ʻOku Fie maʻu Kimoutolu ʻe he ʻEikí he Taimí ni!
Fai ʻe ʻEletā M. Russell Ballard
ʻO e Kōlomu ʻo e Kau ʻAposetolo ʻe Toko Hongofulu Mā Uá
Mei ha fakataha lotu ʻa e CES maʻá e kakai lalahi kei talavoú, “Fiemālie pea ʻIlo Ko Au ko e ʻOtuá” ne fakahoko ʻi Kalefōnia, USA, ʻi he ʻaho 4 ʻo Mē, 2014.
ʻI heʻeku hoko ko e ʻAposetolo ʻa e ʻEiki ko Sīsū Kalaisí, ʻoku ou fakaafeʻi kimoutolu ke mou “tui ʻa e teunga tau kakato ʻa e ʻOtuá” pea kau he ʻahó ni ki he feingatau ʻoku faí.
ʻOku vave ʻaupito e mavahe ʻa e māmani ʻoku tau nofo ai he ʻahó ní mei he ngaahi akonaki ʻa Kalaisí ʻi heʻenau ngaahi laó mo ʻenau ngaahi angafaí. Ko hono olá, ko e ngāue tōtōivi ai ʻa Sētane ke puputuʻu e ngaahi foha mo e ngaahi ʻōfefine ʻo e Tamai Hēvaní pea ke ofeʻi ʻa e kakai filí mei hono fakakakato honau fatongiá mo maʻu e kakato ʻo e ngaahi tāpuaki ʻa e ʻEIkí.
ʻOku fie maʻu ʻe Sētane ke taʻofi koe mei hono toutou fakahoko ʻo e ngaahi tōʻonga moʻui lelei ko ia naʻá ke ako ʻi ʻapí, ʻi he seminelí mo e ʻinisititiutí, mo hoʻo ngāue fakafaifekaú—hangē ko e fakahoko ʻo e ako folofola fakaʻahó, lotu fakaʻahó, maʻu moʻui taau e sākalamenití ʻi he uike kotoa, mo fai ha ngāue tokoni lelei mo loto ʻofá. ʻOkú ne fie maʻu foki koe ke ke tuʻu ʻi he tapaʻi lainí ʻi he feingatau mātuʻaki mahuʻinga ʻo e ʻahó ní.
Manatuʻi, ʻoku lolotonga fai e feingataú—ka ʻoku ʻikai ko e tau meʻafana mo e mahafu. Ka neongo iá, ko e taú ʻoku moʻoni, pea ʻoku tokolahi e kau kafó. Ko hono moʻoní ko e taú ko e hokohoko mai pē ia ʻo e tau ne kamata ʻi he maama fakalaumālié.
ʻOku fakaafeʻi kitautolu ʻe Paula ke tau “ʻtui ʻa e teunga tau kakato ʻa e ʻOtuá.” Naʻá ne pehē, “He ʻoku ʻikai ko e tau fangatua mo e kakano mo e toto, ka ki he ngaahi pule mo e ngaahi mālohi mo e kau pule ʻo e fakapoʻuli ʻo e māmaní, mo e kau laumālie kovi ʻi he ngaahi potu māʻolungá.” (ʻEfesō 6:11–12).
Fakaikiiki mei he ʻAlu ʻa e Kau Talavou ʻe Toko Uaafé ki he Taú, fai ʻe Arnold Friberg
ʻI heʻeku hoko ko e ʻAposetolo ʻa e ʻEiki ko Sīsū Kalaisí, ʻoku ou fakaafeʻi kimoutolu ke mou “tui ʻa e teunga tau kakato ʻa e ʻOtuá” pea kau he ʻahó ni ki he feingataú, ʻo hangē ko ia ne fai ʻe he ngaahi foha ʻo Hilamaní ʻi he ngaahi taʻu lahi kuohilí. ʻOua naʻá ke tatali kae ʻoua leva kuó ke mali pe kamata hoʻo ngāue maʻuʻanga moʻui taimi lōloá pe motuʻa ange. ʻOku fie maʻu ʻe he Siasí hotau Toʻu Tupú he taimí ni. ʻOku Fie maʻu Kimoutolu ʻe he ʻEikí he Taimí ni!
