O Le Valaau ia Faapei o Keriso
Mai se lauga o le faigalotu a le OAE, “Isaraelu, Ua Vala’au Mai le Atua,” na tuuina atu i le Iunivesite o le Setete o Dixie i St. George, Iuta, i le aso 9 o Setema 9, 2012. Mo le lauga atoa, alu i le lds.org/broadcasts.
Ua valaau mai le Atua ia Isaraelu i nei aso e gata ai ia sili atu ona faapei o Keriso, ma ia sili atu ona paia nai lo le taimi nei i lo tatou naunautaiga e ola ai i le talalelei ma faatuina Siona.
I le talafaasolopito o Isaraelu mai i ona taimi ua tuanai, ina ua agasala tele pe na faalelalolagi tele ai le nuu po o le ola ai faatasi ma Nuuese na amata ai ona faaleagaina tulaga faatonuina o le ola mama ma poloaiga na tuuina mai e le Atua, o le a auina atu le fanau o le feagaiga e sosola i le vao e toe amata mai le amataga ma toefaatuina Siona.
I taimi o le Feagaiga Tuai, o Aperaamo, le tama o feagaiga, sa tatau ona solaese ina ia faasaoina mai Kaletia—o Papelonia moni—i lana sailiga mo se olaga faapaiaina i Kanana, lea ua tatou taua nei o le Laueleele Paia (tagai Aperaamo 2:3–4). Ae sa le tele ni tupulaga ao lei leiloa e tupuaga o Aperaamo lo latou Siona ma sa faapologaina i se nuu mamao, o Aikupito (tagai Esoto 1:7–14). O lea ua tatau ai ona tausia Mose ina ia toe taitaia le fanau o le folafolaga i le vao.
E le tele ni seneturi mulimuli ane, lea sa i ai se tala e faapitoa lona manaia ia i tatou na faailoa mai, ina ua poloaiina se tasi o na aiga Isaraelu, e taitaia e se perofeta e igoa ia Liae, e sosola ese mai Ierusalema aua, paga lea ua toe i ai i faitotoa ia Papelonia! (Tagai i le 1 Nifae 2:2.) Ma le leiloa e (Liae ma lona aiga), o le a latou o atu i se konitineta fou e amata ai se mamanu fou o Siona (tagai 1 Nifae 18:22–24). Ma sa latou le iloa foi o lena o ese sa tupu i se vaega a o latou augatama ua taua o sa Iareto (tagai Eteru 6:5–13).
O se fiafiaga ia i latou uma o e faamanatuina le Toefuataiina o le talalelei e faapea o le nofoiaina o Amerika sa amataina e se vaega sa sosola ese mai lo latou atunuu muamua ina ia o latou tapuai i lo latou lava loto. Sa faamatalaina e se tagata maoae o le nuu o Puritan i Amerika lenei aafiaga o le “misiona i le vao” a le faaKerisiano—o le taumafaiga a Isaraelu o nei ona po e faasaoloto i latou lava mai le Lalolagi Tuai o le leai o se atua ma toe saili auala o le lagi i se laueleele fou.1
Ou te faamanatu atu ia te oe se tasi o sosolaga ese mulimuli. O lo tatou lava Ekalesia, na taitaia e o tatou lava perofeta, ma taitaiina o tatou lava tuaa faalelotu. O le sauaina o Iosefa Samita i setete o Niu Ioka, Penisilevania, Ohaio, ma Misuri, ma iu ai ina fasiotia i Ilinoi, na tatou vaaia ai le toe faatulagaina o le fanauga a Isaraelu ma toe sailia se nofoaga o le filemu. O Peresitene Polika Iaga (1801–77), o Mose lea i Amerika, e pei ona valaauina ai o ia ma le faaaloalo, sa taitaia le Au Paia i vanu o mauga ao pepese na Au Paia ua vaivai mai le savaliga:
Siona.O le nuu o le folafolaga. O Le Ierusalema Fou. Mo le silia ma le 4,000 tausaga o talafaasolopito o osiga feagaiga, sa avea lenei mea ma mamanu: Sosola ese ma saili. Tamoe ma aumau ai. Sosola ese mai Papelonia. Fausia pa puipui o Siona.
