Ko ʻEtau Tafaʻakí
Ko ʻEtau Taumuʻa ʻi he Māmaní
Lolotonga ʻa e māhina fakamahuʻingaʻi ʻo e akó ʻi homau ʻapiakó, naʻe kole mai ʻe heʻemau faiakó ke mau tohi ha ʻēsei ʻo fakakaveingaʻaki “Ko e hā e ʻuhinga ʻoku ou ʻi heni aí?” Naʻe pau ke palakalafi ʻe 10 e ʻēseí ʻo fakatefito ʻi heʻetau taumuʻa ʻi he moʻuí ni. ʻI heʻeku lau ʻa e tefitó ʻi he palakipoé, naʻe fonu hoku lotó ʻi he nonga mo e fiefia. ʻI heʻeku hoko ko e mēmipa ʻo e Siasí, kuó u ʻiloʻi ʻeku taumuʻá ʻi heʻeku hoko ko ha ʻōfefine ʻo e ʻOtuá ʻi ha ngaahi taʻu lahi. Ka ʻi heʻeku sio ki he fofonga ʻo hoku kaungā ako kehé, naʻe fonu hoku lotó ʻi he loto-mamahi. Ko e hā hono ʻuhingá? He naʻe kamata ke nau hanu fekauʻaki mo e faingataʻa ʻa e tefitó. Naʻe ʻikai te nau maʻu ʻa e ʻilo tatau ne u maʻú.
ʻI he taimi naʻe tānaki ai ʻeku ʻēseí, naʻá ku fakatokangaʻi ʻa ʻeku monūʻia ke u hoko ko ha mēmipa ʻo e Siasi moʻoni pē ʻe tahá. Talu mei he ʻaho ko iá, mo hono fakamālohia ʻa ʻeku holi ke u ʻalu ʻo ngāue fakafaifekau mo vahevahe ʻeku fakamoʻoni ki he ongoongolelei ʻo Sīsū Kalaisí.
ʻOku ou ʻilo ʻoku ʻofeina mo fie maʻu au ʻe he Tamai Hēvaní ke u nofo mo Ia ha ʻaho. ʻOku ou toe ʻilo foki ko ʻeku taumuʻá ia ke u tokoni ki he niʻihi kehé.
Jaymee A., ʻOtu Filipainí
Founga hono Tokoniʻi Au ʻe he Tohi ʻa Molomoná
ʻOku ueʻi kitautolu ʻe he Tohi ʻa Molomoná ʻi ha taimi pē ʻoku tau fie maʻu ai ha tali ki heʻetau ngaahi fehuʻí pe ko e taimi ʻoku tau fie maʻu ai ke tau ongoʻi vāofi ange mo e Laumālie ʻo e ʻEikí. ʻOku ʻi ai ha ngaahi kikite naʻe maʻu ʻe kinautolu naʻe fili ʻe he Tamaí koeʻuhí he naʻa nau angatonu mo anga māʻoniʻoni. ʻOku tau maʻu mei he tohi ko ʻení ha ʻilo lahi ange ki he ongoongoleleí, pea lava ke tau sio ko e ʻEikí ʻokú Ne tatau maʻu ai pē.
ʻOku tokoniʻi kitautolu ʻe he Tohi ʻa Molomoná he taimí ni he naʻe foua ʻe he kakai ʻo e kuohilí ʻa e faingataʻa meimei fai tatau mo e ngaahi faingataʻa ʻoku tau fehangahangai mo ia he ʻahó ní, ʻo tatau pē mei he ngaahi palopalema fakafāmilí ki he ivi tākiekina mei he niʻihi kehé. ʻOku ʻomi ʻe heʻenau ngaahi sīpingá ha mālohi mo ha holi ke tau laka atu ʻi he tui mo e anga māʻoniʻoni ʻo ʻikai ha fakalotosiʻi. Ne foua ʻe he kakai ʻo e kuonga muʻá ha ngaahi ʻahiʻahi ʻo hangē ko kitautolú ka naʻa nau fiefia ʻi he ʻikai ikunaʻi kinautolu ʻe he filí. ʻOku ʻomi heni kiate kitautolu ha holi lahi ange ke tau kei tuʻu mālohi mo taʻeueʻia ʻi he ongoongolelei ʻo Sīsū Kalaisí.
Caroline M., Sao Paulo, Palāsila
Ngāue ʻi he Feituʻu ʻOku Kole Maí
Kimuʻa pē ʻi hono fakatapui ʻo e Temipale Seni Salavatoa ʻEli Salavatoá, ne u fili mo hoku fāmilí ke mau tokoni ʻi he ʻoupeni hausí mo tokoni kiate kinautolu ne teʻeki kau ki he siasí ke nau maheni ange mo e ongoongolelei ʻo Sīsū Kalaisí ʻi heʻenau ʻaʻahi mai ki he temipalé. Naʻe vahe mai ke u takimamataʻi mo fakamatalaʻi ki he kakaí ʻa e loki takitaha ʻi he temipalé, ngaahi fuakava toputapu ʻoku tau fai aí, pea mo e anga e liliu ʻetau moʻuí ʻi he taimi ʻoku tau tauhi ai e ngaahi fuakava ko iá.
Ne hokosia ʻeku taimi ngāué, pea ne kamata ʻeku takimamatá. Ne u toki hū mai pē ki tuʻa mei he lokí ʻi ha kole mai ʻe ha tokotaha ha toe takimamata makehe lolotonga ia ʻoku aʻu mai ha kulupu tokolahi. Ne talamai kiate au ke u foki ki he loki talitalí ke vahe mai ha kulupu ʻe taha kiate au.
ʻI heʻeku aʻu atu ki he lokí, naʻe toe kole mai ai ke liliu ʻeku ngāué mo hulu ha vitiō ki he kakai ne nau toki aʻu mai ki he temipalé. Naʻá ku ongoʻi loto mamahi ʻi he ʻikai lava ke u talanoa mo e kakaí mo talanoa kiate kinautolu ʻo kau ki he temipalé.
ʻI he hili ha houa ʻe taha mo e konga mei ai, ne aʻu mai ha kulupu mei he ʻIunaiteti Siteití ne ʻikai ke nau teitei poto ʻi he lea faka-Sipeiní. Ne felēleaki holo ha kau ngāue tokoni ʻo fakasio ha taha ʻoku lea faka-Pilitānia mo lava ke takimamataʻi ʻa e kulupu ko ʻení. Ko e taimi ia naʻe mahino ai kiate au ʻoku ʻomi kitautolu ʻe he ʻEikí ki he feituʻu ʻokú Ne fie maʻu kitautolu ki aí, ʻo ʻikai ko e feituʻu ʻoku tau fie ʻalu ki aí. Ko au tokotaha pē naʻá ku ʻilo ʻa e anga hono fakaʻaongaʻi e vitioó mo fakahoko ʻa e lea fakafeʻiloakí ʻi he lea faka-Pilitāniá. Naʻe fiefia ʻa e kau ʻAmeliká pea ʻi heʻenau mavahé, naʻa nau fakamālō mai kiate au ʻi hono talitali loto māfana kinautolú.
ʻI he fakaʻosinga ʻo e ʻahó, naʻá ku houngaʻia ki he ʻEikí ʻi hono fakahaaʻi mai kiate au ko e taimi ko ia ʻoku tau fai ai ha ngaahi meʻa ʻo fakatatau mo ʻEne ueʻí, te tau ongoʻi fiemālie ʻi heʻetau ngāué.
Erick A., ʻEli Salavatoa