ʻOatu ʻe he Kau TAKÍ ha Fakafiemālie mo e Tokoni ʻi he ʻOtu Filipainí

ʻI Fēpuelí, hili ha ʻaho ʻe 100 mei he maumau lahi ne fakahoko ʻe he Afā ko Haiení ʻi Takolopaní, ne folau atu ʻa Sisitā Linitā K. Pētoni, palesiteni lahi ʻo e Fineʻofá mo Sisitā Kalo F. Makongikī, ko e tokoni ʻuluaki ʻi he palesitenisī lahi ʻo e Kau Finemui ki he feituʻu ne hoko ai e fakatamakí ʻo ʻoatu ha tokoni mo ha fakafiemālie.

Naʻe pehē ʻe Sisitā Pētoni, “Naʻá ku ʻiloʻi he ʻikai lahi ha meʻa te u lava ʻo fai, ka naʻá ku ʻiloʻi ne fie maʻu ke u haʻu ki Takolopani pea fāʻofua ki he kakai ne u lava ʻo aʻu ki aí.”

Ne fakaʻauha ʻe he Afā ko Haiení ha ʻapi ʻe 1.1 miliona tupu ʻi he uhouhonga ʻo e ʻOtu Filipainí, ʻo pekia ai ha toko 6,100 tupu, kau ai ha kāingalotu ʻe toko 42. Hili e matangí, ne ʻoatu ʻe he Siasí ha nāunau tokoni fakavavevave pea nau ngāue fakataha mo e gnaahi kautaha fakalotofonua mo fakavahaʻapuleʻangá ke ʻoatu ha tokoni fakameʻatokoni, nofoʻanga, nāunau ke fakamaʻa e vai, fetuku e ngaʻotoʻotá, pea toe fakafoki e maʻuʻanga moʻuí.

Naʻe fakamatala fakatouʻosi ʻa Sisitā Pētoni mo Sisitā Makongikī naʻá na ʻilo ʻoku ʻi ai e ʻamanaki leleí mo e fakatuʻamelié ʻi he lotolotonga ʻo e Kāingalotú, ʻa ia ʻoku nau toe langa honau ʻapí pea fakamālohia ʻenau fakamoʻoní ʻi heʻenau fetokoniʻakí.