Seia oo i lenei mea, o tatou aso.
Fausia Siona i le Mea o Loo E I Ai
O se tasi o le tele o mea tulaga ese o lo tatou tisipenisione o le suia o le natura o le ala o tatou faatulagaina ai le malo o le Atua i le fogaeleele. O lenei tisipenisione o se taimi o suiga tele o le faatelevaveina. Ma o le mea e tasi lea na suia o le le toe sola ese o le Ekalesia a le Atua. O le a le toe tuua lava Uro ina ia o ese mai Karana ina ia o ese mai Kanana ina ia o ese mai Ierusalema ina ia o ese mai Egelani, ina o ese mai Katelani, ina ia o ese mai Navu, ina ia o i se mea o ai na te silafiaina.
Leai, e pei ona saunoa Polika Iaga mo i tatou uma, “Ua togieseina i tatou mai le falai i totonu o le afi, mai le afi i le ogatotonu o le fola, ma o iina o le a tatou i ai ma o iinei o le a tatou tumau ai.”3
E moni lava, na avea lena faamatalaga ma se faamatalaga mo tagata o le Ekalesia i le lalolagi atoa. I nei aso amuli, i lo tatou tisipenisione, ua lava lo tatou tuputupu ae (o se ekalesia) e taofia ai le tamomoe. Ua lava lo tatou tuputupu ae e tamau ai o tatou vae ma o tatou aiga ma o tatou faavae i atunuu uma, ituaiga, gagana, ma nuu e faavavau. Ua i ai siona i soo se mea—i soo se mea o i ai le Ekalesia. Ma faatasi ai ma lena suiga, tatou te le toe manatu ia Siona o se nofoaga o le a tatou aumau ai; tatou te manatu i ai o se pe faapefea ona tatou aumau ai.
Ina ia otooto atu lenei tiute fou, ou te talanoa atu i ni mea se tolu na tutupu.
O Mea e Tolu na Tutupu ma Lesona e Tolu
1. O nai tausaga talu ai, sa avea ai sau uo talavou—o se faifeautalai ua foi mai le misiona—ma se tasi o le au pasiketipolo i Iuta. O ia o se alii talavou maoae ma se tagata taalo lelei tele, ae sa lei tele sana taalo e pei ona ia faamoemoe i ai. O ona taleni ma tomai patino sa le o se mea na manaomia e lana au po o ia i lena tulaga o le faaleleia. E tupu lena mea i afeleti. O lea, faatasi ai ma le lagolago uma ma le faamalosiau a ona taitai ma tagata o lana au, sa siitia ese atu lau uo talavou i se isi aoga, lea sa ia faamoemoe atonu e na te saofaga atu ai se mea e sili atu.
Sa lelei mea uma mo ia i le aoga fou, ma sa vave ae avea lau uo ma se tagata faaoso. E te iloa le isi mea na tupu—sa i ai i le faatulagaga a le au lenei alii talavou e toe foi e taalo e faasaga i lana au muamua i le Aai o Sate Leki.
O le tulaga sauaina matautia na lafo mai e tagata matamata i lena po i lenei alii talavou—o se tagata faatoa faaipoipo o le e totogi lana sefuluai, auauna atu i le korama a toeaina, tuuina atu auaunaga alofa i talavou a lona nuu, ma o loo faatalitali ma le fiafia mo se pepe fou e oo mai ia te ia ma lona toalua—sa le tatau ona aafia soo se tagata soifua i soo se mea, i soo se taimi, po o le a lava lana taaloga po o le iunivesite po o ana filifiliga patino e uiga i soo se tasi o i latou.
