Hā e Ngaahi Kautaha Tokoni ʻOfa ʻa e Siasí ʻi he Polokalama ʻa e Puleʻanga Fakatahatahá

Ne hā e ngāue ʻa e Ngaahi Kautaha Tokoni ʻOfa ʻa e Siasí ʻi ha fealēleaʻaki fakapēnolo ʻi he hetikuota ʻo e Ngaahi Puleʻanga Fakatahatahá ʻi Niu ʻIoke, USA. Ko e polokalamá, “Ko Hono ʻIloʻi ʻo e Tui Faka-lotu Māmongá mo Hono fatongia ʻi he Tokoni ʻofa Fakaetangatá,” naʻe kau ia he ngaahi polokalama ko e Tokanga Taha ki he Tuí ʻa ia ʻoku fakalele ʻe he konga ki he ngaahi kautaha tāutaha ki he Fakamatala maʻá e Kakaí ʻa e Ngaahi Puleʻanga Fakatahatahá.

Ne fakamatala ʻa Filipe Keipō ko e tokotaha naʻá ne tokangaʻi e fealēleaʻaki fakapēnoló pea ko ha tokoni fai fakamatalá ʻi he Kautaha ʻa e Ngaahi Puleʻanga Fakatahatahá pea ko e mēmipa ʻo e Siasí mei Sipeini ʻo pehē, “ʻOku fakataumuʻa ʻa e ngaahi fakamatala ko ʻení ke ʻoatu ha mahino lahi ange ki hono maʻu ʻe he ngaahi tui kehekehé e ngaahi tefitoʻi moʻoni tatau ʻo hangē ko e anga faʻa kātakí, fakaʻapaʻapaʻi e niʻihi ʻoku kehe meiate kitautolú, pea mo ha tukupā ke maʻu ha founga ke fakaleleiʻi e ngaahi fetaʻemahinoʻakí ʻi ha founga melino.”

Ne pehē ʻe Seuloni ʻIupengi ko e talēkita ʻo e Ngaahi Kautaha Tokoni ʻOfa ʻa e Siasí ʻa ia ne kau atu ki he fealēleaʻakí, “Ko hono tokangaʻi e masivá ko ha tefitoʻi fatongia kamata ia ʻo ha taha ʻokú ne fakaʻapaʻapaʻi ʻa e ʻOtuá mo e anga e feohi fakatokoua ʻa e taha kotoa pē—ke tokoni, hiki hake, tāpuakiʻi, pea fakafiemālieʻi ʻa e faingataʻaʻia ʻo tatau ai pē pe ko e hā e fakakaukau fakalotu, fakasōsiale, fakafonua, matakali, tuʻunga tangata pe fefiné, pe puipuituʻá.”

Naʻá ne toe fakamanatu foki ʻi heʻene leá ʻa e taumuʻa ʻa e Ngaahi Kautaha Tokoni ʻOfa ʻa e Siasí kuo fakamatalaleá: ke fakafiemālieʻi e faingataʻaʻiá, ohi ʻa e moʻui fakafalala pē kiate kitá, pea ʻomi ha ngaahi faingamālie ke tokoni ki he ngaahi fāmili ʻo e fonua kotoa pē. Naʻá ne pehē ko e ngaahi ngāue mahuʻingá ko e vai maʻá, fakaake ʻo e fānau valevalé, tokangaʻi e matá, tufaki ʻo e sea saliote teketeké, huhu maluʻí, meʻatokoní, mo e tokoni ki he meʻa fakatuʻupakeé.

Ne kau ʻi he niʻihi ne kau maí ko e Kāingalotu ʻo e Siasí ʻa ʻĀmeti S. Kōpeti, ko e talēkita ʻo e ʻŌfisi ʻo e Siasí ʻi Niu ʻIoke ki he Fetuʻutaki mo e Kakaí pea mo Fakavahaʻapuleʻangá, Sione P. (Fili) Kolotoni ʻa ia ʻokú ne hoko mo hono uaifí ko Papulaá ko ha fakafofonga ʻo e Ngaahi Kautaha Tokoni ʻOfa ʻa e Siasí ʻi he Ngaahi Puleʻanga Fakatahatahá.

Naʻe pehē ʻe Misa Kōpeti ʻoku ʻi ai ha “kakai lelei ʻi he tui fakalotu kotoa ʻi he māmaní,” ʻo ne fakamamafaʻi ʻa e mahuʻinga ʻo e ngāue fakatahá. Naʻe fakamatalaʻi ʻe Misa Kolotoni ha ngaahi founga ʻoku ʻoatu ai ʻe he Ngaahi Kautaha Tokoni ʻOfa ʻa e Siasí ha tokoni ki ha kakai ʻe meimei toko ua miliona ʻi ha ngaahi fonua ʻe 132 lolotonga e 2013.