ʻI heʻeku talanoa mo hoku kaungāmeʻá ʻo kau ki he Siasí, ʻoku nau talamai ʻoku ʻikai ke nau saiʻia ai koeʻuhí he ʻoku fuʻu lahi e ʻū laó. Ko e hā te u talaange kiate kinautolú?

ʻE kaunga lahi ʻetau tōʻonga fakakaukau ki ha faʻahinga “laó” ki he meʻa ʻoku tau anga ki aí. Kapau ʻoku anga ho kaungāmeʻá ki he taʻe fulunifó pea ke talaange kiate kinautolu ʻokú ke fulunifo he ʻaho kotoa pē koeʻuhí he naʻe akoʻi pehē koe, te nau fakakaukau kinautolu ko ha lao ia ʻoku pule fakamālohi. Ka ʻoku ʻikai ke ke fakakaukau koe ko ha lao ia koeʻuhí he kuo hoko ia ko ha meʻa ke anga ʻaki, ko ha tōʻonga moʻui. Neongo ʻenau fakakaukau ko ha faʻahinga tauʻatāina e taʻe fulunifó, ʻokú ke ʻilo ʻe koe ʻa e ngaahi palopalema ʻe fakaiku ki aí mo e ongoʻi lelei lahi ange ke maʻu ha nifo ʻoku maʻa mo moʻui leleí.

ʻOku pehē pē mo e ngaahi “lao” ʻa e Siasí. ʻE lava ke fakakaukau ho kaungāmeʻá ʻoku fakapōpula ʻa e ngaahi tuʻunga moʻui ʻoku tau muimui ki aí, ka ʻokú ke ʻiloʻi kuo foaki mai kinautolu ʻe he ʻEikí mo ʻEne kau tamaioʻeikí ke tokoni ke tau moʻui ʻaki ha moʻui ʻoku lelei angé mo toe foki ki he Tamai Hēvaní. ʻOku toe ʻomi maʻu pē foki ʻe he talangofua ki he ngaahi fekau ʻa e ʻOtuá e ngaahi tāpuakí, taʻe lau ki ai e takaua ʻo e Laumālie Māʻoniʻoní. Te ke lava ʻo fakamatalaʻi e ngaahi lelei mo e ngaahi tāpuaki ko ʻení ki ho kaungāmeʻá, pea ʻe lava ke ke fakahā kiate kinautolu ko e founga pē ke nau ʻiloʻi ai pe ko e “ngaahi laó” ʻeni mei he ʻOtuá ko haʻanau ʻahiʻahi kinautolu (vakai, Sione 7:17).