Naʻá ke Fakahaofi ʻEku Nofo Malí

Niila S. Uloi, ʻIokesaea, ʻIngilani

ʻI he taimi naʻá ku ngāue langa ai ʻi ʻOamani mei he 1979 ki he 1986, naʻá ku ngāue he potungāue maluʻí. Naʻe ʻomi ʻe he potungāué kiate au, e ngaahi ngāue ʻi ha feituʻu ʻoku faingataʻa taha e aʻu ki ai he fonuá, pea ko e konga lahi ʻo e ngāué ko au tokotaha pē ne u tokangaʻi e ngaahi ngāué. Ko au toko taha pē ʻa e mēmipa ʻo e Siasí ne ngāue ki he potungāué.

ʻI ha ʻaho ʻe taha ne u fetaulaki ai ʻi he hetikuota ʻo ʻemau kautahá, mo ha tokotaha ʻenisinia naʻá ne faʻa lauʻi koviʻi e Siasí he kuohilí. Naʻá ku faʻa kātakiʻi pē ʻene laú koeʻuhí he naʻá ku ʻi he hetikuotá pē ʻi ha taimi nounou kimuʻa peá u mavahe atu ki ha ngāue ʻe taha.

Neongo ia, kimui mai ne vahe e tangatá ni ke ne siviʻi e ngāue fakaʻuhila ʻi he ngaahi ngāue langa ne fai ʻi he kauʻāfonua ʻo ʻOamani mo ʻIemení. Ne fakataimi-tēpileʻi ke ma ngāue fakataha ʻi ha houa nai ʻe taha kimuʻa peá ne foki atu ki he hetikuotá.

ʻI heʻene tūʻuta angé, naʻá ne siviʻi e ngāué pea fakafiemālie e meʻa kotoa ki ai. Lolotonga ʻema ngāue fakatahá, naʻe tukutaha pē ʻema talanoá ʻi he ngāué peá u toki lele leva ʻo ʻave ia ki he malaʻevakapuná.

Ko ha faʻahitaʻu ʻuha ia, pea naʻe ʻaoʻaofia e tōʻanga vakapuná ʻa ia naʻe ʻi ha tafatafa moʻunga ʻoku fute ʻe 6,000 (1,830 m) ʻi ʻolunga ʻi he Tahi ʻInitiá. ʻE toe toloi e taimi puna hoku kaungā ngāué.

Naʻe vave e tā hoku mafú ʻi heʻeku ʻiloʻi te u nofo ʻo tatali mo e tangatá ni ʻi he kaá. Hili haʻaku lotu fakalongolongo pē, ne haʻu ha fakakaukau ke u ʻeke ki he tangatá ʻo kau ki hono fāmilí, kae tautautefito ki hono uaifí.

ʻI heʻeku fai iá, ne fakafokifā e tangi ʻa e tangata ʻenisiniá, ʻo ne talamai naʻá ne toki maʻu ha fakamatala ʻoku feinga hono uaifí ke na vete. Ne haʻu ki hoku ʻatamai he taimi pē ko iá ʻa e foʻi lea ko e ʻofá, pea ʻi he houa ʻe ua hono hokó naʻá ma talanoa ki he ʻofa ʻoku totonu ke tau maʻu ki he niʻihi kehé pea mo e ʻofa ʻoku maʻu ʻe he ʻEiki ko Sīsū Kalaisí maʻatautolu kotoá. Ne vave pē haʻaku fakatokangaʻi hake kuó ma hoko ko ha kaungāmeʻa. ʻI he fakaʻosiʻosi ʻema pōtalanoá, ne maʻa e langí pea heka leva e ʻenisiniá ki he vakapuná. Ne taimi siʻi pē mei ai ne u fanongo kuó ne fakafisi mei hono lakangá ʻo foki ki ʻapi.

Hili ha ngaahi taʻu siʻi mei ai lolotonga haʻamau lue mo e kau talavou ʻo e Lakanga Taulaʻeiki Faka-ʻĒloné ʻi Pilīmifi, ko ha kolo he matāfanga ʻi he tafaʻaki fakatonga ʻo ʻIngilaní, naʻá ku fakatokangaʻi ha tangata ʻoku lue mai kiate au. ʻI heʻene aʻu maí, naʻá ne pehē mai, “Ne u sio mai pē ko koe ʻeni, Niila.”

Ko e tangata ʻenisinia ʻeni mei ʻOamaní. He ʻikai ke toe ngalo ʻiate au ʻene lea naʻe fai maí: “Fakamālō atu ʻi hoʻo talanoa mai kiate au fekauʻaki mo e ʻofá he ʻaho ko ē ʻi he moʻungá. Naʻá ke fakahaofi ʻeku nofo malí, pea te u houngaʻia ai ʻo taʻengata.”

Ne ma talanoa taimi siʻi pē peá ne mavahe. Kuo teʻeki ai ke ma toe feʻiloaki.

Te u fakamālō maʻu pē koeʻuhí ko e ueʻi fakalaumālie ko ia ne u maʻu ʻi ʻOamaní. Naʻá ne tāpuakiʻi ʻa e tokotaha ʻenisiniá pea ʻomi kiate au ha mālohi ke ne fakatuʻumaʻu ʻeku tui ki he Siasí ʻi he taimi ne u nofo toko taha ai mo mamaʻo mei ʻapí.