O le taitai o lenei au asiasi, o se tasi iloga i le pasiketipolo, sa liliu atu ia te ia i le maea ai o se taaloga mataina ma faapea atu: “O le a le mea o tupu iinei? O oe o se tama o le nuu ua faamanuiaina. O ou tagata nei. O au uo nei.” Ae o le mea e sili ona leaga ai i na mea uma, sa ia fai ma le le mautonu atoa, “Pe le o le toatele ea o nei tagata o tagata o lau ekalesia?”
2. Sa valaaulia au e lauga i se faigalotu a se siteki o talavou nofofua matutua. Ao ou ulufale atu i le faitotoa pito i tua o le nofoaga autu o le siteki, sa ulufale e tusa ma le taimi lava e tasi se tamaitai talavou i lona 30 tausaga. E oo lava i le toatele o tagata o loo agai atu i le falelotu, sa le faigata ona matauina o ia. Sa ia te ia ni nai pe’a, o ni tautaliga eseese i taliga ma le isu, lauulu e faatutu i luga sa vali i soo se ituaiga o lanu, o se sakete sa pupuu tele, ma se ofutino sa le talafeagai.
Sa oo mai ni fesili i lou mafaufau: Pe o lenei tamaitai ea o se agaga o loo tauivi e le auai i lo tatou faatuatuaga, o le sa taitai mai—pe sili atu, sa aumaia e se tasi—i lenei faigalotu i lalo o le taitaiga a le Alii e fesoasoani ia te ia ia maua le filemu ma le taitaiga o le talalelei e na te manaomia i lona olaga? Po o ia o se tasi o se ua se ese mai nisi o faamoemoega ma tulaga faatonuina ua fautuaina e le Ekalesia mo ona tagata auai, ae o loo fesootai mai pea ma filifili e auai i lenei gaoioiga o le Ekalesia i lena po?
3. Ao auai atu i le faapaiaina o le Malumalu i le Aai o Kansas Misuri, sa ma nonofo ma Sister Holland i le aiga o Brother Isaac Freestone, o se alii leoleo i lana galuega ma se faitaulaga sili i le Siteki o Liperate Misuri. I a matou talatalanoaga sa ia tau mai ia i maua, i le leva o se tasi o afiafi, sa valaauina o ia e suesue se tagi i se vaega patino e le saogalemu o le aai. I le lotolotoi o le musika leotele ma le manogi o maruana i le ea, sa ia maua ai se fafine e toatasi ma nai alii o loo inupia ma tautatala i upu masoa, sa manino le leai o se manatu o i latou uma i tamaiti e toalima—e tusa ma le lua i le valu tausaga le matutua—o faapupuu faatasi i se potu e tasi, ao taumafai e momoe i luga o se foloa palapala e aunoa ma se moega, leai se momi, leai ni aluga, leai ma se mea e tasi.
Sa autilo Brother Freestone i kapoti o le umukuka ma totonu o le pusa aisa pe mafai ona ia maua ai se apa e tasi po o se katuni po o se pusa o soo se ituaiga o meaai—ae sa ia le mauaina se mea. Sa ia faapea mai, sa tele atu meaai a le taifau o loo i ou tuafale nai lo na fanau.
I totonu o le potumoe a le tina, sa ia maua ai se momi e aunoa ma ni ieafu, ma na o le pau lena [o le momi] i totonu o le fale. Sa ia sueina seia ona maua ni ieafu, e tuu i luga o le momi, ma tuu uma i ai tamaiti e toalima i le moega le tumau. Faatasi ai, ma loimata i ona mata, sa ia tootuli ma ofoina atu se tatalo i le Tama Faalelagi mo lo latou puipuiga ma fai atu ia manuia le po.
