Ko e Pāsolo ʻa e Fāmili ʻo Linisií
Naʻe pehē mai ʻe he tangataʻeikí, “ʻOku ʻi ai ʻeku meʻaʻofa maʻau.”
“Fānau ta fekumi ki hotau kāingá, manatua kinautolu maʻu pē” (Tohi Hiva ʻa e Fānaú, 90).
Ne lele ʻosi hifo ʻa Linisī ki lalo ʻi he taimi pē naʻá ne fanongo ai ʻoku ui ʻe he Tangataʻeikí hono hingoá.
Kuó na fakahoko fakataha ha ngāue lahi ki he hisitōlia fakafāmilí kimuí ni mai. Ne tokoni ʻa e Tangataʻeikí ke ne hū ki he uepisaiti FamilySearch, peá na fakasio fakataha ha ʻū tā mo ha ngaahi talanoa. Naʻá ne maʻu ʻi ha ʻaho ʻe taha ha fakamatala motuʻa fekauʻaki mo ʻene Kui Tangatá ʻi heʻene ngāue fakafaifekaú!
Naʻe aʻu hifo ʻa Linisī ki lalo he sitepú ki he feituʻu naʻe tatali ai e Tangataʻeikí. “Te ta ngāue ki he hisitōlia fakafāmilí he poó ni?” ko ʻene ʻeké ange ia.
“ʻIo, pea ʻoku ʻi ai haʻaku meʻaʻofa maʻau,” ko e Tangataʻeikí ange mo ne malimali pē. Naʻá ne ʻoange ki ai ha takainga tohi, lōloa naʻá ne pukepuke ʻi hono tuʻá. Naʻe folahi fakalelei hifo ʻe Linisī. Naʻá ne sio fakamamaʻu ki he pēsí ne fōtunga hangē ha ií. ʻOku tuʻu ʻi lalo hono hingoá! Lahi fau mo ha ngaahi hingoa kehe ʻoku tuhu takatakai ki ai e taó mei hono hingoá.
“Ko koe ē mo Mami,” ko Linisī ange ia, mo ne tuhu ki he ngaahi hingoa ofi taha ki aí. “Ko ʻeku ongo Kuí ē!”
Ne pehē ange ʻe he Tangataʻeikí, “ʻOku tonu ia.” “ʻOku hā ʻi he saati ī ko ʻení e hingoa hoʻo ngaahi kuí ʻi ha ngaahi toʻu tangata ʻe hiva.”
Naʻe lahi ʻaupito e ngahi hingoá. Ka naʻe ʻi ai e ngaahi feituʻu ʻe niʻihi naʻe ʻatā. Naʻe tokanga ʻa Linisī fekauʻaki mo e ngaahi hingoa ʻoku pulí. Naʻá ne pehē, “ʻOku hangē mai ia ko e ʻū pāsolo naʻá ma faʻa fokotuʻutuʻu mo ʻeku kui tangatá.” Naʻe mālōlō ʻene Kui tangatá ʻi ha ngaahi taʻu siʻi kuohilí, pea ʻoku ʻofa lahi ʻa Linisī kiate ia.
Ne kamokamo ange ‘ene tangataʻeikí. “ʻOku hangē tofu pē ha pāsoló. Ko ha pāsolo mahuʻinga ʻaupito. Pea ʻoku hangē ʻa e mēmipa kotoa pē ʻo e fāmilí ha konga ʻo e pāsoló.
Naʻe mei kata ʻa Linisī ʻi heʻene fakakaukau loto atu ki he fuo ʻo e konga pāsoló hono fakatatau ki heʻene kui tangatá.
“ʻI he taimi ʻoku tau ʻilo ai ha hingoa ha tokotaha pea fakahoko ʻenau ngāue fakatemipalé, ʻoku tau fakafehokotaki ia ki he toenga ʻo e fāmilí—ʻo hangē hano fokotuʻutuʻu fakataha ha pāsoló. ʻOkú ke tokoni ki hono fokotuʻutuʻu ʻo e pāsolo ko ʻení.”
“Mālie.” Naʻe ʻai ʻe Linisī hono louhiʻi nimá ki he ngaahi hingoá. Naʻá ne ʻilo ʻoku mahuʻinga ʻa e hisitōlia fakafāmilí, ka ʻokú ne toe fuʻu fiefia ange ke tokoni ʻi he taimí ni. ʻE lava ke fakafehokotaki kotoa hono familí ʻo taʻengata!
Naʻe fakapipiki ʻe Linisī ʻene saati foʻoú ki he ʻató ʻi ʻolunga hake pē ʻi hono mohengá. Naʻá ne saiʻia ke sio fakamamaʻu ki he sātí pea ako kotoa e ngaahi hingoá. Naʻá ne fakakaukau loto atu ki he fepikinima ʻa e taha kotoa, ʻo fakafehokotaki fakataha hangē ha pāsoló. Naʻá ne ongoʻi fiefia. Ko e pāsolo lahi taha ʻeni kuó ne mamata ai!
ʻI he pō ʻe taha naʻe ʻikai lava ʻa Linisī ʻo mohe. Ne fakapoʻuli ʻaupito hono lokí. Naʻe hoʻata mei he holisí ha ngaahi ʻata fakailifia tupu mei he kiʻi maama-poʻuli siʻisiʻí. Naʻá ne fusi hake hono kafú ʻo pūlou ʻaki hono ʻulú mo kuikui hono matá.
Hili ha kiʻi taimi siʻi naʻá ne fakasiosio hake mei hono kafú ʻo ne sio ki he saatí. Naʻá ne lau hono hingoá. Peá ne lau leva e hingoa ʻo Mami mo Tetí. ʻI he taimi naʻá ne aʻu ai ki he hingoa ʻo ʻene kui tangatá, naʻá ne ongoʻi māfana mo nonga.
Naʻá ne manatuʻi ʻa e faʻa malimali ange ʻene kui tangatá kiate ia ʻi he taimi naʻá na fokotuʻutuʻu pāsolo aí. Naʻá ne fakakaukau, “ʻI he taimi ʻoku ou tokoni ai ki he Tangataʻeikí ke fai ʻa e hisitōlia fakafāmilí, ʻoku ou fakafehokotaki fakataha hoku fāmilí!” Naʻá ne sio loto atu ai ki ha malimali lahi ange ʻene kui tangatá. Naʻe ʻikai leva ke ne toe ongoʻi ilifia. Naʻá ne malimali mo kafu māfana ʻi hono kafú peá ne tō hifo ʻo mohe ʻo misi ki he kakaí mo e ngaahi pāsoló mo hono fakafehokotaki fakataha hono fāmilí.