O Le Mauaina o Lou Auala e Toe Foi ai i le Ekalesia
E alala le tusitala i Kalefonia, ISA.
Sa ou taumafai e saili ni tali i fafo atu o le talalelei, peitai pau lava le mea sa ou maua o le leai o se faamoemoega.
Ata na tusia e Nathaniel Ray Edwards
Sa ou ola ae i Le Ekalesia a Iesu Keriso o le Au Paia o Aso e Gata Ai, ae i le kolisi sa ou filifili ai ou te le toe manaomia le Ekalesia. Na amata lau sailiga papau ma manatu faapito mo le “upumoni” i isi nofoaga. O le le mauaina o ni tali e aumaia ai ia te au le filemu po o le olioli, sa ou pau atu ai i se pouliuli loloto faaleagaga. Sa ou lagona faapea o le a ou le toe maua lava le fiafia.
Ae peitai, sa iloaina sa sili atu lou fiafia ao ou toaga i le Ekalesia. Sa amata ona ou galue ina ia toe malosi i le Ekalesia, ma faamoemoe o le a maua ni toomaga mai le faanoanoa lea o loo faatonutonuina lou olaga. Peitai e lei tele ni mea na ausia e ou taumafaiga vaivai. Sa ou taulai atu i au suesuega, faamoemoe o le a latou aveesea mai au mai le tuulafoaia lea sa ou lagonaina. Sa maua se fesoasoani le tumau mai lenei mea, peitai sa lei maua ai se tali moni.
Ina ua mavae le tautevateva ma le iloaina e leai se mea o ou agai i ai, sa ou filifili loa e malolo mai le aoga mo sina taimi ma alu i se malaga. Sa ou sefeina se tamai tupe ae sa lei lava e oo atu ai i se taimi umi. Ae ou te lei malaga, sa ou filifili e faatino le faatuatua moni ma totogi le sefuluai mai au tupe laiti ia na sefe. E le’i faigofie lenei mea. O le a ou mamao ese mai le aiga, ma e le umi ae ou mativa. Peitai, sa ou faamoemoe lava o loo i ai se Atua, ma sa ou iloa o le a ou manaomia Lana fesoasoani.
Sa ou tusiina se siaki mo lau sefuluai, auina atu i lou epikopo, teu lau Tusi a Mamona, ma malaga loa. I le taimi lava lena sa ou lagonaina ai le mafanafana o le Agaga. Sa ou ofo i le suia o ou lagona masalosalo ma le faanoanoa i le malamalama ma le fiafia. Mai Idaho i Uosigitone, D.C., na aapa mai tagata o le Ekalesia ia te au ma, o le mea e sili ona taua, na fesoasoani ia te au ina ia atiina ae le faatuatua ma manaoga amiotonu. Na foliga mai ua siomia atoa au e le aiga.
Ina ua mavae sina taimi puupuu, sa ou iloa o le a faapuupuu lau malaga—e le o le le lava o tupe ae ona o loo i ai se faigamalaga sili atu o loo faatalitali mai mo au. O le toe foi atu i le aiga, sa ou feiloai ai i lou epikopo ma le peresitene o le siteki. Faatasi ai ma le la fesoasoani, e lei umi ae ou auauna atu i le Alii i se misiona.
O taimi uma lava ou te totogia ai nei lau sefuluai pe feiloai ai ma taitai o le Ekalesia, ou te manatuaina le “amataga” o lou liua moni. Talu mai lena taimi na ou oo i ni taimi lelei ma taimi le lelei, peitai sa ou galue ina ia tumau malosi faaleagaga. Ou te faafetai ai pea mo le taliaina e le Tama Faalelagi o lau taulaga itiiti o le faatuatua ma le faalauteleina mai o Ona aao alofa ia te au.