Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. ʻOku ʻoatu heni ha fakakaukau ʻe ua.

“Hoko ʻo Haohaoa ʻia Kalaisi,” peesi 42: Fakaʻaongaʻi e ngaahi akonaki ʻa ʻEletā Kongi fekauʻaki mo e ʻikai ha melé, faʻu ha sivi moʻoni pe hala maʻa ho fāmilí ke tokoniʻi kinautolu ke nau ʻilo pe ʻoku ʻi ai haʻanau fakaʻamu ke ʻoua ʻe ʻi ai hanau mele. Te ke lava ʻo ngāue ʻaki e ngaahi lea hangē ko e “Te u lava pē ke fiefia neongo ʻe ʻi ai haʻaku fehalaaki” pe “ʻOku faingataʻa ke u fakamolemoleʻi ʻa e niʻihi kehé” ʻi hoʻo siví. Mou lau fakataha e meʻa ʻoku akoʻi ʻe ʻEletā Kongi kau ki he fakafalala ki he Fakamoʻuí. Te ke lava ʻo fakaʻaongaʻi e peesi 176–77 ʻi he Malangaʻaki ʻEku Ongoongoleleí: Ko ha Fakahinohino ki he Ngāue Fakafaifekaú ke akoʻi e founga ke fokotuʻu ai ha ngaahi taumuʻa totonú mo ikunaʻi e fie haohaoá.

“Ko Hoku Sinó ko ha Temipale,” peesi 68: Fakaʻaongaʻi e ngaahi fehuʻi ʻi he fakamatala ko ʻení ke akoʻi hoʻo fānaú ki he anga hono fakaʻapaʻapaʻi mo ʻofa ʻi honau sinó. Te ke lava ʻo ʻai ha meʻakai moʻui lelei, hangē ko ha fuaʻi ʻakau pe vesitapolo, ke akoʻi hoʻo fānaú e founga maʻu meʻatokoni moʻui leleí. Mahalo te ke loto ke fai ha sipoti pe ʻekitivitī ʻi tuʻa ke tokoni ki hoʻo fānaú ke nau fakahoungaʻi e moʻui mo e ivi ʻoku leleí. Poupouʻi hoʻo fānaú ke nau tokoniʻi ha fānau pe kiʻi tamasiʻi taʻu hongofulu tupu ʻi honau uōtí, koló, pe akó ʻoku nau faingataʻaʻia fakaesino. Te ke toe lava foki ʻo hivaʻi ʻa e “Te u ʻAʻeva Mo Koe” (Tohi Hiva ʻa e Fānaú, 140).

Tā fakatātā ʻo e ʻatá ʻe Cody Bell

ʻI Hoʻo Lea Fakafonuá

ʻOku maʻu ʻa e Liahoná mo e ngaahi nāunau kehe ʻa e Siasí ʻi ha ngaahi lea fakafonua lahi ʻi he languages.lds.org.