Mo Le Malosi o le Autalavou
E Tuuina Mai e le Sefuluai se Malosiaga i Totonu
Filifili nei loa e totogi se sefuluai faamaoni. O le faia o lena mea o le a fesoasoani ia te oe ia iloa e tausia e le Alii Ana folafolaga.
Ata na tusia e Jim Madsen
Na aoao mai Peresitene Thomas S. Monson “o le totogi ma le faamaoni o le sefuluai e maua ai e se tagata se malosi i totonu, ma se tautinoga e usitai i isi poloaiga.”1 Sa faamanuiaina au i le mauaina o se molimau o lenei mataupu faavae ao avea au ma se tama talavou.
Ina ua 14 ou tausaga, sa amata lau galuega muamua, e maua ai le 2 tala amerika i le itula e avea ma se leipa faufale. O le aofaiga o le siaki mo lou vaiaso muamua e 80 tala. Sa ou manao e faatau se laau pese e valu fata, o se tekinolosi fou tau musika i lena taimi. O le laau e atoatoa uma ona vaega lea sa ou manao i ai e 320 tala le tau. Sa ou faasoa atu ma le fiafia ia Tina ma Tama lou naunautaiga e faatau le laau pe a maea ia vaiaso e fa o le galuega.
Silia ma le Fa Vaiaso
Na aoao mai ma le poto ou matua, “E silia ma le fa vaiaso e maua ai se tupe ia lava e faatau ai lena laau pese. E tatau ona e faaalia le agaga faafetai i le Atua mo Ana faamanuiaga e tele e ala i le totogiina o le 10 pasene o lou totogi e avea o se sefuluai. O le a manaomia e te totogia i le malo pe a ma le 10 pasene i lafoga. Ma e tatau ona e aoao ao laitiiti ia usitai i fautuaga a perofeta i le saunia o mea tautupe mo le lumanai, e aofia ai lau misiona; ma te fautua atu ina ia e tuueseina le 30 pasene o au tupe maua i se teuga tupe.”
Na faatopetope ona fuafuaina e lou mafaufau faatalavou faapea afai ou te faia le mea na aoao mai e ou matua, e na o le 40 tala lau tupe i vaiaso taitasi e faaaoga, o lona uiga e tatau ona ou faigaluega ia le itiiti ifo ma le lua masina e faatau ai le laau pese lea ou te manao i ai. Sa ou oo i se tulaga faigata o le filifiliga—mata o le mauaina o meatotino faaletino o sau mea lea e faamuamua, pe o le a ou ositaulaga e totogi le sefuluai ma tuuese se tupe e teu?
Totogi Muamua le Sefuluai
Ua fautua mai le Mo Le Malosi o le Autalavou: “Ia totogi muamua [le sefuluai], e tusa lava pe e te manatu e le lava au tupe e faafetaiaia ai isi o ou manaoga. O lou faia o lea mea o le a fesoasoani ia te oe e atiae ai se faatuatua sili atu, faatoilalo ai le manatu faapito, ma talia atili ai le Agaga.”2
Sa ou filifili i le 14 tausaga e totogi ma le faamaoni le sefuluai mo lou olaga atoa. Sa ou naunautai lava e mulimuli i le perofeta i le sefeina o tupe mo lau misiona faapea ma le aoga i le lumanai. Na aoaoina foi au e lenei aafiaga ina ia iloa le eseesega o mea e mananao ai ma mea e manaomia. Sa ou manao i le tekinolosi sili ona fou, ae ou te le manaomiaina. O lea sa ou filifili loa e faatau se laau e le taugata tele ma e itiiti ifo ona ki, ma o loo aoga pea i le taimi na ou aluese ai mo lau misiona.
O Folafolaga na Tausia
A o ou aoao e ala i le totogiina o le sefuluai o le a tausia e le Alii Ana folafolaga, na tuputupu ae malosi lou faatuatua ma faapea foi ma lou manao ia tausia isi Ana poloaiga. Sa ou aoao afai ou te tuuina atu se taulaga anapogi limafoai, o le a Ia taliina au tatalo ma taitaiina au e le aunoa (tagai Isaia 58:6–11). Sa ou aoao afai ou te faitauina le Tusi a Mamona, o le a Ia faaalia mai ia te au le moni e ala i le mana o le Agaga Paia (tagai Moronae 10:4–5). Sa ou aoao afai ou te usiusitai i le Upu o le Poto, o le a Ia aumaia ia te au le ola maloloina, poto, ma le malamalama ina ia mafai ai ona ou “taufetuli ae le vaivai” (tagai MF&F 89:18–21). Ma sa ou aoaoina afai ou te tausia le tulafono o le legavia, o le a avea le Agaga Paia ma au soa e le aunoa ma o le a aumaia e le Faaola le lototele ou te tu ai ma le le pona i Ona luma (tagai MF&F 121:45–46).
O le isi auala ua faateleina ai e le totogiina o sefuluai ma taulaga lou malosi i totonu, e ala atu lea i feagaiga o le malumalu. Ua aoao mai le Mo le Malosi o le Autalavou, “Ina ia mafai ona e ulu i le malumalu, e tatau ona avea oe ma se tasi e totogi atoa le sefuluai.”3 Pe a ou ulu atu i le malumalu paia, ou te lagona le i ai o le Atua ma Lona alofa. Ou te molimau atu o sauniga o le malumalu, tatou te maua ai le “mana mai luga” (MF&F 95:8) e fetaiai fiafia ai ma foia ia luitau o le olaga faaletino.
O Se Faamanuiaga o loo Faapolopoloina
O le totogiina o sefuluai ma taulaga ua faateleina ai lou faatuatua e faapea o le a faataunuuina e le Alii Ana folafolaga. Ua Ia tautino mai, e ala mai i le perofeta o Malaki, “Ina aumaia mea e sefulu ai … ma ia tofotofo mai ai ia te au i lenei mea, … pe ou te le toina pupuni o le lagi mo outou, ma sasaa atu le manuia mo outou, ina seia silisili ona tele” (Malaki 3:10).
I lou olaga atoa, e oo lava i taimi o tofotofoga o mea tautupe i le amataga o lau faaipoipoga, na tatalaina e le aunoa e le Atua ia pupuni o le lagi ina ia maua e lo matou aiga ia mea faaletino e manaomia o le olaga. Ou te molimau atu o le usiusitai i le tulafono o le sefuluai, o le a faatupulaia ai lou faatuatua i se punavai sili o le malosi i lou olaga.
Ou te valaau atu i talavou taitasi—ma tagata uma o le ekalesia—ina ia faalogo ia Iesu Keriso ma Ana perofeta e ala i le totogiina atoa o le sefuluai ma se taulaga anapogi limafoai i lou olaga atoa. Ou te folafola atu o le a faamalosia oe ma faamanuia oe e le Alii i le faataunuuina o ou manaoga amiotonu e tusa ai ma Ona faamoemoega paia.