Te mou manatuʻi naʻe fai ʻe he kau tau kei talavou ʻe toko 2,000 “ha fuakava ke tau maʻá e tauʻatāina ʻa e kau Nīfaí” (ʻAlamā 53:17). ʻOku fie maʻu ʻe he Siasí ha kau tau kei talavou he kuongá ni kuo nau fai ha fuakava ke “tuʻu ko e kau fakamoʻoni ʻo e ʻOtuá ʻi he taimi kotoa pē pea ʻi he meʻa kotoa pē, pea ʻi he feituʻu kotoa pē” (Mōsaia 18:9).
Ko e kau talavoú mo e kau finemuí ko e ngaahi foha mo e ngaahi ʻōfefine kinautolu ʻo Hilamani ʻi he kuongá ní. Mahalo pē ʻe fakamatalaʻi kimoutolu ʻo hangē ko hono fakamatalaʻi kinautolú: “Kuo nau hoko ai ʻi he vahaʻataimi ko ʻení … ko ha fuʻu tokoni lahi” (ʻAlamā 53:19).
Fakafepakiʻi ʻo e Ponokalafí
ʻOku mau fie maʻu kimoutolu ke tau kau fakataha ʻi hono tauʻi ʻo e ponokalafí. Ko ha mahaki fakalilifu ia kuo mafola ʻi he funga ʻo e māmaní.
Ne laka hake ʻi he taʻu ʻe 180 kuohilí, hono fakahā ʻe he ʻEikí ʻa ʻEne fono ʻo e moʻui leleí, ʻo kau ai ʻa e fakatokanga fekauʻaki mo hono ngāueʻaki ʻo e tapaká (vakai ki he T&F 89). Naʻe fanongo ʻa e tokolahi ki he fakatokanga ʻa e ʻEikí, ka naʻe tokolahi ange e kau taʻefanongó. Naʻe ʻikai ʻilo ʻe ha taha ʻi he taimi ko iá pea naʻa mo ʻeku ʻi he taʻu ʻoku mou ʻi aí, ʻa e nunuʻa taumamaʻo ʻo e ifi tapaká. ʻI he ʻahó ni, hili ha laui taʻu ʻo e ngaahi fakatotolo fakasaienisí, ʻoku tau ʻilo ʻeni ʻoku fakatupunga ʻe he ifi tapaká ʻa e kanisā e maʻamaʻá mo e ngaahi mahaki fakaʻauha kehé. Ko ha tāpuaki maluʻanga ʻa e Lea ʻo e Potó mei he ʻEikí.
Ko e ngaahi founga tatau kuo fakatokanga mai ai ʻa e ʻEikí kiate kitautolu ʻi hotau kuongá fekauʻaki mo e ngaahi nunuʻa ʻo e ponokalafí. ʻOku muimui angatonu ha laui miliona ki he akonaki ʻa e ʻEikí, ka ʻoku taʻefaʻalaua ʻa e niʻihi ʻoku taʻefiemuimuí. Siʻoku kaungāmeʻa, ʻoku ʻikai totonu ke tau tatali, ʻi ha taʻu ʻe 180 pea naʻa mo e taʻu ʻe 10, ke toki ʻiloʻi ʻa e nunuʻa fakaʻauha ʻo e ponokalafí. Kuo fakahā ʻe ha fakatotolo fakasaienisi kimuí ni mai hono hanga ʻe he ponokalafí ʻo ofeʻi ʻa e kakai lalahi kei talavoú ʻi ha ngaahi founga kehekehe mo fakaʻuliki honau faingamālie ke nau feia ai ha nofo-mali feʻofoʻofani mo tuʻuloa ʻi ha ʻahó.
