Ngāué mo e Moʻui Fakafalala Pē Kiate Kitá

ʻI he ako ʻa e toʻu tupú mo e fānaú ke ngāue mālohi mo fakafalala pē kiate kinautolú, ʻoku nau teuteu ai ke “tokoni ki he māmani ʻoku [nau] nofo aí” (Ki Hono Fakamālohia ʻo e Toʻu Tupú [2011], 40).

ʻI he peesi 56–57 ʻo e Liahona ko ʻení, ʻoku vahevahe ai ʻe Lenitolo L. Liti, ko e tokoni ua ʻi he kau palesitenisī lahi ʻo e Kau Talavoú e meʻa naʻá ne ako ʻi hono fai e ngāue langá mo ʻene tangataʻeikí. ʻOkú ne fakamatalaʻi e mahuʻinga ʻo e ngāue mālohí, maʻu ha ʻulungaanga leleí, mo hono langa hake e puleʻanga ʻo e ʻOtuá. ʻOku fakamanatu mai ʻe Misa Liti kiate kitautolu: “Ko ia, ko hai ʻoku fie maʻu ke ngāué? Ko kitautolu hono kotoa! ʻOkú ne fakatupu ai ʻa e moʻui fakafalala pē kiate kitá, lavameʻá, mo e fiefia ʻi he moʻui ní. ʻI hoʻo kau mai mo e loto fiefia ki he ngāué, ʻe utu ʻe he taha kotoa ʻoku mou feohí ha ututaʻu fakaʻofoʻofa koeʻuhí ko e tenga ʻokú ke toó.”

Ngaahi Fokotuʻu ki hono Akoʻi ʻo e Toʻu Tupú

ʻOku pehē ʻe he Ki Hono Fakamālohia ʻo e Toʻu Tupú, “Fokotuʻu maʻau ha ngaahi taumuʻa ʻoku māʻolungá, pea ke loto fiemālie ke ngāue mālohi ke lavaʻi kinautolu” (40). Mahalo te ke loto ke sio mo hoʻo fānaú ʻi he foʻi vitiō mei he Pōpoaki Faka-Māmonga maʻá e Toʻu Tupú ko e “A Work in Progress” (vakai, ki he vitiō ʻo e Nofomalí mo e Fāmilí ʻi he mormonchannel.org/come-follow-me). Pea ngāue fakataha ke fokotuʻu ha ngaahi taumuʻa mo faʻu ha palani ke lavaʻi ai kinautolu.
ʻOku faingofua ange ʻa e ngāué he taimi ʻoku tau maʻu ai ha ʻulungaanga ʻoku leleí. Lau ʻa e “Hiki e Paipa Fuʻifuʻí ʻi ha Sū Pelepela” ʻi he peesi 58–59 ʻo e makasini ko ʻení pea aleaʻi e founga ʻoku uesia ai ʻe hoʻo tōʻonga moʻuí hoʻo ngāué.
“Ko e founga ʻe taha ʻo e nofonoá ʻa hono fakamoleki ʻo ha taimi lahi ʻi he ngaahi ʻekitivitī ko ia ʻoku nau taʻofi koe mei hono fai ʻo ha ngāue ʻoku ʻaongá, hangē ko hono fakaʻaongaʻi ʻo e ʻInitanetí, vaʻinga keimi vitioó, mo e sio televīsoné.” (Ki Hono Fakamālohia ʻo e Toʻu Tupú, 40). ʻEke ki hoʻo fānaú pe ko e hā e ngaahi lelei mo e fakatuʻutāmaki ʻo e ʻInitanetí, vaʻinga keimi vitioó, mo e televīsoné. Ko fē e taimi ʻoku hoko ai e ngaahi meʻangāue ko ʻení ko ha fakahalá? Ko e hā e ngaahi tāpuaki ʻoku maʻu mei he ngāue ʻoku ola leleí? Fakakaukau ke tokoniʻi hoʻo fānaú ke nau aʻusia e ngaahi tāpuakí ni ʻaki hano taʻofi fakataimi kotoa hano ngāue ʻaki e ngaahi tekinolosiá kae kau fakataha ki ha foʻi ngāue.

Ngaahi Fokotuʻu ki hono Akoʻi ʻo e Fānaú

Ko e ngāue fakafaifekaú ko ha ngāue lahi, pea ʻe tokoni ke ako e fānaú ke moʻui fakafalala pē kiate kitá ʻi heʻenau teuteu ki he ngāue ko iá. Fokotuʻu mo hoʻo fānaú ha lisi ʻo e ngaahi ngāue fakaʻapi ʻoku totonu ke poto e kau faifekaú hono fakahokó (hangē ko ʻení, fai e foó, feimeʻatokoní, mo e fakamaʻá). Pea fai fakataha e ngaahi ngāue ko iá.
ʻOku fakamanatu mai kiate kitautolu ʻe Misa Liti ʻi heʻene fakamatalá “ko e ngāue mahuʻinga tahá e ngāue ʻa e ʻOtuá.” ʻE tokoni fēfē ho fāmilí ki hono fakahoko e ngāue ʻa e ʻEikí? Fakakaukau ki ha ʻekitivitī te mou lava ke fakahoko fakataha ʻe tokoni ke ʻomi ai e niʻihi kehé ke nau toe ofi ange ai kia Kalaisi.
Ko e konga ʻe taha ʻo e moʻui fakafalala pē kiate kitá ko e ako ki he founga hono fakapotopotoʻi ʻo e paʻangá. Akoʻi ki hoʻo fānaú ʻa e ngaahi tefitoʻi moʻoni ʻo e patisetí pea mo e mahuʻinga hono ʻai e vahehongofulú ke hoko ko ha konga ʻo ʻenau patisetí.