Ao ia tu i luga ma savali atu i le faitotoa, sa oso mai se tasi o le fanau mai le moega, ma tamoe atu ia te ia, ma tago i lona lima, ma augani atu, “Faamolemole e mafai ona e vaetamaina au?” Ma le faateleina o loimata i ona fofoga, sa toe tuu e Brother Freestone le tamaitiiti i le moega, ma maua le tina o loo onā (ua leva ona sosola ia alii), ma faapea atu ia te ia: “Ou te toe foi mai taeao, ma ia i ai se suiga i totonu o le fale lenei i le taimi ou te savali mai ai i totonu o lenei faitotoa. Ma o le a i ai nisi suiga pe a uma lena mea.Ou te folafola atu ia te oe lena mea.”4
O a mea ua tutusa ai nei mea e tolu na tutupu? Latou te tuuina mai ni faataitaiga e tolu laiti, o mea eseese o le olaga moni o Papelonia—o se tasi o se amioga leaga tele faavalevalea i se taaloga pasiketipolo, o se tasi o luitau i le tulaga patino faaleaganuu ma iloatino ma i latou o e o ese le auala o soifua ai nai lo tatou, ma o se tasi o se faafitauli tele tele ma le ogaoga.
Lesona 1: Aua Lava Nei Tuua Lau Tapuaiga i le Faitotoa
Muamua, ia tatou talanoa e uiga i le mea na tupu i le pasiketipolo. O le aso ina ua maea le taaloga, ina ua i ai ni nai faamasinoga faalauaitele ma se valaau mo se faatoesega i le mea na tupu, na faapea mai se alii talavou, i le faaiuga: “Faalogo. O lea tatou te talanoa e uiga i le pasiketipolo iinei, e le o le Aoga Sa. Afai e te le mafai ona gafatia le tauvalaau (a tagata matamata), ona aua lea ona taalo i se taaloga. Matou te totogiina se tupe tele e matamata ai i nei taaloga. E mafai ona matou amioai i auala e matou te mananao ai. Matou te tuua a tatou tapuaiga i le faitotoa.”
“Matou te tuua a tatou tapuaiga i le faitotoa”? Lesona numera muamua mo le faatuina o Siona i le seneturi lona 21: E te le tuua lau tapuaiga i le faitotoa.
O lena ituaiga o le avea ai ma soo e le tatau ona i ai—e le o se avea ai ma soo. E pei ona aoao mai le perofeta o Alema, e tatou te “tutu o ni molimau a le Atua i taimi uma ma i mea uma, ma i nofoaga uma atonu [tatou] te i ai” (Mosaea 18:9)—e le na o sina taimi, i nai nofoaga, pe ona ua tele ai a le tatou au.
Po o a lava tulaga po o finauga po o se faafitauli, e leai se soo moni o Keriso e mafai ona ia tuua lana tapuaiga i le faitotoa.
Lesona 2: Ia Agaalofa ae Ia Faamaoni i Poloaiga
E taitaiina atu au e lena mea i le tamaitai talavou i le faigalotu. Ae o le a tali atu se tasi ia te ia, o le tulafono faavavau e ao ona atagia ia tatou amioga o tatou talitonuga faalelotu ma o tatou tautinoga faaletalalelei. O le mea lea, o le auala tatou te tali atu ai i soo se tulaga e ao ona faaleleia ai se mea, ae le o le atili ona faaletonu ai. E le mafai ona tatou amio pe tali atu i se auala tatou te lagona ai le tausalaina i se solitulafono e sili atu nai lo, i lenei tulaga, ua i ai o ia.
E le faapea ua tatou le maua ni manatu, tatou te le maua ni tulaga faatonuina, pe i se isi itu ua tatou le amanaiaina atoa poloaiga paia o “poloaiga o mea e ao ona tatou faia” ma “poloaiga o mea e le tatau ona tatou faia.” Ae o lona uiga e tatau ona tatou ola ai i na tulaga faatonuina ma puipuia na poloaiga i se auala amiotonu i lo tatou gafatia sili, le auala na soifua ai ma puipuia ai e le Faaola i latou. Ma sa Ia faia lava mea e tatau ona faia ia sili atu le tulaga—mai i le aoaoina o le upumoni i le faamagaloina o tagata agasala i le faamamaina o le malumalu.