Kuo fakahaaʻi ʻe he fakatotoló iku hono toutou fakaʻaongaʻi ʻo e ponokalafí ki he ngaahi ʻulungaanga fulikivanú peá ne lava ʻo felei e ʻatamaí ke maʻutangī ai ha taha ʻi he pilīsone ʻo e maʻunimaá. Kuo fakamahino foki ʻe he fakatotoló ʻoku tātānaki ʻe he ponokalafí ʻa e ngaahi ʻamanaki taʻemalavá pea fetuku ʻa e ngaahi akonaki hala fakatuʻutāmaki fekauʻaki mo e feohi fafale fakaetangatá (healthy human intimacy).
ʻOku ngaohi koe ʻe he ponokalafi fakatuʻutāmakí ke ke sio ki he kakaí ʻo hangē pē ha meʻanoá ʻo ke lava ke fakataʻeʻaongaʻi mo taʻefakaʻapaʻapaʻi fakaeongo mo fakatuʻasino fakatouʻosi kinautolu.
Ko e tafaʻaki ʻe taha ʻo e ponokalafí ko ʻene hoko ko ha ngāue fakapulipulí. ʻOku faʻa fūfuuʻi ʻe he kau sio ponokalafí ʻenau ngāueʻakí pe te nau hanga ʻo ʻai ke ʻata siʻisiʻi mei he tokotaha kotoa pē, ʻo kau ai honau ngaahi hoa feʻofaʻakí pe ngaahi hoa-malí. Kuo ʻilo ʻi he ngaahi ako fakatotoló ko e taimi koē ʻoku moʻua ai ha taha ʻi he faʻahinga fakapulipuli fakatāutaha ko ení—ʻi he taimi ʻoku nau fai ai e ngaahi meʻa he ʻikai ke nau pōlepole aí mo fakapulipuliʻi e ngaahi meʻa ko iá mei honau fāmilí mo e mahení—ʻoku ʻikai ngata pē ʻi heʻene uesia honau vā fetuʻutakí mo tuku kinautolu ke nau ongoʻi liʻekiná, ka ʻokú ne ngaohi foki kinautolu ke nau ongoʻi lavelaveili ki he loto mamahí, puputuʻú, mo e masiva ʻi he mahuʻinga fakatāutahá. ʻOku fakaʻauha ʻe he fai fakapulipulí ʻa e falalá.
ʻOku totonu ke tau fakaʻehiʻehi mei he ponokalafí koeʻuhí he ʻoku fakamate. ʻOkú ne tāmateʻi ʻa e ngaahi vā ongongofua fakaetangatá—ʻo fakaʻauha e nofo-malí mo e ngaahi fāmilí. ʻOkú ne fakaʻauha e laumālie ʻo e tokotaha ʻokú ne sio aí ʻo hangē tofu pē hano tāmateʻi ʻe ha kona fakamate ʻa e sinó mo e ʻatamaí.
ʻOua naʻa lohiekina koe. ʻOua naʻá ke fakakaukau ko hoʻo ʻalu pē ʻo ngāue fakafaifekaú pe ʻosi malí te ke lava ai ʻo fakangata ʻa e ʻulungaanga maʻunimā ko ʻení. Kapau ʻokú ke kau ai he taimí ni, kapau ʻokú ke fihia ʻi he angafai ko ʻení, fekumi ki ha tokoni fakalaumālie he taimí ni. Te ke lava ʻo liua ʻa e ponokalafí ʻaki ʻa e tokoni ʻa e Fakamoʻuí. ʻOua ʻe tatali! ʻOku ou kōlenga atu ke mou tukunoaʻi ia! ʻOku lahi e ngaahi maʻuʻanga tokoni ʻi he LDS.org te ne lava ʻo tokoniʻi koe ke ke ikunaʻi e fakapoʻuli ʻo e ngaahi ʻata ponokalafí.
