Nofo pe Talangofua?
ʻOku nofo ʻa e taha naʻá ne faʻú ʻi he ʻOtu Filipainí.
ʻI he taimi naʻá ku talaange ai ki heʻeku ongomātuʻá te u ʻalu ʻo ngāue fakafaifekaú, naʻe taʻeʻamanekina ʻena talí. Naʻá na fehuʻi mai pe te u fili hoku fāmilí pe ko ʻeku ngāue fakafaifekaú.
Tā fakatātaaʻi ʻe Scott Jarrard
ʻOku ou kei manatuʻi pē ʻa e ngaahi lea ʻa e ongo faifekau ne na akoʻi aú: Ko e hā pē ʻe fekau atu ʻe he ʻOtuá, fai ia, pea ʻe muiaki mai e ngaahi tāpuakí.” Ne tō loloto ʻa e ngaahi lea ko ení ki hoku lotó. Naʻá ku papitaiso ʻi hoku taʻu 16, pea ko au pē mēmipa ʻo e Siasí ʻi hoku fāmilí. Hili ha māhina ʻe valu mei ai, ne u monūʻia ke mamata ki hono papitaiso mai hoku tehiná ki he Siasí.
ʻI he hokosia hoku taʻu 18, ne u loto ke u ʻalu ʻo ngāue fakafaifekau mo tokoni ki he ngāue ʻa e ʻEikí. Ne u talaange vēkeveke ki heʻeku ongomātuʻá fekauʻaki mo ʻeku palaní mo e anga ʻeku fie maʻu ke fakaafeʻi e kakaí ke nau haʻu kia Sīsū Kalaisi ʻaki hono tokoniʻi kinautolu ke nau tali mo moʻuiʻaki e ngaahi tefitoʻi moʻoní mo e ngaahi ouau ʻo e ongoongoleleí. Naʻe fakaʻohovale kiate au ʻena talí. Naʻá na talamai ʻoku mamahi hona lotó he fakakaukau atu ki heʻeku mavahe ʻo ngāue fakafaifekaú, pea kuo pau ke u fili: ko hoku fāmilí pe ko ʻeku ngāue fakafaifekaú.
Naʻá ku moʻutāfuʻua ʻi heʻeku fanongo ki he ngaahi lea ko iá. Tuai-e-kemo ne u ʻalu ki he falelotu ofi ki homau ʻapí peá u hū atu ki he taha ʻo e ngaahi lokí ʻo tūʻulutui hifo ʻo ʻeke ki he Tamai Hēvaní, “Ko e hā te u faí? Ko e hā te u filí: ko hoku fāmilí pe ko ʻeku ngāue fakafaifekaú? ʻOkú na mahuʻinga fakatouʻosi kiate au.”
Lolotonga ʻeku ʻi hoku tuí, naʻe haʻu ki heʻeku fakakaukaú e lea ʻa e ongo faifekaú: Ko e hā pē ʻe fekau atu ʻe he ʻOtuá, fai ia.”
ʻOku ou ʻofa ʻi hoku fāmilí peá u loto ke u feohi mo kinautolu ʻo taʻengata. ʻOku ou fakaʻapaʻapaʻi honau lotó. Pea ko e tahá ʻoku talamai ʻe he folofolá, “ʻOku lelei ange e talangofuá he fai feilaulaú” (1 Sāmuela 15:22). Naʻe fakafonu au ʻe he Laumālie ʻo e ʻEikí, mo fakamālohia au. Ne u fili ke u ʻalu ʻo ngāue koeʻuhí naʻá ku ʻilo ʻe tokoni e Tamai Hēvaní ke mahino ki hoku fāmilí.
Ne u foki atu ki ʻapi kuo tuli au ʻe he ngaahi lea ʻita ʻa ʻeku tamaí mo talamai ke ʻoua naʻá ku toe foki ange. Naʻá ku fakamāʻopoʻopo leva ʻeku kiʻi ngaʻotoʻotá, ʻo ʻikai ke u ʻilo pe te u ʻalú ki fē. Naʻe ʻikai ke u ilifia, he naʻá ku ʻilo ʻoku ʻiate au ʻa e ʻEikí, pea ʻoku ʻi ai ʻEne palani maʻá e fāmili kotoa pē, pea toka ange ha ʻaho ʻe toki mahino ai ki hoku fāmilí ʻa e palani fakaʻofoʻofa ko ʻení.
Naʻe ʻikai te u fuʻu mamaʻo mei ʻapi kuo fakafetaulakiʻi au ʻe heʻeku faʻeé. Naʻá ne fāʻofua ʻiate au peá ne talamai ʻokú ne ʻofa lahi kiate au. ʻI heʻeku mavahé, naʻá ku sio kiate ia ʻokú ne tangi ʻaki e ʻofa mo e mamahi kotoa ʻoku maʻu ʻe ha faʻē ʻi haʻane sio ki ha ʻalu haʻane tama.
Ne laka hake ʻi he taʻu ʻe tahá, ʻeku nofo pē ʻi he ʻapi ʻo ha taha ʻosi ngāue fakafaifekau ne u fetaulaki mo ia ʻi he taimi naʻá ku kei hoko ai ko ha fiefanongo. Naʻe moʻoni ʻa e ʻEikí ʻi Heʻene talaʻofa mai ʻi he 1 Nīfai 3:7—Te Ne teuteuʻi ha hala ke u lava ai ʻo talangofua ki Heʻene ngaahi fekaú. Kuó ne ʻomi ʻa e tangata ʻofa mo taʻesiokita ko ʻení ke tokoniʻi au pea tōkaki ha ʻātakai fakalaumālie ke u lava ai ʻo teuteu ki heʻeku ngāue fakafaifekaú. Ne u ongoʻi ʻa hono hapai au ʻe he toʻukupu ʻo e ʻOtuá lolotonga hoku ngaahi faingataʻá. Ne u ongoʻi ʻa e ʻofa hotau Fakamoʻui ko Sīsū Kalaisí ʻo fakafou ʻi Heʻene feilaulau fakaleleí. Naʻe fataki au ʻe he ʻofa ko ʻení lolotonga hoku ngaahi ʻahiʻahí ʻo aʻu ki hono vaheʻi au ke u faifekau taimi kakato ʻi he Misiona Filipaini Kauaiení.
Hili ha ngaahi māhina mei ai, ne u maʻu ha tohi mei hoku fāmilí ʻo talamai ʻoku nau tatali mai ki heʻeku foki angé. Ne ʻikai mole ʻeku tuí mo ʻeku ʻamanaki leleí ʻe kau kakato hoku fāmilí ki he Siasí, pea silaʻi ʻi he temipalé ki he taʻengatá, pea nofo fakataha ha ʻaho mo ʻetau Tamai Hēvaní mo Hono ʻAlo, ko Sīsū Kalaisí.
ʻI heʻeku foki mai mei heʻeku ngāue fakafaifekaú, naʻe kamata ke hoko ʻo moʻoni ʻeku misí. Naʻe lava ke u papitaiso ʻeku faʻeé, ʻa ia ʻokú ne lolotonga teuteu atu ʻeni ke ne hū ki he temipalé. ʻOku ou sio maʻu pē ki hoku fāmilí, pea ʻoku mau fuʻu vāofi ange ʻi ha toe taimi kimuʻa.