O lea i la tatou uo fou, tatou te amata, aemaise lava, e ala i le manatuaina o ia o se afafine o le Atua ma e faavavau le taua. Tatou te amata i le manatuaina o ia o se afafine a se tasi. Tatou te amata i le agaga faafetai ua i ai o ia i se gaoioiga a le Ekalesia, e le o aloese mai se tasi. O se aotelega, tatou te taumafai i le mea sili i lenei tulaga i se manao e fesoasoani ia te ia ia avea ma tamaitai silisili.
Tatou te tatalo le leoa pea: O le a le mea sao e faia iinei? O le a le mea sao e tau atu? O a mea o le a iu ai ina sili atu ona lelei lenei tulaga ma ia? O le faia o nei fesili ma le taumafai moni e faia le mea e faia e le Faaola ou te manatu o le uiga o Lana fetalaiga ina ua Ia fetalai, “Aua le soona faamasino, a ia faamasino i le faamasinoga tonu” (Ioane 7:24).
E le mafai lava e lenei Ekalesia ona fetuunaia ana aoaoga faavae ina ia fetaui lelei ma faaleagafesootai pe ia taliaina lelei faaupufai po o se isi lava mafuaaga. E na o le puipuiga o upumoni faaalia ua tuuina mai ia i tatou soo se saogalemu lea e siitia ai le isi o e atonu ua lagona le popole pe tuulafoaiina. O lo tatou agaalofa ma lo tatou alofa—o uiga ma mea e manaomia taua mo lo tatou faaKerisianoina—e le tatau lava ona faauigaina o se fetuutuunaiga o poloaiga.
Pe a tatou feagai ai ma na tulaga, e mafai ona matua luitauina ma le mautonu. Atonu e mafai ona fesili tagata talavou, “Ia, tatou te le talitonu e tatau ona tatou ola pe amioai i sea ituaiga auala, ae aisea ua tatou faia ai isi tagata ia faia faapena? E le o i ai so latou filifiliga saoloto? Pe tatou te le o faafiaamiotonu ma faamasino atu, ma faamalosia lo tatou talitonuga i isi, ma poloaiina i latou e faatinoina i se auala faapitoa?”
I na tulaga e tatau ona e faamatalaina ma le faaeteete pe aisea e puipuia ai nisi o mataupu faavae ao nisi o agasala e faatuiese po o fea lava e maua ai aua o mataupu ma tulafono e aofia ai e le na o le faaleagafesootai pe faaupufai ae e faavavau foi lo latou taunuuga. Ma ao tatou moomoo ina ia le faatiga ia i latou o e ese talitonuga mai ia i tatou, ua sili atu lo tatou naunau ia le faatiga i le Atua.
E tai tutusa lava ma se talavou ua faapea mai, “Lea la ua mafai ona ou aveina se taavale, ou te iloa e tatau ona ou tu i se moli lanumumu, ae e tatau moni lava ona tatou faamasino atu ma taumafai e faatutu uma isi tagata i moli lanumumu? E tatau ea ona faia e tagata uma mea ua tatou faia? Pe le o i ai ea i isi lo latou faitalia?E tatau ea ona latou amioai e pei o i tatou?” E tatau la ona e faamatalaina pe aisea, ioe, tatou te faamoemoe ia tutu tagata uma i se moli lanumumu. Ma e tatau ona e faia lenei mea e aunoa ma le faitioina o i latou o e solitulafono pe o e ese talitonuga nai lo mea tatou te talitonu i ai ona, ioe, e i ai lo latou filifiliga saoloto.
