Mulimuli i le Ala o le Fiafia
Mai se lauga o le faigalotu a le OAE na tuuina atu i le Tapeneko i Sate Leki i le aso Novema 12, 2012. Mo le lauga atoa, alu i le lds.org/broadcasts.
E sili ona faalagolago lou fiafia i mataupu faavae e te filifilia e mulimuli i ai nai lo tulaga i fafo atu o lou olaga.
O le autalavou, i lona aotelega, o le taimi lelei lava e faia ai ni fuafuaga faaletagata lava ia. I le avea ai ma se talavou matutua e tatau ona e maua miti mo lou lumanai. Atonu o lau miti o le faamoemoe o le ausia faaafeleti, le fatuina o se galuega maoae o le faatufugaga, po o le mauaina o se tipiloma po o le tulaga faalegaluega. Atonu o i ai se faatusa taua i lou mafaufau o lou toalua i le lumanai po o se ava.
E fia ni ou moomooga o le a taunuu? Ua tumu le olaga i le le mautonu. O le a i ai taimi taua mo outou atonu o le a suia le ala o lou olaga i se taimi vave. O na taimi e mafai ona aofia ai le le sili atu nai lo o se vaaiga, se talanoaga, po o se mea na tupu e lei fuafuaina. O le a i ai o avanoa fou, e pei o le folafolaga na saunia e Peresitene Thomas S. Monson, e uiga i le tausaga o le auaunaga faafaifeautalai.1 O nisi taimi e oo mai le suiga o kosi i o tatou olaga mai luitau po o faanoanoaga sa le i faamoemoeina.
O le tele o tagata e le fiafia i le le mailoa. O le le mautonu i le olaga e mafai ona fatuina ai le leai o le lototele, o se fefe i le lumanai. O nisi e faatuai le faia o ni tautinoga ona o le fefe i le toilalo, e tusa lava pe o i ai ni avanoa lelei. Mo se faataitaiga, atonu e faatuai ona latou faaipoipo, sailia o se aoaoga, amataina o se aiga, po o le faamautuina i se galuega mautu, ae filifili e faaalu vale le taimi ma tumau ai i totonu o le mafanafana o fale a o latou matua.
O se isi filosofia o le a faatapulaa ai i tatou ua faaalia i lenei faaupuga: “Aai, feinu, ma fiafia, aua o taeao tatou feoti” (2 Nifae 28:7). O lenei filosofia e fiafia e faananau i tuinanau o le taimi nei e tusa lava po o a o latou taunuuga i le lumanai.
O Le Ala o le Fiafia
O loo i ai se isi auala nai lo auala o le fefe po o le masalosalo po o tuinanauga faaletagata—o se auala e aumaia ai le filemu, toafimalie, ma le toafilemu o le olaga. E le mafai ona e puleaina tulaga uma o lou olaga, ae e mafai ona e puleaina lou fiafia. O oe lava o lē mamanuina.
O lou fiafia o le tele lea o taunuuga o lau vaaiga faaleagaga ma mataupu faavae lea e te faavae ai lou olaga nai lo se isi lava mea. O le a aumaia e nei mataupu faavae le fiafia ia te oe e tusa lava po o a luitau ma ni mea faatei e le i fuafuaina. Sei ou iloiloina nisi o nei mataupu faavae taua.
1. Iloa Lou Taua Faaletagata Lava Ia
Talu ai nei sa ou faaaluina ai ma lou aiga ni nai aso malolo i saute o Farani. I se tasi afiafi, ina ua faatoa goto le la ma ufitia e le pogisa le nuu i tua, sa ou filifili e taoto i lalo i luga o se nofoa o le potu i fafo o le fale. Sa amata ona sailiilia e ou mata le lagi. I le taimi muamua sa pogisa atoa. Na faafuasei lava, ona i ai se malamalama i le lagi e pei o se aloiafi, ma le lona lua, ma le lona tolu. Na auauai, ao fetuunaia ou mata i le pogisa, sa ou iloa ai lou faamemelo atu i le lemafaitaulia o le anoano o fetu. O le mea sa ou mafaufau i ai o se lagi pogisa na suia i le Ala o le Aniva.
Ao ou mafaufau i le tele o le atulaulau ma lou lava tulaga faaleatua faaletino, sa ou fesili ifo ia te au lava, “O ai au ua i ai luma o nei mamalu ma le matagofie?” Sa oo mai se mau i lou mafaufau:
“A ou vaai atu i lou lagi, o le galuega a ou tamatamai lima, o le masina atoa ma fetu na e faia;
“Se a ea le tagata e te manatu mai ai ia te ia? ma le atalii o le tagata e te asiasi mai ai ia te ia?” (Salamo 8:3–4).
