Ko e Misiona Fakalangi ʻo Sīsū Kalaisí: Ko e Taukapó

Ako ʻi he faʻa lotu ʻa e fakamatala ko ʻení pea feinga ke ke ʻilo e meʻa ke vahevahé. ʻE fakatupulaki fēfē ʻe he mahino ki he moʻui mo e misiona ʻo e Fakamoʻuí hoʻo tui kiate Iá mo tāpuekina ai kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.

Tuí, Fāmilí, Fakafiemālié

ʻĪmisi

Jesus Christ depicted leaning on a rock in the Garden of Gethsemane. The image depicts the Atonement of Christ.

Not My Will, but Thine, Be Done, tā ʻe Harry Anderson

Ko Sīsū Kalaisi ʻa hotau Taukapo ki he Tamaí. Ko e foʻi lea ko e taukapó ʻoku ʻi ai hono ʻuhinga faka-Latina “ko ha taha ʻokú ne tautapa maʻa ha taha kehe.”¹ ʻOku tautapa ʻa e Fakamoʻuí maʻatautolu, ʻo ngāue ʻaki e mahino, fakamaau totonu, mo e ʻaloʻofa. ʻOku lava ʻe he ʻilo ko ʻení ʻo fakafonu ʻaki kitautolu ʻa e ʻofa mo e houngaʻia ʻi Heʻene Fakaleleí.

“Fanongo kiate ia [Sīsū Kalaisi] ʻa ia koe taukapo ki he Tamaí, ʻa ia ʻokú ne taukapoʻi ʻa kimoutolu ʻi hono ʻaó—

“ʻO pehē: ʻE Tamai, vakai ki he ngaahi mamahi mo e mate ʻaʻana ʻa ia naʻe ʻikai te ne fai ha angahalá, ʻa ia naʻá ke hōifua lelei ki aí; vakai ki he toto ʻo ho Fohá ʻa ia naʻe lilingí, ʻa e toto ʻo ia naʻá ke foaki koeʻuhi ke fakalāngilangiʻi koé;

“‘Ko ia, ʻe Tamai, fakamoʻui ʻa kinautolú ni ko hoku kāinga ʻa ia ʻoku tui ki hoku hingoá, koeʻuhi ke nau haʻu kiate au ʻo maʻu ʻa e moʻui taʻengatá’ T&F 45:3–5.

Naʻe pehē ʻe ʻEletā D. Toti Kulisitofasoni ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo kau ki he hoko ʻa Kalaisi ko hotau Taukapó: “ʻOku fuʻu mahuʻinga kiate au, ʻa e lava ke u lotuʻi ha faʻahinga taimi pea ʻi ha faʻahinga tūkunga pē ke hū atu ʻi he lotú ki he taloni ʻo e ʻaloʻofá, pea fanongo mai ʻeku Tamai Hēvaní ki heʻeku kolé, koeʻuhi he ko hoku Taukapó, ʻa ia naʻe ʻikai haʻane angahala, ne lilingi hono taʻataʻá maʻakú, te ne tautapa maʻaku.”²

Toe Fakalahi mei he Folofolá

Mōsaia 15:8–9; Molonai 7:28; Tokāteline mo e Ngaahi Fuakavá 29:5; 110:4

Mei he Folofolá

ʻI hono kotoa e hisitōlia ʻo e Siasi ʻo e ʻEikí, ne moʻui ʻaki ʻe he kau ākonga fefine ʻa Sīsū Kalaisí ʻEne sīpingá. Ko ʻĒsetá ko ha tokotaha faivelenga mo loto-toʻa. Ne ʻave ki ai ʻe hono kāinga ko Motekiaí ha tatau ʻo e tuʻutuʻuni ʻa e tuʻí ke fakaʻauha e kau Siú, pea naʻá ne tala kiate ia “ke fai ʻa e kole [ki he tuʻí] maʻa hono kakaí.” Naʻá ne toe pehē: “Pea ko hai ʻoku ne ʻiloʻi naʻa kuó ke hoko ai koe ki he puleʻangá koeʻuhí ko ha kuonga peheni?” (ʻĒseta 4:8, 14.)

Neongo e fakatuʻutāmakí, ne loto ki ai ʻa ʻĒseta: “Pea ko ia te u hū ai ki he tuʻí, ʻa ia ʻoku ʻikai taau mo e fonó: pea kapau te u mate ai, te u mate pē” (ʻĒseta 4:16).

Ne lea angavaivai ʻa ʻĒseta ki he tuʻí pea “fakatōmapeʻe ki hono vaʻé, ʻo ne kole tangi loʻimata [kiate ia] … ke fakakehe ʻa e ngaahi tohí … ki he fakaʻauha ʻa [e kau Siú].” Naʻá ne pehē, “ʻE anga fēfē haʻaku kātakiʻi ke sio ki hono fakaʻauha ʻo hoku kāingá?” (vakai, ʻĒseta 8:3, 5–6). Naʻe molū e loto ʻo e tuʻí pea naʻá ne tali ʻene kolé.³