Faitalia ma Tali: Iloaina o Faaaliga
O mea e foliga mai i nisi taimi o se papupuni pogisa i fesootaiga o se laasaga tele e faia ia talitonuina.
Taumatau: ata na saunia e Cody Bell
Sa nofo faasaga mai ia te a’u se tamaitai o tagi māsūsū. Sa na ia faamatala mai ia te au ma loimata, “Ua ou le iloa po o le a se isi mea ou te talitonu i ai.” Sa talanoa i lona feagai ma tauiviga ma le tatalo i le tele o aso ia iloa pe faapefea ona fai se faaiuga matuā taua i lona olaga, ae aunoa ma le faamanuiaina. Sa faalia lona loto mafatia, “Ua ou le iloa po o le a le mea e fai. Afai e te tau mai le mea ou te faia, o le a ou faia.” Faatasi ma lona lima i luga o le tusitusiga paia, sa ia fai mai, “Na tau mai e le Atua o le a Ia fesoasoani ia i tatou. Ua Ia tali i tatalo o tagata taitasi, aisea ua Ia le tali mai ai mo au?”
A pu’ea se tasi i le femilosaiga o faalogoga maaleale, e faigata ona ia iloa le mea e fai i le na o ia. O la’u tatalo o le fesoasoani ia te oe o lo’o maua i ia lagona.
A le maua tali i tatalo faanatinati, atonu tatou te le o malamalama i nisi o mea moni e uiga i le tatalo, pe ona tatou te le o iloaina ia tali pe a oo mai.
Mataupu Faavae o le Tatalo
O le fesootaiga ma lo tatou Tama i le Lagi e le o se mataupu faatauvaa. O se avanoa paia. O loo faavae i luga o mataupu faavae le masuia e faavavau. Tatou te mauaina le fesoasoaniga mai lo tatou Tama i le Lagi mai tali i lo tatou faatuatua, usiusitai, ma le faaaogaina tatau o le faitalia.
O se mea sese le faapea, o tatalo taitasi tatou te tuuina atu o le a maua vave lona tali. O nisi tatalo e manaomia lo tatou matuā manatunatu mae’aeā i ai. E moni, e oo mai faagae’etiaga ae tatou te lei saili patino i ai. E masani ona aofia faalauaitele i se mea tatou te manaomia ona iloa ae i se isi itu, e le mafai ona tatou maua.
Ua tatou i ai iinei i le fogaeleele ina ia tatou maua se poto masani e le mafai ona tatou maua i se isi lava ala. Ua tuuina mai ia i tatou le avanoa e tuputupu ai, ia atiina ae, ma oo i le matua faaleagaga. I le faia o lea, e tatau ona tatou aoao ia faaaoga mea moni. O le ala tatou te faafetai’aia ai luitau ma fōia faafitauli ogaoga e matua taua mo lo tatou fiafiaga.
I le faateleina o le malamalama i le uiga o le tatalo, sa ou faalogo i fautuaga mai isi, mafaufau loloto i mau, ma suesue i soifuaga o perofeta ma isi. Ae o le mea e foliga ua sili ona fesoasoani mo au o lo’u vaaia i lou mafaufau o se tamaitiiti o faalatalata ma le talitonu atoatoa i se Tamā agaalofa, agalelei, poto, ma malamalama, o lē e finagalo ia tatou manuia.
Aua le faapopoleina oe ona o le faaletonu o le faailoaina atu o ou lagona. Tau lava ina ia e talanoa i lou Tamā. E Na te faafofoga i tatalo uma taitasi ma tali mai i Lona lava ala.
A tatou faamalamalamaina se faafitauli ma faailoa atu le ala e foia ai, o nisi taimi Na te tali mai īoe, ao nisi taimi e leai. E masani lava e Na te taofi se tali, e le faapea ona ua le popole, ae peitai ona e atoatoa Lona alofa ia i tatou. E finagalo o Ia ina ia tatou faaaoga mea moni ua na Ia tuu mai ia i tatou. Mo lo tatou tuputupu ae, e tatou te mana’omia le talitonuina o lo tatou atamai ia faia ai faaiuga sa’o, E tatou te mana’omia le fai o mea ua tatou lagona e sa’o. E i ai le taimi, o le a Ia tali mai ai. Na te le tuulafoaia i tatou.
Ua ou faailoa atu le ala moni o la tatou faia ma lo tatou Tamā. E matua leai lava se mea e uiga ia i tatou e Na te lē silafia. Ua Na silafia, mea uma tatou te mananao ai ma saunia tali uma. Ae peitai, ona o Lona faamoemoe o lo tatou fiafia faavavau, Na te faamalosi mai ia i tatou ia faia filifiliga sao.
Auala e Tolu e Maua ai Tali
1. Vaavaai mo Faamaoniga Ua Uma Ona Ia Taliina Oe
E pei lava o le toatele o i tatou, e le’i iloaina e Oliva Kaotui le faamaoniga o tali i tatalo ua uma ona tuuina atu e le Alii. Ina ia tatalaina ona—ma o tatou—mata, sa tuuina atu lenei faaaliga e ala atu ia Iosefa Samita:
“Amuia oe ona o mea ua e faiā; aua sa e ole mai ia te au, ma faauta, o le tele o taimi na e ole mai ai na e maua ai faatonuga mai lo’u Agaga. A na e le faapea, po ua e le oo mai i le mea ua e i ai i le taimi nei.
