se vaega i latou o le taulaga togiola a Iesu Keriso, ma sa Ia faia le taulaga ona o Lona alofa mo au ma i tatou taitoatasi.

Sa amata ona ou lagonaina se olioli ma se filemu maoae. Sa ou tofitofia ma le faaeteete ma le lemu vaega uma o le falaoa, ma le iloaina o mea o loo ou uuina i lou lima o le a faamanuia ma faapaiaina mo se faamoemoega faapitoa ma suitulaga mo se mea e pele, matagofie, ma tulagaese. Sa ou lagona le tiutetauave maoae o le faia o lenei sauniga ina ia mafai e i latou o i le sauniga ona faafou a latou feagaiga ma le Alii ma maua le faamanuiaga o le Togiola.

Ina ua maea le ma [galuega], sa ou vaaia le faatumulia o fata i falaoa sa tofitofiina. Sa matagofie ma paia le vaaiga. Sa fai e lau soa le tatalo. O le taimi muamua lea sa manino ai lou malamalama i le fuaitau “ina ia latou taumamafa i le faamanatuina o le tino o lou Alo” (MF&F 20:77).

Ina ua ou ai i le falaoa, sa ou toe lagonaina le alofa o lou Faaola. Sa ou lagona le puipuia, faalotomaualaloina, ma naunau e faia le mea sao. Sa ou manao e iloilo lou olaga ma salamo mai mea sese uma sa ou faia.

Ou te faafetai ia Iesu Keriso mo Lona alofa mo au. Ou te faafetai ua mafai ona tatou maua faamanuiaga o Lona Togiola: ia faamagaloina mai a tatou agasala ma maua le avanoa e toe foi atu ai i lo tatou Tama Faalelagi.

O Se Aafiaga Mama Faaleagaga

“Mo le faamanatuga ina ia avea ma se aafiaga faaleagaga o le faamamaina i vaiaso taitasi, e manaomia ona tatou saunia i tatou lava a o le’i o mai i le sauniga faamanatuga. Tatou te faia lenei mea e ala i le faataatia ese ma le loto i ai o a tatou galuega o aso taitasi ma mea faafiafia ma lafoai ese manatu ma popolega faalelalolagi. A tatou faia lea mea, ua tatou faaavanoaina o tatou mafaufau ma loto mo le Agaga Paia. …

“A o tatou usuina le viiga o le faamanatuga, ia auai i le tatalo o le faamanatuga, ma taumamafa i faatusa o Lona tino ma le toto, tatou te saili atu ma le agaga tatalo le faamagaloga mo a tatou agasala ma lē atoatoa. Tatou te mafaufau i folafolaga sa tatou faia ma tausia i le vaiaso ua tuanai ma faia ni tautinoga patino faaletagata e mulimuli i le Faaola i le vaiaso a sau.”

Elder Robert D. Hales o Le Korama a Aposetolo e Toasefululua, “O Le Manatuaina Pe O Ai i Tatou: O Le Faamanatuga, o le Malumalu, ma le Ositaulaga e Ala i le Auauna Atu,” Liahona, Me 2012, 34.