ʻOku Tau Faiako ʻi he Mālohi ʻo e Laumālie Māʻoniʻoní

ʻOku mau tui ko hono akoʻi ko ia e ongoongolelei ʻo Sīsū Kalaisí ʻaki e mālohi ʻo e Laumālie Māʻoniʻoní he ʻoku mahuʻinga ia ki he ngāue ʻo e fakamoʻuí. ʻOku tokoni e faiako leleí ke tupulaki e tui mo e holi ʻa e kakaí ke nau moʻui ʻaki e ongoongoleleí. ʻOku lava ke fakahoko e faiakó ʻi ha ngaahi tūkunga lahi, hangē ko hano fai e lēsoní mo e lea ʻi he lotú; ka ʻoku tau toe faiako foki he taimi ʻoku tau aleaʻi ai ha folofola mo ha mēmipa ʻo e fāmilí pe taimi ʻoku tau fakamatalaʻi ai ki he kaungāʻapí e lakanga fakataulaʻeikí.

Fakakaukau ki he ngaahi tefitoʻi moʻoni ko ʻeni ʻe fā ki he faiako ʻoku ola leleí:

ʻOfa ʻi he niʻihi ʻokú ke akoʻí. Feinga ke maheni mo kinautolu. ʻI hoʻo teuteu ke akoʻi kinautolú, fakakaukauʻi ʻi he faʻa lotu ʻenau ngaahi fie maʻú. Feinga ke fakaʻaongaʻi ha ngaahi founga fakafaiako kehekehe: ʻoku lava ke mahino ki he kakai kehekehe e ngaahi founga kehekehe ʻo e faiakó (sio ki ha ngaahi fakakaukau ʻi he toʻomataʻú).
Faiako ʻaki e Laumālié. Naʻe akonaki ʻa Nīfai ʻo pehē: “He ʻo ka lea ha tangata ʻi he mālohi ʻo e Laumālie Māʻoniʻoní, ʻoku fakahū ia ʻe he mālohi ʻo e Laumālie Māʻoniʻoní ki he loto ʻo e fānau ʻa e tangatá” (2 Nīfai 33:1). ʻI hoʻo faiakó, te ke lava ke fakaafeʻi e tākiekina ʻa e Laumālié ʻaki ha fakamoʻoni mo ngāue ʻaki e folofolá pea mo e ngaahi akonaki ʻa e kau palōfita ʻo e ngaahi ʻaho kimui ní. Lotua e tataki ʻa e Laumālie Māʻoniʻoní ʻi hoʻo teuteu ke faiakó. Te ne lava ke ueʻi koe ke ke ʻiloʻi e founga fakafaiako lelei tahá.
Akoʻi e tokāteliné. ʻOku maʻu e tokāteliné—ngaahi moʻoni taʻengata mei he ʻOtuá ʻi he ngaahi nāunau fakalēsoni kuo tali ʻe he Siasí, hangē ko e folofolá, ngaahi lea mei he konifelenisi lahí, mo e ngaahi tohi lēsoní.
Fakaafeʻi e ako fakamātoató. ʻI hoʻo faiakó, manatuʻi ʻoku fai pē ʻe he niʻihi ʻoku fanongó ʻenau akó. Poupouʻi ke nau fai ha fehuʻi, vahevahe ʻenau fakakaukau ʻi he kaveingá, mo fakalaulauloto ki he founga te nau moʻui ʻaki ai e ngaahi tefitoʻi moʻoni ʻo e ongoongoleleí. ʻE tupulaki ʻenau fakamoʻoni ki he ngaahi tefitoʻi moʻoni ko iá ʻi heʻenau moʻui ʻaki kinautolú (vakai, Sione 7:17).

Naʻe lea ʻa Palesiteni Kōtoni B. Hingikelī (1910–2008) ki he mahuʻinga ʻo e faiako leleí: “ʻE toki maʻu pē ʻe he kakai tangatá mo fafiné ʻa e moʻui taʻengatá ʻi hano akoʻi lelei ʻaupito ʻo liliu mo fakatonutonu ai ʻenau moʻuí. He ʻikai lava ke fakamālohiʻi kinautolu ke nau moʻui māʻoniʻoni pe ke hū ki he langí. Kuo pau ke tataki kinautolu, ʻa ia ko hono akoʻi lelei” (ʻi hono fakamatalaʻi ʻi he Jeffrey R. Holland, “A Teacher Come from God,” Ensign, May 1998, 26).