“Faauta, ua e iloa na e ole mai ia te a’u ma sa Ou faapupulaina lou mafaufau; ma o lenei ua Ou tau atu ia te oe nei mea ina ia mafai ona e iloa ai sa faapupulaina oe e le Agaga o le upumoni” (MF&F 6:14–15; faaopoopo le faatusilima).
Afai e te lāgona e le o tali mai le Atua i au tatalo, mafaufau loloto i mau nei—ona e tilotilo toto’a lea i ni faamaoniga i lou lava olaga i tali ua uma ona maua mai ia te Ia.
2. Ia Gauai Atu i Lagona
Ina ia fesoasoani ia i tatou taitoatasi ia iloa tali e tuuina mai, sa fetalai le Alii:
“Afai e te manao i se isi molimau, liliu ane lou mafaufau i le po na e tagi mai ai ia te a’u i lou loto, ina ia mafai ona e iloa e uiga i le moni o nei mea.
“Ou te lei tautala atu ea le filemu i lou mafaufau e uiga i le mataupu?” (MF&F 6:22–23; faaopoopo le faamamafa).
Ua saunia e le alii nisi va’aiga manino e ala mai i le fautuaina o tatou ia matua su’esu’eina se faafitauli ma’ea’ea i o tatou mafaufau ona ole atu lea pe ua tonu lea:
“Afai ua sao o le a Ou faia ia mu lou loto i totonu ia te oe; o lea, o le a e lagona ai ua sao.
“Ae afai ua le sao, o le a e le maua ni lagona, faapena, ae o le a e maua se mafaufauga papa” (MF&F 9:8–9; faaopoopo le faamamafa).
3. Galue Pe a Ia Taofia se Tali
E matuai taua lava ona iloa o le Alii e tali mai foi i le ala lona tolu i le tatalo e ala i le taofia o se tali ao ofoina atu le tatalo. Aisea o le a Na faia ai lea mea?
O Ia o lo tatou Tama e atoatoa. E sili ona alofa ia i taou i le mea ua tatou malamalama i ai. Na te silafia le mea e lelei mo i tatou. Na te silafia le iuga mai le amataga. Na te finagalo ia tatou faia ni galuega e maua ai le malamalama tatou te manaomia:
Pe a tali mai o Ia ioe, o le tuuina mai lea ia i tatou o le faamaoniga.
Pe a tali mai o Ia e leai, o le puipuia lea o i tatou mai le sese.
Pe a taofia le tali, o le faatupuina lea o i tatou e ala i le faatuatua ia te Ia, usiusitai i Ana poloaiga, ma le lotomalie e saili le mea moni. Ua fuafuaina o le a faamasinoina i tatou e tusa ma a tatou filifiliga ina ia tusa ai ma ana aoaoga, e aunoa ma le muai tuuina mai o se faamaoniga. E le tatau ona tatou nonofo ma faatalitali, po o le muimui ona ua le fetalai mai le Alii. E tatau ona tatou faia se galuega.
E masani lava ua tatou filifili e faia le mea e sao. O le a Ia faamautinoa le sao o a tatou filifiliga i Lana ala. O lena faamaoniga e masani ona oo mai e ala i taga o fesoasoaniga e maua i le aluga o le ala. Tatou te iloaina i latou e ala i le maaleale faaleagaga. E faapei i latou o ni faamatalaga mai se Tama alofa o se faamaoniga o Lana faamaoniga. Afai, i le faatuatua, e tatou te amata ai se mea e le o sao, o le a Ia faailoa mai ia i tatou ae tatou te lei mamao tele i tua. Tatou te lagonaina lena fesoasoani e ala i le iloaina o lagona atuatuvale ma le le mautonu.
O taumafaiga a Nifae ia maua papatusi apamemea ua faaalia ai le auala o galue ai le mataupu faavae (tagai 1 Nifae 3:6–7). Ina ua maea taumafaiga le manuia e lua, sa tumau pea le faatuatua o Nifae. Sa ia tolotolo atu i le aai e agai i le fale o Lapana e aunoa ma ni tali. Na fai mai a ia “Sa taitaiina a’u e le Agaga, ma sa ou le mua’i iloa mea ou te faia,” ma sa toe faaopoopo mai o ia i ni upu taua lava, “ae ui i lea na ou alu atu.” (1 Nifae 4:6–7; faaopoopo le faamamafa).
Na naunau Nifae e taumafai pea lava pea, i le faaaogaina o ana taumafaiga silisili. Sa ia faaalia le faatuatua o le a ia maua le fesoasoani. Sa ia teena le faavaivai. Ae ona sa ia galue, maua le faamautinoaga i le Alii, sa usitai, ma faaaogaina ma le tatau lana faitalia, sa ia maua le taitaiga. Na musuia o ia i laasaga taitasi i le faamanuiaina, ma e tusa ai ma upu a lona tina “na foaiina atu le … mana e fai ai le mea na poloaiina e le Alii” (1 Nifae 5:8; faaopoopo le faamamafa).
