Naʻe Tali ʻe Nīfai ʻEku Ngaahi Fehuʻí

Siuti M. Sāmita, Kenisesi, USA

Naʻe fāʻeleʻi au ʻi he Siasí, ka naʻe tātātaha pē ha ʻalu hoku fāmilí ki he lotú ʻi heʻeku tupu haké. Ka neongo ʻeni, naʻá ku maʻu maʻu pē ha founga ke u ʻalu ai ki he lotú. ʻI he konga kimuʻa ʻo e 1970 ne u hoko ai ko ha faiako semineli ʻi Pitisipeeki ʻi Kenisesi, USA. ʻI he taimi ne mau ako ai e Tohi ʻa Molomoná, ne u fakatukupaaʻi e kalasí—kau ai mo au—ke mau lau kotoa e tohí. Ne u maʻu ha fakamoʻoni mālohi lolotonga haʻaku laukonga ʻi ha ʻaho ʻe taha, ʻoku moʻoni ia.

Hili ha ngaahi taʻu siʻi mei ai ne ʻaʻahi ange ʻeku ongomātuʻá. Lolotonga ʻena ʻaʻahí, ne ʻohake heʻeku tamaí ha ngaahi meʻa ne ma tō kehekehe ai pea ʻikai ke u loto ke aleaʻi mo ia. Neongo ia, naʻá ne vili taʻeʻunua pē, pea ne u meimei ʻita ai. Ne u mavahe ʻi ha kiʻi taimi siʻi ʻou ʻalu ki hoku loki mohé, peá u tūʻulutui ai ʻo lotu ki he Tamai Hēvaní mo kole kiate Ia ke tokoni ʻi heʻeku fehangahangai mo ʻeku tamaí. Naʻe hoko mai ʻa e talí ʻi ha foʻi fakakaukau: ko e fakamatala kia Nīfai mo e kaufana naʻe motú.

Naʻá ku sio ki he talanoá ʻi he 1 Nīfai vahe 16. Naʻá ku fakakaukau ki he loto-fakatōkilalo feʻunga ʻa Nīfai ke ʻalu ki heʻene tamaí, ʻa ia ne lāunga ki he ʻEikí, ʻo kole ke ʻilo e feituʻu ʻoku totonu ke ʻalu ki ai ke maʻu ai ha meʻakaí (vakai, veesi 23). Ne u ongoʻi mālohi ke fai e foʻi fakakaukau ko iá, ke ʻalu ʻo kole ha tataki mei heʻeku tamaí pea pehē ki ha tāpuaki ʻo e lakanga fakataulaʻeikí.

ʻI he taimi naʻá ku foki ai ki he loki talanoá ʻo kole ki he Tangataʻeikí ke ne fakahoko ha tāpuakí, naʻe ongo ia ki hono lotó pea kamata ke ne tangi. Naʻá ne pehē mai, “Tuku ke u fakakaukau ki ai.”

Naʻá ne ʻaukai mo lotu ʻi he ngaahi ʻaho ne hokó. Kimuʻa pea mavahe e Tangataʻeikí mo e Fineʻeikí, naʻá ne foaki mai ha tāpuaki fakaʻofoʻofa.

Hili e meʻa ko iá, naʻe kamata ke liliu e Tangataʻeikí. ʻI heʻena foki mei Kenisesí, ne ʻaʻahi ʻeku ongomātuʻá ki ʻĀtama-ʻonitai-ʻĀmani ʻi Mīsuli, USA, ʻa ia ne maʻu ai ʻe heʻeku tamaí ha aʻusia fakalaumālie mālohi.

Ne ʻikai fuoloa mei ai, kuo mālohi mo hoko ʻeku ongomātuʻá ko ha Kāingalotu moʻui tukupā. ʻI he ngaahi taʻu lahi hoko maí, naʻá na ngāue fakafaifekau fakataha tuʻo ua—ko e taha ʻi Siamane mo e taha ʻi he Temipale Sikuea ʻi Sōleki Siti. Naʻe hoko e tangataʻeikí ko ha pēteliake fakasiteiki ʻi he taimi naʻá ne pekia ai ʻi he 1987.

Naʻe ʻafioʻi ʻe he ʻEikí ko ha tangata lelei ʻa e Tangataʻeikí. Naʻe maʻu ʻeku talí mei he Tohi ʻa Molomoná, pea ʻi heʻeku ngāueʻi e ueʻi ko iá ne ʻilo ai ʻe he Tangataʻeikí ʻoku fie maʻu ke ne hoko ko ha taki ki homau fāmilí. Naʻe liliu ʻe he aʻusia ko ʻení e meʻa kotoa pē maʻamautolu.

Kuó u ʻilo ko e Tohi ʻa Molomoná ko ha fakamoʻoni moʻoni ia ʻe taha ʻo Sīsū Kalaisi pea naʻe hiki ia maʻa hotau kuongá ni. ʻOku ou ʻilo ʻe lava ke u tafoki ki ai ʻi he taimi ʻoku ou loto-foʻi aí pe ʻi ha faʻahinga tūkunga pē. ʻOku maʻu ʻa e ngaahi talí ʻi he Tohi sʻa Molomoná.

Ko e moʻoni, “ʻe fakahā kiate [kitautolu] ʻe he ngaahi folofola ʻa Kalaisí ʻa e ngaahi meʻa kotoa pē ʻoku totonu ke [tau] faí” (2 Nīfai 32: 3).