O Le Tamai Mamoe Migao
“Ou te tuuina atu ia te outou le manuia, o lo’u manuia ou te avatu ai ia te outou” (Ioane 14:27).
Pe tusa ma le fitu o ou tausaga, na manao ai lou peresitene o le Peraimeri e fesoasoani i tamaiti ina ia migao atili i la matou Peraimeri. Sa ia faia se laupapa puletini lapoa e foliga pei o se mamoe. Soo se taimi lava e migao ai se tamaitiiti, na te tuuina i luga o le laupapa puletini se sitika e foliga pei o se mamoe i autafa o lona igoa. Sa ou matuai manao lava i se tasi o na sitika mamoe. I se tasi la o aso i le Peraimeri, sa ou nofo filemu ai ma piilima ou lima ma sioa atu i le peresitene o le Peraimeri ina ia ona matauina au o loo migao. Sa nofo i ou luma se tamaitiiti e umi atu, o lea sa ou faasee ai i lalo o le nofoa ina ia ona iloa mai au.
Ao ou nofo ai iina ma migao, na amata ona tataina e le tapiano se pese Peraimeri malie ma malu. Ao ou faalogologo atu i ai, na oo mai i ou luga se lagona toafilemu, ma amata ona tafe mai i lalo loimata i ou alafau. Ou te le iloa pe aisea na ou lagona ai le matuai fiafia lava ma le filemu i totonu.
Ina ua uma le Peraimeri sa ou tauina atu i lou tina ou lagona, ma sa ia tauina mai ia te au o le Agaga. I lena aso, sa ou aoao ai pe faapei le lagonaina o le Agaga. Soo se taimi lava ou te manaomia ai le faia o ni filifiliga taua ma manaomia ai le taitaiga mai le Agaga, ou te manatuaina le filemu lea sa ou lagonaina i lena aso, ma sa ou iloaina le auala o talanoa mai ai le Agaga ia te au.
Ata na tusia e Brad Teare