O loo i ai se eseesega tele o talitonuga i lenei lalolagi, ma o loo i ai foi le faitalia e filifili ai mo tagata uma, ae e leai ma se tasi e agavaa e fai se mea e pei e le o fetalai mai le Atua i nei mataupu, pe foliga mai foi na o le pau le taimi e taua ai poloaiga pe afai ua malilie i ai tagata lautele. I le seneturi lona 21, e le mafai ona tatou toe sosola ese. O le a tatau ona tau mo tulafono ma tulaga ma siosiomaga e mafai ona faatagaina le saolotoga e auai ai i gaoioiga faalelotu ma lo tatou faamaoniga i ai mai le malo. O se tasi na o auala e mafai ai ona tatou faatagaina le i ai i Papelonia, ae le o ia mea.
Ou te le iloa se tomai e sili atu ona taua ma se amiosao maoae mo i tatou e faaali atu ai i se lalolagi lea e le mafai ona tatou sosola ese mai ai nai lo le savavali i lena ala ma le faaeteete—ma tu mama ai e tusa ma mea na tautino mai e le Atua ma tulafono ua Ia tuuina mai, ae i le faia o lena mea i le agaalofa ma le malamalama ma le alofa mama maoae.
Lesona 3: Faaaoga Tulaga Faatauaina o le Talalelei ina ia Manuia ai Nuu ma Atunuu
O le a le toatele i tatou e avea ma ni leoleo po o sui o le tautua faaleagafesootai po o ni faamasino o loo galulue i tulaga faaletulafono, ae o i tatou uma ua tatau ona tausia le manuia o isi ma le saogalemu lelei o le lautele o tatou nuu. I le talanoa ai e uiga i le manaomia mo i tatou e uunaia le sosaiete i fafo atu o o tatou lava aiga, na saunoa mai ai Elder Quentin L. Cook, o le Korama a Aposetolo e Toasefululua:
“E le gata i le puipuia o o tatou lava aiga, ae e tatau foi ona avea i tatou ma puna o le malamalama e puipuia ai o tatou nuu. Na fetalai mai le Faaola, “Ia faapea ona pupula atu lo outou malamalama i luma o tagata, ina ia latou iloa la outou amiolelei, latou te vivii atu ai i lo outou Tama o i le lagi.’ …
“I lo tatou lalolagi ua matua faateleina le amioletonu, ua tatau ai lava i tulaga faatauaina e faavae i le talitonuga faalelotu ona avea o se vaega o le talanoaga faalauaitele. …
“O le faatuatuaga faalelotu o se punavai o le malamalama, iloa, ma le poto ma e manuia ai le lalolagi i se ala maoae.”5
Afai tatou te le aveina faamanuiaga o le talalelei i o tatou nuu ma atunuu, o le a le lava lava a tatou alii leoleo—o le a le lava lava Isaac Freestones—e faamalosia le amio pulea lelei e tusa lava pe na faamalosia mai. Ma e le o lena. O na fanau o i lena fale e aunoa ma se meaai po o lavalava o ni atalii ma afafine o le Atua. O lena tina, ua sili atu le tausalaina aua o ia e matua atu ma e tatau ona sili atu ona gafataulima [le fanau], o ia foi o se afafine foi o le Atua. O ia tulaga atonu e manaomia ai le alofa malosi i auala aloaia, e oo lava i le faaletulafono, ae e tatau ona tatou taumafai e fesoasoani pe o afea ma o fea tatou te mafaia ai aua tatou te le tuuina a tatou tapuaiga i le faitotoa, e tusa lava pe ua tatou lagonaina o loo faatinoina e isi i ni auala faanoanoa ma lē faamoemoeina.