Ko e ngaahi ʻaho mohu ʻahiʻahi ʻeni—ka he ʻikai lava ia ʻi he taimi ʻe tuʻu ai ʻa e kau tau kei talavou ʻa Hilamaní ke maluʻi e ngaahi fāmilí mo e Siasí. Ko ʻeni ʻa e taimi ke ke takimuʻa ai pea kau fakataha mo e niʻihi kehe ʻo e kau talavoú mo e kau finemui anga māʻoniʻoni mo tōnungá ke tauʻi ʻa e ponokalafí.
Ko e Tokāteline ʻo e Nofo-Malí
ʻOku ou fie maʻu ke mahino kiate kimoutolu ʻa e tuʻunga ʻo e Siasí ki he nofo-malí ʻo hangē ko ia ʻoku ʻomi kiate kitautolu ʻe heʻetau Tamai Hēvaní ʻi he folofolá mo e “Ko e Fāmilí: Ko Ha Fanongonongo ki Māmani.” ʻOku fakahā mai ʻe he fakamatala fakalangi ko iá: “Ko e fāmilí ko e tuʻutuʻuni ia ʻe he ʻOtuá. ʻOku mahuʻinga ʻa e mali ʻa e tangatá mo e fefiné ki Heʻene palani taʻengatá. ʻOku maʻu ai ʻe he fānaú ha totonu ke fanauʻi kinautolu ʻi he ngaahi haʻi ʻo e nofo malí, pea ke ohi hake kinautolu ʻe ha tamai mo ha faʻē ʻokú na tauhi ʻa e ngaahi fuakava ʻo e malí ʻi he faitōnunga kakato.”1
Kuo fakanofo ʻa e kau ʻAposetoló ko e kau tangata leʻo ʻi he tauá, ke nau sio “ki he filí lolotonga ʻoku kei mamaʻó” (T&F 101:54), mo akoʻi ʻa e ngaahi tokāteline ʻa Kalaisí. ʻOku mou meaʻi kotoa ʻoku ʻohofi he ngaahi ʻahó ni ʻa e fakaʻuhinga tukufakaholo ʻo e nofo-malí. ʻOku ʻi ai e niʻihi ʻoku nau fakapotoʻi ʻa e talanoá ke nofotaha ʻi he ngaahi totonu fakapuleʻangá. Kuo ʻosi fakamatalaʻi ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ʻa e tuʻunga ʻo e Siasí mo e tokāteline ʻo e taumuʻa mo e palani ʻa e ʻOtuá ki Heʻene fānau fakalaumālié ke nau aʻusia ʻa e moʻui faʻa-maté, ʻa ia ʻoku mahuʻinga fau ki heʻetau moʻui taʻengatá.
ʻOku ou fie toʻo mai mei ha fakamatala ne ʻoatu ki he kau taki ʻo e Siasí ʻi he 2014, pea ʻoku ou kole atu ke mou lau fakalelei ia:
“He ʻikai hanga pea he ʻikai lava ʻe he ngaahi liliu ʻi he lao fakapuleʻangá ke ne liliu e fono kuo fokotuʻu ʻe he ʻOtuá ki he angamaʻá. ʻOku finangalo ʻa e ʻOtuá ke tau poupouʻi mo tauhi ʻEne ngaahi fekaú neongo e kehekehe ʻa e fakakaukaú pe ngaahi tōʻonga moʻui ʻa e sōsaietí. ʻOku mahino ʻene fono ʻo e angamaʻá: ʻoku toki taau pē ʻa e feohi fakasekisualé ʻi ha vahaʻa ʻo e tangata mo ha fefine kuó na mali ʻi he founga totonu mo fakalaó ko ha husepāniti mo ha uaifi. ʻOku mau naʻinaʻi atu ke mou toe fakamanatu mo akoʻi ki he kāingalotu ʻo e Siasí e tokāteline ʻoku hā ʻi he “Ko e Fāmilí: Ko Ha Fanongonongo ki Māmani.”
