ʻOku Tui e Kau Māmongá ki he ʻOtuá
ʻOku nofo ʻa e tokotaha naʻá ne faʻú ʻi Siuāuā ʻi Mekisikou.
Ne u maʻu ha faingamālie ʻi ha malaʻe vakapuna mamaʻo mei ʻapi, ke vahevahe ai e ongoongoleleí mo ha taha ne ʻikai ke ma maheni.
Tā fakatātaaʻi ʻe Steven Keele
Naʻá ku fononga mei Mekisikou ke Monitana, USA, pea kiʻi mālōlō ʻi Tenivā ʻi Kololato. Ne u lue takai ʻi he malaʻe vakapuná, ʻo sio atu he fuʻu sioʻata lahí ki he tō mo e puna ʻa e ʻū vakapuná. Naʻá ku manavasiʻi koeʻuhí he naʻe teʻeki ke u puna vakapuna kimuʻa. Ne ʻasi fuʻu lahi e malaʻe vakapuná.
Naʻá ku sio ki heʻeku tikité ʻo ʻiloʻi ʻoku toe e houa ʻe ua pea mavahe e vakapuna te u folau aí. Ne u fakakaukau ke kumi ha feituʻu ke tangutu ai ʻo laukonga kimuʻa peá u toki heka ki he vakapuná. Naʻá ku ongoʻi manavasiʻi ʻi heʻeku fakasio ha feituʻu ke u nofo aí. Naʻe meimei ke nofoʻi e sea kotoa. Naʻá ku fakakaukau ke u tangutu ofi ki ha fefine matuʻotuʻa naʻá ne tangutu toko taha pē. Ko ia pē ʻa e tokotaha ne ʻikai ke ʻasi fakailifia mai kiate au.
Ne ʻosi ha houa ʻe taha pe ofi ki ai pea toki lava ke u talanoa ki ai. Naʻá ku fakafeʻiloaki au; naʻá ne ngali angalelei mo vēkeveke ke ma talanoa ki he ngaahi lavameʻa ʻa hono mokopuná. Naʻá ne ʻeke mai ha meʻa kau kiate au, pea naʻá ku talaange e meʻa kotoa fekauʻaki mo ʻeku moʻuí ʻi Mekisikou. Ne fakafokifā haʻaku ongoʻi ke vahevahe e ongoongoleleí mo ia. Naʻá ne ʻeke mai ʻeku tui fakalotú, pea naʻá ku talaange ko ha mēmipa au ʻo e Siasi ʻo Sīsū Kalaisi ʻi he Ngaahi ʻAho Kimui Ní.
Naʻá ne talamai kuo teʻeki ke ne fanongo ia ai.
Naʻá ku malimali mo pehē ange, “ʻOku toe ʻiloa pē kinautolu ko e kau Māmongá.
Naʻá ne liliu he taimi pē ko iá hono ʻulungāngá. Ne liliu hono fofongá mo e anga ʻene talanoa mai kiate aú. Naʻe hangē naʻe ʻikai ke ne ʻiloʻi e meʻa ke lea ʻakí. Ne u ongoʻi ko e ngata ia ʻema pōtalanoá, ka naʻá ku feinga pē ke kei hoko atu ʻeku talanoa ki aí. Ne u ʻeke ange ʻene tui fakalotú. Naʻe ʻikai ke toe momou ʻene talí, “Ko ha Katolika au.”
Naʻá ne toki pehē mai, ʻOku ʻikai mahino kiate au. Ko ha taʻahine lelei koe. ʻOkú ke ʻulungaanga lelei. Ko e hā ʻokú ke fie hoko ai ko ha taha Māmongá?”
Naʻá ku ʻohovale ʻi he fakamatala ko ʻení, pea ʻikai ke u ʻilo pe ko e hā haʻaku tali. Ne u fai ha lotu fakalongolongo, ʻo kole ki he Tamai Hēvaní ke tokoni mai ke u fakamatalaʻi ange e ʻuhinga ʻo e hoko ko ha Kāingalotu ʻo e Siasí. Naʻá ku talaange ki ai ʻoku ou saiʻia ke hoko ko ha mēmipa ʻo e Siasí, pea koeʻuhí ko e ngaahi akonaki ʻo e ongoongoleleí, ʻoku lava ke u hoko ai ko ha tokotaha lelei ange mo sio lelei ange ki he meʻa ʻoku hokó.
Naʻe hangē naʻá ne ʻohovalé ʻo ne pehē mai, “ʻOku ʻikai ke tui e kau Māmongá ia ki he ʻOtuá.”
Naʻá ku feinga ke ʻoua naʻa nau kata ʻi he fakamatala ko ʻení; ka naʻá ku malimali mo ʻiloʻi ko hoku faingamālie ʻeni ke vahevahe ʻa e moʻoní mo ia. Naʻá ku fakamatalaʻi ange ha niʻihi ʻo ʻetau ngaahi tefitoʻi tuí. Ne u akoʻi ki ai e palani ʻo e fakamoʻuí pea mo e mahuʻinga ʻo e fāmilí. Naʻe hangē pē ʻoku ʻikai ke ne tui ki aí, peá u fakakaukau leva ke fai ʻeku fakamoʻoní kiate ia. Naʻe tāpuekina au ʻi ha fuʻu malaʻe vakapuna lahi, ke u maʻu e loto-toʻa ke vahevahe ʻeku fakamoʻoni kia Siosefa Sāmitá, ko e palōfita moʻuí mo e kau ʻaposetoló, pea mo e ʻofa ʻoku ou maʻu ki he ongoongoleleí mo e Tohi ʻa Molomoná.
Naʻá ku sio ki he uasí. Kuo taimi ke u heka ki he vakapuná.
Naʻe fakamālohia ʻeku fakamoʻoní ʻi he hoʻatā ko iá ʻi ha founga kuo teʻeki ai ke u aʻusia kimuʻa. Naʻá ku fiefia heʻeku vahevahe ʻeku fakamoʻoní mo iá mo fakamālō ne u lava ʻo tokoni ke liliu ʻene fakakaukau ki he kāingalotu hotau Siasí. ʻOku ou lava he taimí ni ke falala lahi ange ʻi ha taimi ʻe ʻeke mai ai ʻe ha taha kiate au ʻo kau ki he Siasí.