E leai, e le mafai ona tatou faia mea uma, ae e mafai ona tatou faia se mea. Ma i le tali atu i le valaau a le Atua, o le fanauga a Isaraelu o i latou ia e faia—e le o le sosola ese mai Papelonia i lenei taimi ae ia osofaia. E aunoa ma le manatu mama i ai, e mafai ona tatou ola faalauaitele ma le le faalagolago i la tatou talalelei ua tatou maua uma ai ituaiga o avanoa e fesoasoani ai i aiga, faamanuiaina o tuaoi, ma le puipuia o isi, e aofia ai ma le tupulaga faiae.
Faaali Lou Alofa ia Iesu Keriso
Ua valaaulia le Au Paia o Aso e Gata Ai e avea ma fefete i le paluga, o le masima e le aveesea lona magalo, o le malamalama ua tu i luga o le mauga e le tuu i lalo o le mea e fua ai saito. Ia amata loa ona faia se faataitaiga!
Afai tatou te faia ma talanoa i le mea sao ma aapa atu ma le agalelei i a tatou upu ma a tatou galuega, ma, pe a faapuupuu e le Faaola Lana galuega i le amiotonu, ma fetalai mai ua oo mai le iuga i lenei tisipenisione mulimuli, ma oo mai Lona mamalu, o le a Ia mauaina i tatou o faia le mea sili tatou te mafaia, taumafai e ola ai i le talalelei, ma taumafai e faaleleia atili o tatou olaga, lo tatou Ekalesia, ma lo tatou lalolagi i le auala sili tatou te mafaia.
Pe a Ia afio mai, ou te manao tele ia maua mai o ola ai i le talalelei. Ou te manao ia maofa i le taimi lava o le faatinoina o le faasalalauina o le faatuatua ma le faia o se mea lelei. Ou te manao ia fetalai mai le Faaola ia te au: “Jeffrey, ou te iloaina oe e le ona o lou faalagiga ae ona o lou olaga, o le auala o e taumafai e ola ai ma tulaga faatonuina ua e taumafai e puipuia. Ou te vaaia le faamaoni o lou loto. Ou te iloa sa e taumafai e faalelei muamua ni mea ma i le taulamua ai i le avea atili ai o oe lava ma e ala i le folafolaina o lau upu ma le puipuia o lau talalelei i isi i se auala sili ona agaalofa e te mafaia.”
O le a Ia faaopoopo moni lava: “Ou te iloa sa e le manuia i taimi uma i au lava agasala ma tulaga o isi, ae ou te talitonu sa e taumafai faamaoni. Ou te talitonu i totonu o lou loto, e te alofa faamaoni ia te au.”
Ou te manao e i ai se mea e pei o lena feiloaiga i se aso aua e sili atu lou manao i ai nai lo seisi mea i lenei olaga faaletino. Ma ou te manao i ai mo oe. Ou te manao i ai mo i tatou uma. “Isaraelu, Ua Valaau Mai le Atua”6—ua valaau mai ia i tatou ia ola patino i le talalelei a Iesu Keriso i auala laiti ma auala e tele, ia aapa atu ia i latou o e atonu e le foliga pe laei pe amioai e pei o i tatou, ma o le taimi lena (po o fea tatou te mafaia) ia sili atu ona o e auauna atu i nuu lautele e mafai ona tatou uunaia.
Ou te alofa i le Alii o Iesu Keriso, o le ona le auauna lea ou te taumafai e avea ai. Ma ou te alofa i lo tatou Tama Faalelagi, o le na agalelei tele e tuuina mai o Ia ia i tatou. E tusa ai ma lena meaalofa, ou te iloa o loo valaau mai le Atua i Isaraelu o aso e gata ai ia sili atu ona faapei o Keriso, ma ia sili atu ona paia nai lo le taimi nei i lo tatou naunautaiga e ola i le talalelei ma faatuina Siona. Ou te iloa foi o le a Ia tuuina mai le malosi ma le paia e avea ai ma soo moni pe afai tatou te talosaga atu i ai.
Ata pue o le aai saunia e tla144/iStockphoto/Thinkstock; ata pue o le moligao saunia e Enskanto/iStockphoto/Thinkstock