Naʻe hoko atu e fakamatalá:
“ʻOku maʻu ʻe kinautolu ko ia ʻoku nau fakaʻaiʻai ʻa e mali e tangata mo e tangata pe fefine mo e fefiné ʻa e totonu ko ia ke fakaʻapaʻapaʻí, ʻo tatau pē mo kinautolu ko ia ʻoku nau fakafepakiʻí. …
“ʻI heʻetau hoko ko e kau mēmipa ʻo e Siasí, ʻoku tau fatongiaʻaki ke akoʻi ʻa e ongongolelei ʻo Sīsū Kalaisí pea ke fakaulo atu ʻa e ngaahi tāpuaki maʻongoʻonga ʻoku maʻu mei hono tauhi e ngaahi fekau ʻa e ʻOtuá kae pehē foki ki he ngaahi nunuʻa taʻemataʻofia ʻo hono siʻakí. ʻOku mau fakaafeʻi kimoutolu ke lotua ʻa e kakai he feituʻu kotoa pē ke fakamolū honau lotó ki he moʻoni ʻo e ongoongoleleí, pea ke foaki ʻa e potó kiate kinautolu ʻoku nau fai tuʻutuʻuni ki he ngaahi kaveinga mahuʻinga ki he kahaʻu ʻo e sosaietí.”2
ʻOku ou ʻilo ʻoku mou ʻofa mo poupouʻi ʻa e ʻEikí mo ʻEne kau palōfitá, ka ʻoku ou ʻilo foki ʻoku puputuʻu ha niʻihi ʻo kimoutolu ʻo kau ki he ngaahi fakaʻuhinga lahi ʻo e fili ko ia ʻa e Siasí ke poupouʻi ʻa e palani kuo fakahā mai ʻe he ʻOtuá ki Heʻene fānaú.
ʻOku ou ʻilo foki ʻoku fefaʻuhi e niʻihi hotau kau toʻu tupú ke mahino pe ʻe founga fēfē hano fakamatalaʻi ʻo e tokāteline ko ia ʻokú ne ʻākilotoa ʻa e fāmilí mo e nofo-malí pea kei angaʻofa pē, anga mokomoko, mo ʻofeina e niʻihi ʻoku ʻikai ke nau tui tataú. Mahalo te ke ilifia naʻa ui koe ko ha taha tāufehiʻa pe taʻefieauna.
Mahalo te ke ʻilo ha taha ʻoku fefaʻuhi mo e manako pē hono faʻahingá pe fili ke nonofo fakaetangata pe fakaefefine. ʻE lava ʻe hoʻo ʻofa ki he tokotaha ko iá ko ha foha pe ʻōfefine ʻo e ʻOtuá ʻo fakafaingataʻaʻiaʻi koe ʻi hoʻo feinga ke ke ʻofaʻi mo poupouʻi ia mo kei tuʻu pē ʻi he palani ʻo e fiefia taʻengata ʻa e ʻEikí.
Tau ʻai mahino pē: ʻOku tui ʻa e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ko hono aʻusia ko ia ʻo e femanakoʻaki fakaetangata mo fakaefefiné (same-sex attraction) ko ha moʻoni fihituʻu ia ki he kakai tokolahi. ʻOku ʻikai ko ha angahala ʻa e femanakoʻakí, ka ko hono ngāueʻí. Neongo ʻoku ʻikai fili ʻe he fakafoʻituituí ʻa e faʻahinga femanakoʻaki ko iá, ka ʻoku nau fili ʻa e anga ʻenau fakafeangai ki aí. ʻOku kakapa atu ʻa e Siasí ki he fānau kotoa ʻa e ʻOtuá ʻi he ʻofa mo e mahino, kau ai [ʻa kinautolu ʻoku nau femanakoʻaki fakaetangata mo fakaefefiné].”3
ʻOku ʻikai akonekina pe taukapoʻi ʻe he Siasí ʻa e faʻahinga angafai fakamamahi mo taʻefakakalisitiane ko iá. Kuo pau ke tau ʻofa mo feinga ke tokoni ke mahino ki he niʻihi kehé ʻoku ʻikai totonu ke tukunoaʻi pe fakasiʻia ʻa e ngaahi fekau ʻa e ʻOtuá.