Ata na tusia e Brian Call
Sa iloa e Nifae le manaomia o lona talanoa atu i le Atua, ia faatino le faatuatua, ma ia galue ina ia ona maua le fesoasoani, mai lea tulaga i lea tulaga. E leai sona muimui pe fesili mo se faamalamalamaga auiliili. Peitai, i se vaaiga patino, na te lei faatalitali mo se fesoasoani. Na ia galue! E ala i le mulimulitaia o tulafono faaleagaga, sa musuia o ia ma tuuina i ai le mana e galue ai.
Faatuatuaina o le Finagalo ma le Auala a le Atua
E i ai nisi taimi tatou te le maitauina ai tali i tatalo talu ai o le uunaia e le manao ia faamaonia o tatou faanaunauga. Ua le mafai ona tatou vaai o le Alii e na te tuu mai ia i tatou ia faia se isi mea. Ia faaeteete i le sailiilia o Lona finagalo.
Ou te tautino atu ou te matua le iloa pe faapefea ona faia se faaiuga sao vagana ona o loo i ai le amiotonu ma le talitonuga i se Tamā Faalelagi. O le a le mafai lava ona faatino mataupu faavae pe a faaaogaina ma le manatu e i ai le faitalia e faasagatau i le finagalo o le Atua. A o i ai se agasala le salamoina, o le a tu’ua na’o i tatou ia tatou lava togafiti e taofiofia ma tauivi ai na’o tatou. Tatou te faatoa mafai ona sao mai e ala i lo tatou lava salamō.
Ao tatou saili musumusuga e fesoasoani i le faia o a tatou faaiuga, e aumaia e le Alii uunaiga malu. O nei mea e manaomia ai lo tatou manatunatu, faatino le faatuatua, ia galue, tauiviga mamafa i nisi taimi, ma faatino. E seasea maua le tali atoa i se mataupu mafaufauina faigata ma taua i le taimi e tasi, e auauai mai e aunoa ma le iloa o le taunuuga.
Ua ou sefeina le vaega aupito sili ona taua e uiga i le tatalo seia oo i le faaiuga. O le loto faafetai! O lo tatou taumafaiga faamaoni e faafetai atu i lo tatou Tama pele e faatupulaia ai faalogona matagofie o le filemu, taua o le tagata lava ia, ma le alofa.
Aisea e foliga ai o [tagata] e sili ona matitiva e sili atu ona silafia le auala e faafetai ai i le Alii? I laufanua maualuluga o Kuatemala, e toetoe lava a le mafai e tagata o le au paia ona feola. O le malaga i le malumalu e manaomia ai le osigataulaga maoae. O se asiasiga e faaalu ai se tausaga o sauniuniga. O loo i ai le galue malosi, le ositaulaga e sefe meaai ma lavalava, le faia, le valiina, ma le suiina o lavalava fou. O loo i ai le savaliga umi i mauga, le sopoia o le Vaituloto o Isabel, le tietiega i le pasi ma ni meaai laiti. Le lelavava ma le vaivai, sa latou taunuu ai i le malumalu. Sa latou fulufulu seia o latou susulu, faia o latou laei fou, ma ulufale atu i le maota o le Alii.
Ma le toe laeiina o laei papae, ua aoaoina i latou e le Agaga, maua sauniga, ma osia feagaiga. O se tasi o tina mai atumauga sa sili ona ootia ona o le agaga ma le faauigaga o le faaeega paia. I le ulufale atu i le potu selesitila, sa ia vaaia ai o nonofo isi, ma ifo ma le migao o latou ao, ma le le nofouta i ai o isi. Sa ia ifo, ma masusu, ma mo le luasefulu minute sa ia liligi atu lona loto i lona Tama o i le Lagi. Mulimuli ane, faatasi ai ma lona ofu o loo susu i ona loimata, sa ea i luga lona ulu. Sa fesili i ai le faatina lelei, “E mafai ona ou fesoasoani?” Sa ia tali atu, “Oi, mata e te mafai? O lou faafitauli lea: Sa ou taumafai e tau atu i le Tama o i le Lagi lo’u agaga faafetai mo o’u faamanuiaga uma, ae ou te le i lagonaina sa ou fesootai atu. E mafai ona e fesoasoani mai ia te a’u e ta’u atu i a te Ia lo’u faafetai tele?”
E moni lenei fautuaga e uiga i le tatalo. Ua ou suesueina e ala i au lava aafiaga faaletagata. Ua ou iloaina o nisi taimi o le mea e foliga mai o se papupuni pogisa i fesootaiga, o se laasaga tele lea e faia ia talitonuina.
Afai e te sailia Lana fesoasoani, ia mautinoa o loo e ola mamā, o loo agavaa au faamoemoega, ma o loo e naunau e fai mea Na te finagalo ai—aua o le a Ia tali mai i au tatalo. O ia o lou Tama alofa; o oe o lona atalii ma afafine faapelepele. E atoatoa Lona alofa ia te oe ma e finagalo e fesoasoani ia te oe.