ʻOku mahuʻinga ʻa e Seminelí!
Mahalo pē ʻoku fie maʻu ha feilaulau, ka ʻoku ʻilo ʻe he toʻu tupu ko ʻení ʻa e tāpuaki ʻo e seminelí.
Ko e hā ha meʻa ʻe taha ʻoku tōfuhia kotoa ai ʻa e toʻu tupú ʻi he funga ʻo e māmaní? Ko ha fānau ako semineli kinautolu! ʻOku ʻalu ʻa e toʻu tupú ki he seminelí ʻi ha ngaahi founga kehekehe. ʻOku ʻā ʻa e niʻihi ʻi he 5:00 a.m. kimuʻa pea nau ʻalu ki he akó, kae ʻalu ʻa e faʻahinga ʻe niʻihi ʻi he vahaʻa ʻo ʻenau ngaahi kalasi angamahení. ʻI ha ngaahi taimi ʻe niʻihi, ʻoku ʻalu ʻa e fānau ako ʻe niʻihi he fakaʻosinga ʻo e uiké pe fakaʻaongaʻi ʻa e Skype ke nau kau mai.
Neongo ai pē pe ʻoku nau feilaulauʻi ʻenau mohé pe vaʻinga ʻakapulu he fakaʻosinga ʻo e uiké, ka ʻoku kau longomoʻui atu ha toʻu tupu ʻe 390,000 ki he seminelí. Ko ʻeni ʻenau vahevahe fekauʻaki mo e ngaahi tāpuaki ʻo e seminelí:
“ʻOku ʻikai ke u tui ʻokú ne fakasiʻisiʻi ai ʻete taimi mohé ʻaki ha houa ʻe taha; ʻoku ou tui ko ha houa ia ʻe taha ke u teuteuʻi fakalaumālie ai au.”
Megan C., 17, Kalefōnia, USA
“Koeʻuhí ko e seminelí, kuo toe fakamālohia ange ʻeku fakamoʻoní, peá u ʻilo pau ange e folofolá. ʻOku toe mālohi ange ʻeku fakamoʻoni ki he feilaulau ʻa e Fakamoʻuí ʻi Ketisemaní koeʻuhí ko e seminelí.”
Vina C., 17, Hongo Kongo, Siaina
“Ko e seminelí ko e feituʻu pau ia ʻe taha ʻoku ou lava ʻo ongoʻi ai e Laumālié. Ko au tokotaha pē ʻoku mālohi he siasí homau ʻapí, ka ʻoku poupouʻi ʻaupito au ʻe heʻeku ongomātuʻá. ʻOku ou tupulaki ʻaupito, koeʻuhí ko e seminelí.”
Amanda L., 17, ʻIutā, USA
“ʻOku taʻotaʻofi koe ʻe he seminelí mei he ngaahi meʻa ʻoku hoko lolotonga e ʻahó. Kapau ʻoku ou pehē ʻoku kamata ke u fakakaukau kovi, ʻoku ou fakakaukau leva ki he lēsoni seminelí. ʻOku mahulu atu ia ʻi he seminelí.”
Eric G., 15, Ipswich, ʻIngilani
“ʻOku mātuʻaki mahuʻinga ke ʻalu ki he seminelí koeʻuhí ʻoku mau lava ke ako lahi ange ai fekauʻaki mo homau Siasí mo langa hake homau vā fetuʻutaki mo e Tamai Hēvaní. Ko e ʻuhinga ʻoku ou saiʻia ai ʻi he seminelí ko ʻeku lava ke u ʻilo lahi ange fekauʻaki mo e hisitōlia ʻo e Siasí mo ʻiloʻi pau ʻoku moʻoni ʻa e ongoongoleleí pea ʻoku ʻofeina au ʻe he Tamai Hēvaní mo Sīsū Kalaisi!”
Breck M., 17, Kenitaki, USA
“ʻOku ou saiʻia ʻi he seminelí koeʻuhí ʻokú ne tokoniʻi au ke u fai ha ngaahi fili. ʻOku ou ongoʻi ʻa e Laumālie ʻo e ʻEikí ʻi he ngaahi kalasí mo maʻu ha fakamoʻoni ko e ongoongolelei ʻeni ʻo Sīsū Kalaisí. ʻOku ʻikai ha ʻuhinga ke te taʻe saiʻia ai. ʻOku ou ʻilo ʻe tokoniʻi au ʻe heʻeku ako ʻi he taʻu ʻe fā ko ʻení ke u ʻalu ʻo ngāue fakafaifekau.”
Karolina O., 16, Hao Pesoa, Brazil