Ko ha Fakamoʻoni mo ha Fakatokanga
ʻI he “Ko e Fāmilí: Ko ha Fanongonongo ki Māmaní,” ne fakahā mai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá: “ʻOku mau fakatokanga atu ko e niʻihi fakafoʻituitui ko ia ʻoku nau maumauʻi ʻa e ngaahi fuakava ʻo e angamaʻá, ʻa kinautolu ʻoku nau ngaohikoviʻi ʻa e malí pe fānaú, pe ʻoku ʻikai ke nau fakahoko honau ngaahi fatongia fakafāmilí, te nau tuʻu ʻi ha ʻaho ʻo fai ha fakamatala ki he ʻOtuá. Ko e tahá, ʻoku mau toe fakatokanga atu, ʻe hanga ʻe he movetevete ʻo e fāmilí ʻo ʻomi ki he kakai fakatāutahá, tukui koló, mo e ngaahi puleʻangá ʻa e ngaahi fakamamahi naʻe kikiteʻi ʻe he kau palōfita ʻo e kuonga muʻá mo onopōní.”4
ʻOku ou kau fakataha atu he fakatokanga ko iá. ʻI heʻeku hoko ko e taha ʻo e kau tangata leʻo ʻi he tauá, ʻoku ou fatongiaʻaki ke “ifi ʻa e talupité, mo fakatokanga ki he kakaí” (vakai ki he ʻIsikeli 33:1–9). ʻOku ou fai ia koeʻuhí ʻoku ou ʻofa ʻiate kimoutolu mo loto ke mahino kiate kimoutolu kuo pau ke tau fehangahangai mo e ʻEikí mo tauhi ʻEne ngaahi fekaú. Ko hoku fatongiá ia.
Fakaikiikí mei he Ko e Ngaahi Feilaulau ne ʻOhake ʻe ʻĀtama mo ʻIví, fai ʻe D. Keith Larson
ʻOku haʻu fakataha ʻa e fakatokanga ʻa e ʻEikí mo ha fakaafe ke tau haʻu kiate Ia. Naʻe ʻafioʻi ʻe heʻetau Tamai Hēvaní ʻa e ngaahi nunuʻa ʻo e moʻui ʻi ha māmani hingá pea ko ia ai, naʻá Ne tokonaki ha Fakamoʻui, “ha Lami naʻe tāmateʻi talu mei he kamataʻanga ʻo e māmaní” maʻa ʻEne fānaú (Fakahā 13:8).
ʻOku tau ʻilo ʻi he Kosipeli ʻa Sioné, “Naʻe ʻofa pehē ʻa e ʻOtuá ki māmani, naʻá ne foaki hono ʻAlo pē taha naʻe fakatupú, koeʻuhí ko ia kotoa pē ʻe tui kiate iá ke ʻoua naʻa ʻauha, kae maʻu ʻa e moʻui taʻengatá” (Sione 3:16).
Kātaki ʻo manatuʻi ko e ongoongoleleí ko e “ongoongo ia ʻoku lelei.”5 Ko ha pōpoaki ia ʻo e ʻamanaki lelei. Kapau ʻokú ke faingataʻaʻia he taimí ni, kumi tokoni. ʻOku manavaʻofa ʻa e ʻEikí mo faʻa fakamolemole.
Naʻe enginaki ʻa e ʻAposetolo ko Paulá:
“Ko hai te ne fakamāvae ʻa kitautolu mei he ʻofa ʻa Kalaisí? ʻA e mahakí, pe ko e mamahí, pe ko e fakatangá, pe ko e hongé, pe ko e telefuá, pe ko e tuʻutāmakí, pe ko e heletaá? …
“Ka ʻi he ngaahi meʻá ni kotoa pē ʻoku tau ikuna pea mālohi lahi hake ʻiate ia naʻe ʻofa kiate kitautolú.