Na sosoo mai ai ma lenei fuaitau faamafanafana:
“Aua ua e faamaulalo ane teisi o ia i agelu, ua e faapaleina foi o ia i le mamalu ma le matagofie” (Salamo 8:5).
O le faamatalaga feteenai lenei ma le vavega o le Foafoaga. E tele ma e le iu le atulaulau, ae i le taimi lava e tasi, ua tofu i tatou taitoatasi ma se taua tulaga ese e matagofie ma le iu i le silafaga a lo tatou Foafoa. O lou i ai faaletino e matua itiiti lava, ae o lou taua faaletagata lava ia e le mafuatiaina lona taua i lou Tama Faalelagi.
O le iloaina e silafia i tatou e le Atua ma alofa ia i tatou taitoatasi e pei o se malamalama e faamalamalamaina o tatou olaga ma tuuina mai lona taua. Po o ai lava au, pe ou te maua ni uo pe leai, pe ou te lauiloa pe leai, ma e tusa lava pe ou te lagona le tuulafoaiina po o le sauaina e isi, ua ou maua se faamautinoaga atoatoa e alofa lou Tama Faalelagi ia te au. Na te silafia ou manaoga; Na te malamalama i ou atugaluga; ua Ia naunau e faamanuia au.
Vaai faalemafaufau po o le a se uiga ia te oe pe afai e mafai ona e vaai ia te oe lava e pei ona silasila mai le Atua ia te oe. Ae faapefea pe a e vaai ia te oe lava ma le agalelei, alofa, ma le mautinoa e tasi e pei ona faia e le Atua? Vaai faalemafaufau i le aafiaga o le a i ai i lou olaga ina ia malamalama i lou gafatia e faavavau e pei ona malamalama i ai le Atua.
Ou te molimau atu o loo i ai o Ia iina. Saili ia te Ia! Saili ma suesue. Tatalo ma ole atu. Ou te folafola atu o le a auina mai e le Atua ni faailoga moni o Lona i ai ma Lona alofa mo oe.
2. Avea ma Tagata Ua Avea Ai Oe2
O le avea ma o outou lava tagata moni e foliga mai o se feeseeseaiga. E mafai faapefea ona ou avea ma se tasi ua avea ai au? O le a ou faaali atu lenei mataupu faavae e ala i se tala.
O le ata tifaga O Le Vaitau o Mafuaaga ua faamatalaina ai le tala ia Marguerite, o se tagata teutupe manuia ua i ai se olaga pisi e tumu i faigamalaga ma fonotaga. E ui lava sa ia te ia se alii alofa o loo tauanau o ia e faaipoipo, sa ia fai mai e leai sona taimi mo se faaipoipoga po o se fanau.
O le aso na atoa ai lona 40, sa ia maua se tusi faalilolilo o faapea mai, “Lau pele o au, o le asō ua fitu ou tausaga ma ou te tusia lenei tusi mo oe e fesoasoani e te manatua ai folafolaga sa ou faia ina ua fitu ou tausaga, ma faamanatu foi ia te oe le ituaiga o mea ou te fia avea ai.” O le tusitala o le tusi e le o se isi lava nai lo Marguerite, ina ua fitu ona tausaga. O mea na sosoo ai o nai tusi lea e auiliili ai le faamatalaina e le teineitiiti laitiiti o ana sini o le olaga.
Ua iloa e Marguerite o le ituaiga o tagata o avea ai o ia e le o le tagata lea sa ia manao e avea ai ao teineitiiti.Ao ia filifili e toe avea ai ma le tagata sa ia mafaufauina ao teineitiiti, sa suia atoa lona olaga. Sa ia toe faalelei ma lona aiga ma naunau e tuuto atu lona olaga atoa e auauna atu ai i tagata e le tagolima.3
Pe afai e mafai ona e mauaina se tusi mai i lou muai olaga, o le a se mea e tau mai? O a aafiaga o le a faia ia te oe e lena tusi mai se lalolagi ua galo ae o se lalolagi moni pe afai o le a e mauaina i lenei vaitaimi?
Atonu o lenei tusi e tau mai ai se mea faapenei: “La’u pele o au, ou te tusi atu ia te oe ina ia e manatua le tagata ou te fia avea ai. Ou te faamoemoe o le a e manatua lou naunautaiga sili o le avea ma se soo a lo tatou Faaola, o Iesu Keriso. Ou te lagolago i Lana fuafuaga, ma pe a ou i ai i le fogaeleele, ou te manao e fesoasoani ia te Ia i Lana galuega o le faaolataga. Faamolemole ia manatua, ou te manao e avea ma se vaega o se aiga o le a faatasia mo le faavavau atoa.”
