Pōpoaki ʻa e Kau Palesitenisī ʻUluakí
Ngaahi Fāmilí mo e Lotú
Fai ʻe Palesiteni Henry B. Eyring
Tokoni ʻUluaki ʻi he Kau Palesitenisī ʻUluakí
ʻI heʻeku tangutu he veʻe mohenga ʻo ʻeku tamaí ʻi he poó kakato, naʻá ne talanoa fekauʻaki mo ʻene kei siʻí. Naʻá ne lea ʻo kau ki he ʻofa ʻa ʻene ongo mātuʻá ʻi he taimi ʻo e faingataʻá pea mo hono ʻofeina ia ʻe he Tamai Hēvaní mo e Fakamoʻuí. Ne u ʻilo ʻokú ne mei mate ʻi he kanisaá, ko ia naʻe ʻikai fakaʻohovale kiate au ʻa e ongo naʻá ne maʻu ki heʻene Tamai Hēvaní mo e ʻofa mo e angalelei ʻa ʻene tamai fakamāmaní. Ne faʻa talamai ʻe heʻeku tamaí ʻi he taimi naʻá ne lotu aí, naʻá ne fakakaukau te ne lava ʻo mātā loto pē ha fofonga malimali ʻa e Tamai Hēvaní.
Naʻe akoʻi ia ʻe heʻene ongomātuʻá ʻaki ha sīpinga ke ne lotu ʻo hangē haʻane talanoa pē mo e ʻOtuá pea ʻe tali mai ʻe he ʻOtuá kiate ia ʻi he ʻofa. Naʻá ne fie maʻu ʻa e sīpinga ko iá ʻi he ikuʻangá. ʻI he taimi ne lolo mai ai e faingataʻá, ne mau ʻilo atu ia ʻi he pongipongí ʻokú ne tūʻulutui ʻi hono veʻe mohengá. Naʻá ne fuʻu vaivai ke toe tuʻu hake ki hono mohengá. Naʻá ne talamai naʻá ne lotu ʻo fehuʻi ki heʻene Tamai Hēvaní pe ko e hā hono ʻuhinga ʻokú ne tuku ai ke ne fuʻu faingatāʻiá lolotonga ia ʻokú ne fāifeinga maʻu pē ke fai lelei. Naʻá ne pehē ne hoko mai ha tali angaʻofa: “ʻOku fie maʻu ʻe he ʻOtuá ha ngaahi foha loto toʻa.”
Ko ia naʻá ne kītaki ai ki he ngataʻangá, mo falala ʻoku ʻofeina ia ʻe he Tamai Hēvaní, fanongo kiate ia, mo hiki hake ia. Naʻe faitāpuekina ia ke ne ʻiloʻi kei siʻi pea ke ʻoua naʻa ngalo ʻoku ofi mai ha ʻOtua ʻofa, ʻo tatau pē mo e lotú.
Ko hono ʻuhinga ia ʻoku akoʻi ai ʻe he ʻEikí ʻa e ngaahi mātuʻá, “Pea ke nau akoʻi foki ʻenau fānaú ke lotu, pea ke ʻaʻeva ʻi he angatonu ʻi he ʻao ʻo e ʻEikí” (T&F 68:28).
Kuo toe fakafoki mai ʻa e ongoongolelei ʻo Sīsū Kalaisí—fakataha mo e Tohi ʻa Molomoná mo e kotoa ʻo e ngaahi kī ʻo e lakanga fakataulaʻeikí ke lava ke fakatahaʻi ʻaki e ngaahi fāmilí—koeʻuhí ko e lotu ʻa ha kiʻi tamasiʻi ko Siosefa Sāmita ʻi he tuí. Naʻá ne maʻu ʻa e tui ko iá ʻi ha fāmili ʻofa mo angatonu.