He ʻoku ou ʻilo pau, ʻe ʻikai ʻi he mate, pe ʻi he moʻui, pe ʻi he kau ʻāngelo, pe ʻi he kau pule, pe ʻi he ngaahi mālohi, pe ʻi he ngaahi meʻa ʻi heni, pe ʻi he ngaahi meʻa ʻe hoko,
“Pe ʻi he māʻolunga, pe ʻi he māʻulalo, pe ʻi ha meʻa kehe ʻe taha kuo ngaohi, ʻe ʻikai mafai ia ke fakamāvae ʻa kitautolu mei he ʻofa ʻa e ʻOtuá, ʻa ia ʻoku ʻia Kalaisi Sīsū ko hotau ʻEikí.” (Loma 8:35, 37–39).
Tuʻunga ʻia Sīsū Kalaisi, ʻoku malava ai ke fetongi e loto tāuteá ʻe he nongá. ʻE lava ke toe fakafoki mai ʻa e ngaahi vā fetuʻutaki fiefiá. ʻE lava ke ikunaʻi ʻa e ngaahi maʻunimaá.
ʻOku fie maʻu ke tau fakaʻilo ki hotau fāmilí mo e ngaahi kaungāmeʻá: Ko e ʻOtuá ko e ʻofa, “pea ʻokú ne fakaafeʻi ʻa [kitautolu] kotoa pē ke nau haʻu kiate ia ʻo maʻu ʻi heʻene angaleleí; pea ʻoku ʻikai te ne taʻofi ha tokotaha ʻoku haʻu kiate ia,” (2 Nīfai 26:33).
ʻOku fie maʻu ke tau kau ʻi he ngāue ʻo e fakamoʻuí kimuʻa, lolotonga mo e hili hoʻo ngāue fakafaifekaú.
Fakaʻaongaʻi ʻa e Tekinolosiá ke Tāpuekina ʻa e Ngaahi Moʻuí
ʻOku fakaafeʻi koe ʻe he ʻEikí ke ke kau mo fakaʻaongaʻi ʻa e mītia fakasōsiale ʻokú ke filí, ke vahevahe ai ʻa e ongoongoleleí pea tuʻu ko e ngaahi foha mo e ngaahi ʻōfefine ʻo Hilamani ʻi he kuongá ni ʻi he feingatau maʻongoʻonga ʻo e ngaahi ʻaho fakaʻosí. ʻOkú Ne fie maʻu koe ke ke hoko ko e kau tau kei talavou ʻo e kuongá ní ʻo tuʻu mālohi mo faaitaha ʻi he moʻoní. ʻOkú Ne fie maʻu koe ke ke loto toʻa mo tuʻukalikali ʻi hoʻo fehangahangai mo e filí. ʻOku mau ʻilo ʻe ikuna ʻa e ʻEikí ʻi he ngataʻangá pea ʻe liua ʻa Sētane.
ʻOkú ke maʻu ʻa e faingamālie ke fakaʻaongaʻi fakapotopoto ʻa e mītia fakasōsialé he taimí ni. Manatuʻi ʻoku ʻi ai e taimi mo e feituʻu totonu kiate koe ke ke fakaʻaongaʻi ai ʻa e mītia fakasōsialé, pea ko e taha ʻo e ngaahi taimi ko iá ʻa hoʻo vahevahe hoʻo ngaahi fakakaukaú mo e fakamoʻoní ki he ngaahi meʻa ʻokú ke ako mo ongoʻí. Te ke lava ʻo fakahoko ʻi he mītia fakasōsialé ha ngaahi fetalanoaʻaki ki he ongoongoleleí mo ho fāmilí, ngaahi kaungāmeʻá mo e kau ʻosi ngāue fakafaifekaú, pea naʻa mo e kau fiefanonogo motuʻá mo e kāingalotu foʻoú. Te ke lava ʻo tuʻu ko e fakamoʻoni ki he moʻoní mo maluʻi hono puleʻangá.
Maluʻi Hono Puleʻangá.