O se tasi o faigamalaga maoae o le olaga o le iloaina pe o ai moni i tatou ma pe o fea sa tatou o mai ai, ona tumau lea i le ola ai e tusa ma lo tatou faasinomaga moni o ni fanau a le Atua ma le faamoemoega o lo tatou olaga.
3. Faatuatua i Folafolaga a le Atua
O se aoaoga mai le perofeta o Malaki o loo totonugalemu o le Toefuataiina o le talalelei: “Ma o le a ia totoina i loto o fanau folafolaga na faia i tama, ma o le a liliu atu loto o fanau i o latou tama.” (Iosefa Samita—Talafaasolopito 1:39). Faafetai i le Toefuataiga, o outou o fanau o le folafolaga. O le a e maua i le avea ai ma se tofi le folafolaga na faia i o outou tama.
Toe faitau lou faamanuiaga faapeteriaka. O lenei faamanuiaga ua faamaonia mai ai e le Alii lou sootaga i se tasi o ituaiga e sefulu ma le lua o Isaraelu, ma ona o lenei mea, e ala i lou faamaoni, e avea oe ma se suli i le tele o faamanuiaga na folafola atu ia Aperaamo, Isaako, ma Iakopo. Na folafola atu e le Atua ia Aperaamo, “O i latou uma o e talia lenei talalelei, e faaigoaina i latou i lou igoa, ma avea i latou ma au fanau, ma o le a latou tutu mai foi ma viia oe, o so latou tamā” (Aperaamo 2:10).
O nei faamanuiaga e faaletino, ma afai e faia la tatou vaega, o le a faia e le Alii Lana vaega. I le isi itu, e le faamautinoaina e nei folafolaga le ogatusa o mea uma e tutupu i o tatou olaga ma o tatou faamoemoega ma manaoga. Nai lo lena, o folafolaga a le Atua e faamautinoa mai o mea e tutupu ia i tatou o le a ogatusa ma Lona finagalo. O le mea aupito sili e mafai ona tatou mananao ai i lenei olaga o le faaogatasi lea o o tatou loto ma le finagalo o le Atua—ina ia taliaina fuafuaga mo o tatou olaga. E Na te silafia mea uma mai le amataga, e i ai se vaaiga e le maua e i tatou, ma e alofa ia i tatou i se alofa e le iu.
Ou te faailoa atu lenei mataupu faavae faatasi ai ma se aafiaga patino. A o ou laitiiti, sa ou filifili e sauni mo se suega ulufale i le aoga sili ona lelei faapisinisi i Farani. O le sauniuniga, lea sa alu ai se tausaga, sa luitauina tele. I le amataga o le tausaga, sa ou filifili po o le a lava le faigata o le galuega, o le a ou le avea lava au suesuega ma mea e taofia ai au mai le auai i au sauniga o le Aso Sa po o le vasega inisitituti faatasi i le vaiaso. Sa ou talia foi se valaauga e avea ma failautusi i lau uarota o talavou matutua. Sa ou mautinoa o le a silafia e le Alii lou faamaoni ma o le a fesoasoani ia te au e ausia ou faamoemoega.
I le faaiuga o le tausaga, ina ua latalata mai suega, sa ou lagona sa ou faia le mea sili. Ina ua ou taunuu atu mo le suega i se aoga e sili ona faaaloalogia, sa ou maua le toafimalie atoa o le a tali mai le Alii i ou manaoga. Ae paga lea, o le suega i au mataupu sili ona malolosi sa avea ma mala e le i faamoemoeina—sa ou maua se togi sa taofia ai au mai le auai i lenei aoga sa mananao le toatele ia auai. Sa ou popole. Na mafai faapefea ona tuulafoai au e le Alii ae sa ou tumau i lou faamaoni?
Ina ua ou auai atu i le suega taufesootaiga mo le aoga lona lua i lau lisi, sa faatumulia au i le masalosalo. I lenei aoga, o le suega sa tele ona togi o se faatalanoaga ma le au faamasino ae pulefaamalumalu ai le faatonu o le aoga. O le amataga o le faatalanoaga sa o se mea masani lava—seia oo ina ua fesiligia au i se fesili le taua: “Matou te iloa sa tele lou suesue ia saunia ai mo lenei suega. Ae matou te fia iloa po o a au gaoioiga i fafo atu o au suesuega.”
Sa sikipi le pao o lou fatu! Mo le tausaga e tasi sa na o le lua mea sa ou faia: suesue ma alu i le lotu! Sa ou fefe o le a le lelei le malamalama ai o le faamasino i se faamatalaga o lou auai i le Ekalesia. Ae i le tasi sekone sa ou faia le faaiuga e tumau faamaoni i ou mataupu faavae.