ʻI he taʻu ʻe uofulu kuohilí, ne ʻomai ai ʻe he ʻEikí ki he ngaahi fāmilí ʻa e akonaki ko ʻení ʻi he “Ko e Fāmilí: Ko ha Fanongonongo ki Māmani” mei he Kau Palesitenisī ʻUluakí mo e Kōlomu ʻo e Kau ʻAposetoló: “ʻOku faʻu mo pukepuke ʻa e nofo-malí mo e ngaahi fāmili ʻoku fiefiá ʻi he ngaahi tefitoʻi moʻoni ʻo e tuí, lotú, fakatomalá, faʻa fakamolemolé, fakaʻapaʻapá, ʻofá, manavaʻofá, ngāué, pea mo e ngaahi ʻekitivitī ʻoku fakatupulakí.”1
ʻOku hulu fau hotau moʻua ʻo e houngaʻiá ke totongi ki he fāmili ʻo e Palōfita ko Siosefa Sāmitá ʻi he anga hono ohi hake iá. Naʻe ʻikai ngata pē ʻi he hoko hono fāmilí ko e sīpinga ʻo e tuí mo e lotú ka ko e fakatomalá foki, faʻa fakamolemolé, fakaʻapaʻapá, ʻofá, manavaʻofá, ngāué, pea mo e ngaahi ʻekitivitī ʻoku fakatupulakí.
Mahalo ʻe ui koe ʻe he ngaahi toʻu tangata ʻoku muiaki maí ko e monūʻia koeʻuhí ko e sīpinga ʻo e lotú ʻi ho fāmilí. Mahalo pē ʻe ʻikai ke ke ohi hake ha tamaioʻeiki maʻongoʻonga ʻa e ʻOtuá, ka te ke lava ʻi hoʻo lotú ʻo tokoni ki he ʻEiki ko Sīsū Kalaisí ʻi hoʻo sīpinga angatonú, ke ohi hake ai ha kau ākonga lelei mo ʻofeina.
ʻI he kotoa e ngaahi meʻa ke ke fili ke ke fai ke tokoni ki he ʻEikí, ʻoku ʻi hono ʻelitó ʻa e lotú. ʻOku ʻi ai ha kakai angamaheni pē, ko e taimi ʻoku nau lotu aí, ʻoku nau ueʻi e niʻihi kehé ke fakaava honau matá ke nau ʻiloʻi pe ko hai ʻoku ʻi aí. Te ke lava ʻo hoko ko ha tokotaha pehē.
Fakakaukau ki hono mahuʻinga kiate kinautolu ʻoku mou tūʻulutui fakataha he lotu fakafāmilí. ʻI he taimi ʻoku nau ongoʻi ai ʻokú ke fefolofolai mo e ʻOtuá ʻi he tuí, ʻoku tupulaki ʻa ʻenau tuí ke nau fefolofolai foki mo kinautolu mo e ʻOtuá. ʻI he taimi ʻokú ke lotu ai ʻo fakamālō ki he ʻOtuá koeʻuhí ko e ngaahi tāpuaki kuó ne ʻomí, ʻoku tupulaki ʻenau tui ʻoku ʻofeina kinautolu ʻe he ʻOtuá he ʻokú Ne tali hoʻo ngaahi lotú pea te Ne tali mo ʻenau ngaahi lotú. ʻE toki lava pe ke hoko ia ʻi he lotu fakafāmilí ʻi he taimi kuó ke toutou aʻusia ai ia ʻi hoʻo lotu fakatāutahá.
ʻOku monūʻia ke maʻu ha tamai mo ha faʻē naʻe fefolofolai mo e ʻOtuá. ʻOku kei hanga ʻe heʻena sīpinga ʻo e mālohi ʻo e lotu fakafāmilí, ʻo faitāpuekina e ngaahi toʻu tangata ʻi hona tuʻá.
ʻOku faitāpuekina ʻeku fānaú mo hoku ngaahi makapuná ʻi he ʻaho kotoa ʻe he sīpinga ʻo ʻeku ongo mātuʻá. Kuo tukuʻau mai kiate kinautolu e tui ko ia ʻoku fanongo mo tali mai ʻe he ʻOtua ʻofá ʻa e ngaahi lotú. Te ke lava ʻo fatu ha tukufakaholo pehē ʻi ho fāmilí. ʻOku ou lotua te mou fai ia.