ʻOku ou ʻilo ʻoku hohaʻa ʻa e tokolahi ʻo kimoutolu telia hono fakamaauʻi taʻetotonú, manukiá, pea naʻa mo hono leakoviá ʻo kapau te ke taukapoʻi e Tamai Hēvaní, ko e ʻEiki ko Sīsū Kalaisí, mo e Siasí. ʻOku mahino kiate au hoʻomou hohaʻá.
Ne u ngāue ʻi he Misiona Pilitāniá ʻi he hili e Tau Lahi Hono II ko ha faifekau kei talavou. ʻI he taimi ko iá he hoko ʻa e kau Māmongá ko “ha manukiʻanga mo ha lumaʻanga” (3 Nīfai 16:9), pea naʻe kataʻi mo lumolumaʻi e kau faifekaú. Naʻe aʻu ki hono tolo pea ʻanuhia kimautolu ʻe he kakaí. Ka neongo iá, naʻe ʻikai ke mau tuka ai, kae hokohoko atu ʻemau fakamoʻoní mo vahevahe ʻa e ongoongoleleí. Hangē ko ʻApinetaí, ne ʻikai ke mau holomui; hangē ko Paulá, ne ʻikai ke mau holomui; pea hangē ko e Fakamoʻuí, ne ʻikai ke mau holomui. Naʻe ʻikai ke mau lava ʻo mafakakaukaua ʻa e ola ʻemau ngāué ʻi he taimi ko iá. Naʻe ʻi ai hamau vahefonua ʻe 14 kae teʻeki ha siteiki. ʻI he ʻahó ni, ʻoku ʻi ai ha ngaahi siteki ʻe 46 ʻi Saione ʻi he ʻOtu Motu Pilitāniá.
Misi ʻa Līhaí, fai ʻe Greg K. Olsen
Siʻoku ngaahi kaungāmeʻa kei talavou, ʻoua naʻa mou tokanga kiate kinautolu ʻi he fuʻu fale lahi mo ʻataʻataá. Naʻe mamata ʻa Nīfai ki he manuki mo tuhu ʻaki “honau louhiʻi nimá kiate kinautolu kuo nau aʻu mai ʻo nau lolotonga kai ʻi he fuá.” ʻOua naʻa mou hangē ko kinautolu ne “hili ʻenau kai ʻi he fuá … naʻa nau mā, koeʻuhi ko kinautolu naʻe lolotonga manuki mai kiate kinautolú; pea naʻa nau tō atu ki ha ngaahi hala tapu ʻo puli.” (1 Nīfai 8:27, 28).
Ko ha toʻu tangata maʻongoʻonga mo mahuʻinga kimoutolu, pea ko ha taimi fakaʻofoʻofa eni ke mou moʻui ai! ʻOku ngingila ʻa e kahaʻú. Pehē loto pē, “ʻOku ou tokoni ki he ʻEikí ʻi heʻeku ala atu ʻo vahevahe ʻeku fakamoʻoní pea mo akoʻi e ngaahi moʻoni ʻa e ʻOtuá kuo fakahā mai ʻi he ngaahi ʻaho fakaʻosí ni.”
Fakatau ange ke faitāpuekina kimoutolu ʻe he ʻEikí ʻaki ʻa e poto ʻoku fakalaka atu ʻi homou taʻú, ke mou fakatokangaʻi ʻoku tau kau ki ha feingatau pea kuo pau ke tau tuʻu fakataha, ʻa e talavou mo e toulekeleka. Fakatau ange ke ʻoua naʻa ngalo ʻiate koe, ʻi he fonongaʻanga ko ʻeni ʻokú ke ʻi aí, ʻokú ke mahuʻinga ki he kahaʻú ʻi hono teuteuʻi ʻa e māmaní ki he ʻaho ko ia ʻe pehē ai ʻe Sīsū Kalaisi, “Kuo feʻunga,” pea te Ne foki mai ke angi mo pule ko e Fakamoʻui, ko e ʻEiki ʻo e ngaahi ʻEiki, ko e Tuʻi ʻo e ngaahi tuʻi, ko e Huhuʻi ʻo e māmaní, pea ʻoku ou fakamoʻoni ʻokú Ne moʻui.