Pe a ma le 15 minute, sa ou faamatalaina ai au gaoioiga i le Ekalesia: o au sauniga o le Aso Sapati, vasega o le inisitituti, ma tiutetauave o se failautusi a le uarota. Ina ua uma, sa saunoa mai le faatonu o le aoga.
“E te iloa, a o ou laitiiti, sa ou aoga i le Iunaite Setete,” o lana tala lea. “O se tasi o au uo mamae o se Mamona. O ia o se alii talavou ofoofogia, o se tasi sa i ai uiga faaletagata maoae. Ou te manatu o tagata Mamona o ni tagata lelei tele.”
I lena aso sa ou maua ai se tasi o togi aupito sili e mafai ona maua, lea na faataga ai au i lenei aoga ma se tulaga o le faamamaluina.
Sa ou faafetai i le Alii mo Lona agalelei. Ae, e tele tausaga na faaaluina faatoa ou malamalama ai i faamanuiaga faavavega ia na ou le auai atu ai i le aoga muamua. I le aoga lona lua, sa ou feiloai atu i tagata taua. O faamanuiaga o lau mafutaga ma i latou sa iloagofie i le aluga umi atoa o lau galuega ma o loo taua pea i lou olaga ma i olaga o tagata o lou aiga.
Afai e le ogatasi se mea ma le auala sa e faamoemoe i ai pe na faamoemoeina ina ua maea ona e faia mea uma i lou malosi, ia sauni e talia le finagalo a lou Tama Faalelagi. Na te le tuuina mai ia i tatou se mea e le lelei le taunuuga mo i tatou. Faalogo i lena leo malu o musumusu i o tatou taliga: “Aua ua i ai tagata uma i lou lima; ia filemu ma iloa o A’u o le Atua” (MF&F 101:16).
E I Ai Le Faamoemoe i le Lumanai, Pei Foi o o Outou Faatuatua
O le tele o lou mafaufau i le gasologa o lou olaga ma lou toalua, o Valérie, o le tele foi lea o lou talitonu, o le mea sa faia se eseesega ona sa tutusa o maua vaaiga i le ola e faavavau ao ma talavou. Sa ma mananao e amata se aiga e faavavau. Sa ma iloa le mafuaaga ua ma i ai i le lalolagi ma o ma faamoemoega e faavavau. Sa ma iloa e alofa le Atua ia i maua ma sa tele so maua taua i Ona fofoga. Sa ma maua le faamautinoaga uma o le a Ia tali mai i a ma tatalo i Lana ala ma i le taimi sa Ia talitonuina e lelei.
Ou te le iloa pe ua ma saunia e talia Lona finagalo i mea uma aua o se tasi lena o mea sa ao ona ma aoaoina—ma sa ma faaauau pea ona aoaoina. Ae sa ma mananao e faia le mea sili e mulimuli ai ia te Ia ma faapaiaina i maua lava ia te Ia.
Ou te molimau atu, faatasi ai ma Peresitene Monson, “e i ai le faamoemoe i le lumanai, pei foi o o outou faatuatua.”4 E sili ona faalagolago lou fiafia i mataupu faavae e te filifila e mulimuli ai nai lo tulaga i fafo o lou olaga. Ia faamaoni i nei mataupu faavae. E silafia ma alofa le Atua ia te oe. Afai e ogatusa lou olaga ma Lana fuafuaga e faavavau ma afai e te maua le faatuatua i Ana folafolaga, ona i ai lea o le faamoemoe i lou lumanai!
O i ai ni au miti ma ni sini? E lelei lena! Galue i lou malosi e te mafaia ina ia ausiaina. Ona tuu lea i le Alii e faia le vaega o totoe. O le a Ia faia oe i se mea e te le mafai ona faia e oe lava.
Ia talia Lona finagalo i taimi uma. Ia saunia e alu i soo se mea ua Ia poloai oe e te alu i ai ma ia faia mea ua Ia poloai oe e faia. Ia avea ma alii ma tamaitai ua Ia faafailele oe e avea ai.
Ou te molimau atu o lenei olaga o se taimi matagofie o le faavavau. Ua tatou i ai iinei ma se sini faamamaluina—o le sauniuni e fetaiai ma le Atua.
Avea ma tagata ua avea ai oe.
Faatuatua i Folafolaga a le Atua.
Iloa lou taua faaletagata lava ia.
Atonu o le a aumai se tusi mai i lou tagata i le muai olaga e faapea, “Lau pele o a’u, ou te faamomoe o le a e manatua lou naunautaiga sili o le avea ma se soo o Iesu Keriso.”
Sa ou maua ai se tasi o togi aupito sili e mafai ona maua, lea na faataga ai au i lenei aoga ma se tulaga o le faamamaluina.
Ata na tusia e Allen Garns