Ko Hono Fakaleleiʻi ʻo e Lotú

ʻOku akoʻi mai ʻe Palesiteni ʻAealingi ʻe lava ʻe hoʻo fetuʻutaki vāofi mo e Tamai Hēvaní ʻo faitāpuekina ho fāmilí. ʻI hoʻo fakaleleiʻi hoʻo ngaahi lotú te ke lava ai ʻo fakaleleiʻi hoʻo fetuʻutaki mo Iá! Ko ʻeni ha ngaahi fakakaukau ki he founga hono fai iá:

Kimuʻa pea kamata hoʻo lotú, fakaʻaongaʻi ha kiʻi momeniti siʻi ke ke fakakaukau ai ki he meʻa ʻoku fie maʻu ke ke lea ʻakí. Fakakaukau ki he ngaahi fehuʻi ʻokú ke ala maʻu pe ngaahi meʻa kuó ne fakahohaʻasi koé—te ke lava foki ʻo hiki ia ke ʻoua naʻa ngalo ʻiate koe. Ngāueʻaki e taimi ko ení ke fakaʻataʻatā ho ʻatamaí mei he ngaahi longoaʻa ʻo e ʻahó kae lava ke ke tokanga taha ki he ueʻi ongoongofua ʻa e Laumālie Māʻoniʻoní. Kapau ʻoku kamata ke hē atu ho ʻatamaí lolotonga hoʻo lotú, feinga ke ke sio loto atu ki ha fakafanongo mai ʻa e Tamai Hēvaní. Talanoa mahino. Tuku foki ha kiʻi miniti siʻi he hili hoʻo lotú ke ke fakafanongo ai ki he ueʻi ʻa e Laumālié. Te ke lava ʻo hiki e ngaahi ongo ʻokú maʻú ʻi hoʻo tohinoá.

Manatuʻi ko e lotú ʻoku ʻiloa ia ko “ha faʻahinga ngāue ke fai” (Tikisinale ʻo e Tohitapú, “Lotu”), ko ia ʻoua naʻá ke tokanga ki ai kapau ʻoku fie maʻu ke toutou fai pe ngali faingataʻa! ʻE lava ʻe hoʻo tōtōivi ʻi he lotú ʻo tokoniʻi koe ke ke toe vāofi ange ai mo e ʻOtuá ʻo tāpuekina ai ha laui toʻu tangata.