Fiefia ke Tokoni
ʻOku nofo e tokotaha naʻá ne faʻu e talanoá ʻi ʻIutā, USA.
“Fiefia he tokoní” (Tohi Hiva ʻa e Fānaú, 108).
Naʻe fakafalala atu ʻe Viliami ʻene leikí ʻi he tuʻa falé peá ne fakatōmapeʻe hifo ʻi he musié. Ko e ngāue faingataʻa moʻoni hono leikiʻi e lauʻiʻakaú, kae mālō kuo ʻosi heʻene fakahoko ia mo hono ongo tuofāfiné, ʻa Koloa mo ʻAmelia. Naʻá ne sio hake ki ʻolunga ʻi he ʻotu moʻunga ʻAlapesí ki ha vakapuna ʻoku puna hake. Naʻá ne fifili pe ʻoku puna ki fē.
Naʻe saiʻia ʻaupito ʻa Viliami ʻi hono kiʻi koló ne ofi he kauʻāfonua Falanisē-Suisalaní. ʻOku ʻaʻahi mai ki ai e kakai mei he funga ʻo e māmaní. Naʻá ne fakakaukau ki he ngaahi feituʻu ʻokú ne fie ʻalu ki aí, ʻa e kakai ʻokú ne fie feʻiloaki mo iá, mo e ngaahi ʻeveʻeva te ne ala fakahoko ʻi ha ʻaho.
Naʻe ofongi ʻene ʻāveá ʻe he mapumapu mo e pākakihi ʻa e taulaka holo ʻi he loto ʻataʻatā ʻo e ʻapi hokó.
“Pau pē ʻoku teuteu atu ʻa Paté ke leikiʻi ʻene lauʻiʻakaú,” ko e fakakaukau ia ʻa Viliamí. “ʻOku ou fiefia au kuo mau lava mautolu.”
“Ka ʻo kapau ʻoku faingataʻa ʻa e leikí ki he toko tolú, pau pē ʻoku mātuʻaki faingataʻa ki he toko tahá!” Ko e fakakaukau ia ʻa Viliamí. Ne toki fakahoko hano tafa ʻo e uaifi ʻo Paté, ko Peemi, ko ia ʻe leikiʻi tokotaha pē ʻe Pate ʻene lauʻiʻakaú.
Ne talamai maʻu pē ʻe Mami, “Ko e taimi ʻoku tau tokoni aí, ʻoku tau fiefia!” pea fakakaukau ʻa Viliami mahalo pē ko hono ʻuhingá ke tokoni kia Pate, neongo kuo nau ʻosi helaʻia mei hono leikiʻi ʻenau lauʻiʻakaú.
Naʻe sio atu ʻa Viliami kia Koloa mo ʻAmelia, ʻokú na langa mai ha fanga kiʻi fale ʻaki e musié. Naʻá ne ʻeke ange, “ʻOku totonu nai ke tau ō ʻo tokoni kia Pate?” “Te tau lava ʻo tokoni ki ai ke ʻosi vave.”
Ne loto ki ai ʻa Koloa mo ʻAmelia peá na muimui atu ʻia Viliami.
“ʻOkú ke fie maʻu ha tokoni?” Ne fehuʻi atu ʻe ʻAmelia lolotonga ʻenau takai hake ʻi he tafaʻaki vao ki he loto ʻataʻatā he ʻapi ʻo Paté.
“ʻIo te u fie maʻu! Ka ko e talu e hoʻataá ni kakato mo hoʻomou leiki fānau. ʻOku ou tui ʻoku mou ongosia.”
“ʻOku sai pē ia,” ko Viliami atu ia. “ʻOku mau fie tokoni atu. Neongo kotoa ʻení, ka ʻoku mau fiefia ʻi he taimi ʻoku mau tokoni aí!”
ʻI he lolotonga ʻenau ngāué, ne talaange ʻe Pate ki he kau leká ha fanga kiʻi talanoa fakaoli mei heʻene moʻuí. Ko e haʻu ʻa Paté ia mei ʻInitia, ka kuó ne nofo ʻosi nofo kotoa atu he feituʻu ʻĒsiá mo ʻAfilika.
Hili hono pae mai e lauʻiʻakaú, ne sio hake ʻa Viliami ʻo ne fakatokangaʻi ʻa e tuva takai e ʻāpelé ʻi he ongo fuʻu ʻāpele lōloa ʻe ua ʻi he loto ʻataʻatā ʻo Paté. Ne teʻeki ke ʻosi lelei ʻenau ngāué. Ne punou hifo ʻa Viliami ʻo kamata tufi e ngaahi foʻi ʻāpelé. Naʻá ne vaheʻi e meʻa naʻe palá mei he meʻa naʻe saí. Ne lele atu ʻa Koloa mo ʻAmelia ke fokotuʻu tuʻunga ʻa e ngaahi foʻi ʻāpelé.
Naʻe teke mai ʻe Pate ʻene pālou lanu matá mei hono feleokó. “Faʻo heni e ʻāpele palá. Pea mou ʻalu leva mo e meʻa saí ki homou ʻapí.”
“ʻOku sai pē ia Pate. ʻOku ʻikai ke mau fie ʻave hoʻo ʻāpelé,” ko Viliami atu ia.
“ʻOku ou fie ʻoatu ia maʻamoutolu,” ko Pate mai ia. “He neongo kotoa ʻení, ka ʻoku ou fiefia ʻi he taimi ʻoku ou foaki aí!”
ʻI he pō ko iá lolotonga ʻa e maʻu meʻatokoni efiafí, naʻe talaange ʻe he fānaú ki he ongomātuʻá ʻa e fiefia ne nau maʻu heʻenau tokoni kia Pate mo fanongo ki heʻene ngaahi talanoá.
Fakafokifā pē kuo maʻu ʻe Viliami ha fakakaukau. “ʻOku ou ʻilo e meʻa te tau lava ʻo fai ki he ngaahi foʻi ʻāpele naʻá ne ʻomi maʻatautolu!” Naʻá ne puna hake ki ʻolunga ʻo toʻo mai ha tatau ʻo e Liahoná mei he funga laupapá. “ʻOku ou tui ʻe saiʻia ʻaupito ʻa Pate mo Peemi ʻi heni,” ko Viliami ange ia, ʻo ne huke ki he founga hono taʻo ʻo e keke ʻāpelé. “Pea hangē ko e talamai ʻe Pate he ʻahó ní, ʻoku tau fiefia, ʻi he taimi ʻoku tau foaki aí!”
“Tau taʻo mo ha foʻi keke maʻa hotau ngaahi kaungāʻapi kehé foki!” mo Koloa mai ia.
Ne mamali pē ʻa Viliami. Naʻá ne fakakaukau ki he kakai kotoa te ne ala fetaulaki mo iá mo e ngaahi talanoa fiefia te ne fanongoá. Pea ʻoku hoko kotoa ia ʻi ha kiʻi angaʻofa pē. Pea mo ha kiʻi foʻi keke.