Ko ʻEtau Tafaʻakí
Papitaiso maʻa ʻEku Kui Tangatá
ʻOku ou fakamālō ki hono fokotuʻutuʻu ʻe homau kau taki ʻo e toʻu tupú ke fai ha ʻaʻahi ki he temipalé. ʻI heʻemau teuteu atu ki he folau ko ʻení ki Apia, Haʻamoá, naʻa mau fiefia ʻi he faingamālie hāhāmolofia ko ʻení. Ne mau ō fiefia ki he temipalé ke fakahoko e papitaiso maʻá e kau pekiá—maʻanautolu ʻoku ʻi he maama tataliʻanga ʻo e ngaahi laumālié ʻo tatali mai kiate kimautolu ke kumi homau hisitōlia fakafāmilí pea fai ha ngāue maʻanautolu.
Lolotonga ʻa e papitaisó, naʻá ku fakatokangaʻi ha talavou ʻi heʻemau kulupú naʻá ne papitaiso maʻá e Faʻatanga Akavale, ko ʻeku kui tangatá. Ne u ongoʻi e loʻimata ʻo e fiefiá, pea naʻá ku ʻiloʻi naʻe ʻi ai hono laumālié. Naʻá ku fiefia lahi ne ma lava ke fai ha ngāue kiate ia ʻi he temipalé.
Seini Akavale, Haʻamoa
Ko e Fakamatala Mahuʻinga mei ha Kaungāmeʻa
ʻI heʻeku kei siʻí ne ʻikai ke u saiʻia he ʻalu ki he lotú, pea ʻikai ke u ʻilo lahi ki he Tohi Tapú pe ʻOtuá, pea naʻe ʻikai pē foki ki he fie maʻu ia ʻe au. ʻI hoku taʻu 17, naʻe talamai ʻe haku kaungāmeʻa ko ha Māmonga ia. Naʻe ʻikai haʻaku ʻilo pe ko e hā ʻa e Māmonga. Naʻá ku talaange ki hoku kaungāmeʻá, “Kapau te u fie maʻu ke ʻilo ha meʻa kau ki he siasi ko iá, te u fekumi pē au ki ai.”
Naʻá ne sio ʻoku ʻikai ke u fuʻu tokanga ki ha tui fakalotu, pea naʻá ne ʻomi ha Tohi ʻa Molomona kiate au mo kole mai ke u lau mo lotua ia. Naʻe ʻikai ke ne fakamālohiʻi au. Kimui ange he pō ko iá ʻi heʻeku fakaava hake e tohí, naʻá ku fakatokangaʻi ʻoku tohi ʻene fakamoʻoní ʻi he tafaʻaki ki muʻá. ʻI heʻeku lau iá, ne u ongoʻi ʻoku totonu ke u ako lahi ange ki he Tohi ʻa Molomoná. Ko ia ne u kamata lau ʻa e 1 Nīfaí. Ne ʻikai ke lava ke toe tuku ʻeku lau e tohí. Naʻá ku fie maʻu ke u ʻilo lahi ange.
Naʻe akoʻi au ʻe hono fāmilí ʻi ha efiafi fakafāmili kau ki he ongoongolelei ʻo Sīsū Kalaisí. Naʻe hangē ne ʻuhinga lelei e meʻa kotoa pē. Ne vave pē hono akoʻi au ʻe he kau faifekaú pea papitaiso mo hilifakinima ko ha mēmipa ʻo e Siasi moʻoni ʻo e ʻEikí. Naʻe tokoniʻi au ʻe he ongoongoleleí ke u ʻiloʻi ko hai au, ne u haʻu mei fē, pea mo e feituʻu te u ʻalu ki aí kapau te u faivelenga.
ʻI heʻeku toe manatu ki he meʻa ne hokó, ne lava ke u sio ki he anga hono tokoniʻi au ʻe he Laumālie Māʻoniʻoní ke u fie ako lahi angé. ʻI he lahi ange ʻeku akó, naʻe liliu ʻeku fakakaukau ki he siasí mo e ʻOtuá. Ko e fuofua taimi ia ʻi heʻeku moʻuí ne u loto ai ke fai e meʻa naʻá Ne finangalo ke u faí.
Naʻe liliu ʻe he Tohi ʻa Molomoná ʻeku moʻuí, pea ʻoku ou fakamālō ki hoku kaungāmeʻa naʻá ne vahevahe mai ia kiate aú. ʻOku vahevahe ʻe he kaungāmeʻa moʻoní ha faʻahinga fakamatala mahuʻinga hangē ko ʻení.
Maikolo P., ʻOhaiō, USA