Fesili & Tali
“O le a le mea e tatau ona ou mafaufau i ai i le taimi o le faamanatuga?”
E ui tatou te tutu o ni molimau mo Iesu Keriso i taimi uma, i mea uma, ma i nofoaga uma (tagai Mosaea 18:9), o nisi taimi e tautava mai ai faatosinaga o le lalolagi o siomiaina i tatou mo lo tatou gauai atu. E aumaia ia i tatou e le faamanatuga se avanoa e taulai atu ai o tatou mafaufau i le Faaola e aunoa ma ni mea faalavefau.
O le taimi o le faamanatuga, e mafai ona e mafaufau i le uiga ma le matagofie o le sauniga. O le aai ma feinu i faatusa o le tino ma le toto o le Faaola e mafai ona fesoasoani ia te oe ia toe mafaufau ai i Lana taulaga togiola ma lē iu. Pe a e tagofiaina le faamanatuga, o loo e faafouina lau feagaiga o le papatisoga. Ao e faia lea mea, o le a mafai ona e toe tautino atu o le a manatua pea o Ia ma tausi Ana poloaiga.
E mafai ona e faaleleia ou aafiaga o le faamanatuga e ala i lou saunia o oe lava faaleagaga. I le aluga o le vaiaso, mafaufau e suesue i ni lauga o le konafesi aoao po o fasifuaitau o mau e fesoasoani ia te oe ia taulai atu i le taulaga a le Faaola ma lou lava tulaga faalesoo. I le taimi o le viiga ma tatalo o le faamanatuga, taulai atu i upu o e usuina ma faalogoina, ma mafaufau i o latou uiga.
O le taimi o le faamanatuga, faaaoga se taimi e mafaufau ai i suiga o e faia i lou olaga faaletagata lava ia ina ia avea atili ai faapei o Iesu Keriso. A maea ona tagofia ma le agavaa le faamanatuga, o le a mafai ona e lagonaina le mama ma le mama a’ia’i, e pei lava ona e lagonaina i le aso o lou papatisoga.
Liliu Atu Ou Mafaufauga i le Togiola
O le taimi o le faamanatuga, na liliu atu ou mafaufauga ia Iesu Keriso ma Lana Togiola. O le faigata ia mo au le faaalia o ou lagona i le taimi o le faamanatuga pe a ou manatu e uiga i le Togiola a Iesu Keriso. Ou te iloa o Iesu Keriso na filifilia e avea ma o tatou Togiola. Ou te iloa o loo soifua o Ia.
Nephi B., 20 tausaga, Brazzaville, Ripapelika o Congo
Manatua le Taumafataga Mulimuli
E tatau ona tatou mafaufau e uiga i le taulaga togiola a Iesu Keriso ma le taua o le fetagofi atu ma le agavaa i faatusa o Lona tino ma Lona toto. E mafai foi ona tatou mafaufau e uiga i le taimi na Ia faamanuia ai faatasi ma Ana Aposetolo e Toasefululua le falaoa ma le uaina.
Jonás A., 18 tausaga, Morelos, Mekisiko
Mafaufau ia Iesu Keriso
O le taimi o le faamanatuga ou te mafaufau ai e uiga i le mea na oo i ai le Faaola ina ia mafai ona tatou salamo i mea sese na tatou faia. Ou te mafaufau foi i faamanuiaga uma ua Ia tuuina mai ia te au faapea ma vavega ofoofogia ua Ia faataunuuina ma o le a faataunuuina. Ua matua faamanuiaina i tatou i le mafai ona tagofia o le faamanatuga ina ia mafai ai ona tatou salamo mai a tatou agasala ma tautino atu ina ia lelei atili.
Andee B., 13 tausaga, Iuta, ISA
Mafaufau Loloto i Upu o Viiga o Faamanatuga
E aoao mai e viiga o faamanatuga ia mea e tatau ona tatou mafaufau i ai i le taimi o le faamanatuga. Mo se faataitaiga, o le pese faamanatuga e sili ona ou fiafia i ai, “I Le Lotomaulalo, Faaola e” (Viiga, nu. 95), o loo fai mai, “Nei galo ia au, le Faaola e, na E maliu mo au nei; Ma lou loto sa momomo, i le satauro i Kalevaria.” O le manatuaina o upu o le viiga faamanatuga i le taimi o lenei sauniga paia e fesoasoani lea ia te au ia lagona le filemu ma faateleina lou lotofaafetai mo le Togiola a Iesu Keriso.
Austin B., 15 tausaga, Alberta, Kanata
Avatu ia Faafetai mo Faamanuiaga
O le taimi o le faamanatuga e tatau ai ona tatou mafaufau e uiga i le maoae o le taulaga na faia e lo tatou Faaola mo i tatou ma ia tumu o tatou loto i le agaga faafetai. Pe a ou tago atu i le faamanatuga, ou te fia faafetai i le Tama Faalelagi ma Lona Alo Pele, o Iesu Keriso, mo faamanuiaga ua ou maua.
Elen S., 16 tausaga, Paraíba, Pasila
Taofi Lou Mafaufau mai le Fealualuaisolo
E i ai sau tamai kata e teuina i totonu o au tusitusiga paia lea ou te tosoina mai i fafo i Aso Sa uma i le taimi o le faamanatuga. O loo faailoga ai le Mosaea 18, lea o tauina mai ai e Alema feagaiga o le papatisoga. O loo i ai i le kata ni tamai faamatalaga, e pei o le “Ia lotofaafetai mo le Togiola,” o tusia ai i luga e fesoasoani ia te au ia manatua le faamoemoega ma le paia o le faamanatuga. O le toe iloiloina o faamatalaga o le a fesoasoani ia te au ia tausia lou mafaufau e taulai atu i le faamoemoega ma le paia o le faamanatuga.
Alisha M., 19 tausaga, Texas, ISA
Manatua ma Iloa
O le faamoemoega o le faamanatuga o le toe faafouina lea o a tatou feagaiga ma lo tatou Tama Faalelagi ma ia faamamaina mai agasala ua uma ona tatou salamo ai. O le taimi o le faamanatuga, tatou te manatua ai le taulaga a Keriso mo i tatou ma mafaufau loloto ai i le ala o tatou faaaogaina ai i o tatou olaga. Ou te taumafai e mafaufau i mea sa ou faia i le vaiaso ua tea ma le auala na ou tausia ai au feagaiga ma lou Tama. Na ou iloaina agasala sa ou faia ma taulai atu i le auala e mafai ai ona ou faaaogaina le Togiola e foia ai i latou. A ou faia lenei mea, e avea le faamanatuga ma se aafiaga malosi musuia ma faaleagaga.
Abagail P., 14 tausaga, Arisona, ISA
Toe Manatunatu i Au Feagaiga
Ao ou laitiiti, e na o le pau lava le mea sa ou mafaufau i ai i le taimi o le faamanatuga pe faapefea ona ou filemu. I lou umia ai nei o le perisitua, ua ou malamalama ai o le mauaina o se uiga o le faamanatuga ma ia fesoasoani ia te au i lou tuputupu ae faaleagaga, e tatau ona ou manatunatu i ai i le taimi ao faia ai. Ou te mafaufau e uiga i le Togiola a le Faaola ma le auala na Ia faaalia ai le alofa mo i tatou. Ou te mafaufau foi i le auala e mafai ai e le tagofia o le faamanatuga ona faamalosia ai lou faatuatua ma manaoga e faataunuu lau feagaiga o le papatisoga.
Levi F., 19 tausaga, Abia, Nigeria