Ne Kamata Ke u Lotua ʻa Lute
June Foss, ʻIutā, USA
Toʻohemá tā fakatātaaʻi ʻe Richard Mia; toʻomataʻú tā fakatātaaʻi ʻe Allen Garns
Hili ʻeku aʻusia ha kavenga fakapaʻanga taʻeʻamanekina ka ko ha fefine teʻeki mali, ne u ʻilo ʻoku fie maʻu ke u kumi ha ngāue ʻe taha. Ne ʻikai fuoloa mei ai, ne haʻu ʻa Mati kiate au, ko ha fineʻofa ʻi he uootí, ko ʻene fie maʻu ʻeku tokoní. ʻOku ʻamanaki ke ne ʻalu mo hono husepānití ʻo ngāue fakafaifekau, pea kuo pau ai ke ne nofo mei heʻene ngāué. Naʻá ne fakamatala mai ko e Tokonaki kotoa pē ʻokú ne tokoni ki ha fineʻeiki toulekeleka ko Lute, ʻokú ne nofo ʻi he fale kau toulekeleká. Ne foaki mai ʻe Mati ʻene ngāué mo ne talamai ʻe totongi au ʻe Lute heʻeku ngāué.
ʻI he Mōnite hokó, ne fakamatalaʻi mai ai ʻe Mati mo Lute kiate au hoku ngaahi ngafá, peá u kamata ngāue leva ʻi ha ngaahi ʻaho siʻi mei ai. Ne u kamata ʻaki hono tānaki e fō ʻuli ʻa Luté ʻo ʻave ia ki ʻolunga ki he loki foó. ʻI he hili pē ʻeku kamatá, ne fakatovave mai ʻa Lute ki loto ʻo ne kaikailaʻi au. Naʻá ne talamai kiate au ke ʻoua ʻaupito naʻá ku toe fō hono valá taʻe te u tomuʻa ʻeke ange ki ai.
Ne u fai pē ʻa e meʻa naʻá na talamai mo Mati kiate au ke u faí. Naʻá ku fakamaʻumaʻu pē hoku loʻimatá ʻi heʻeku mafasiá mo e loto-mamahí. Ne u pehē loto pē ʻoku ʻikai ke u toe fie maʻu ke u puputuʻu mo ha ngaahi palopalema ʻi heʻeku moʻuí. Ne u mei liʻaki e ngāué ka ne ʻikai ʻeku palōmesi kia Mati te u tokangaʻi lelei ʻa Lute lolotonga ʻene mavahé.
Ne tafuluʻi au ʻe Lute he uike kotoa pē, ʻi he meʻa kotoa pē ne u fai. Hangē he ʻikai pē haʻaku laka ʻe tonu neongo e lahi ʻeku feingá.
Ne kamata ke u lotu ki ha mālohi ke u matuʻuaki ʻaki ʻa Lute mo ʻene ngaahi lea ʻitá, ka naʻe ʻikai pē ha liliu. Naʻe hoko atu ʻeku taʻeoliʻia he tokoni kiate iá.
Ka ʻi he ʻaho ʻe taha ne u liliu ai ʻeku lotú. Ne tuku ʻeku lotua aú, ka u kamata lotua ʻa Lute. Ne u kole ki he Tamai Hēvaní ke tokoni mai ke mahino kiate au ʻene ngaahi fie maʻú mo e founga ke u lava ai ʻo tokoni kiate iá.
Mei he ʻaho ko iá, naʻe liliu e meʻa kotoa. Naʻe fakamolū hoku lotó, pea tupulaki ʻeku ʻofa ʻia Luté. Naʻe liliu foki mo Lute. Naʻe anga fakafaingofua leva peá ne vahevahe mai ʻo kau ki heʻene moʻuí, ʻene fiefiá, mo ʻene ngaahi mamahí. Naʻá ne talamai kiate au ʻokú ne ʻofa ki hono fāmilí. Naʻá ne talamai e ngaahi meʻa fakafiefia kuó ne fakahoko ʻi he kuohilí ka ʻoku ʻikai ke ne kei lava ʻo fai. Naʻá ne talamai naʻe ongoʻi tuenoa mo loto-mamahi.
Naʻe kamata ke u vēkeveke ke u sio kia Lute he uike kotoa, peá ne vēkeveke ke sio foki kiate au.
Ne u ako ha lēsoni mahuʻinga ʻi heʻeku aʻusia mo Luté. ʻI heʻeku ngāue tokoni ʻaki hoku lotó kotoa, naʻe mahino kiate au ʻa e akonaki ʻa Palesiteni Sipenisā W. Kimipoló (1895–1985) “ʻi he uhouhonga ʻo e mana ʻo e ngāue tokoní, ʻoku ʻi ai e talaʻofa ʻa Sīsuú, ʻi he līʻoa ʻetau moʻuí, ʻoku tau ʻilo ai ʻa kitautolu” (“Small Acts of Service,” Ensign, Dec. 1974, 2.)