ʻIkai ʻo e Māmaní
ʻOku mohu ʻahiʻahi ke te tuʻumaʻu ko ha mēmipa ʻo e Siasi ʻo Kalaisí ʻi he māmani ʻo e ʻahó ní, ka te tau lava pē ke ʻi he māmaní kae ʻikai ke ne tākiekina kitautolu.
Kuó ke fifili nai pe naʻe maʻu mei fē ʻa e fakalea “ʻi he māmaní kae ʻikai ʻo e māmaní”? ʻOku mahulu hake ia ʻi ha moto pē pe ko hano fakapotoʻi ʻo ha lea mālie—naʻe maʻu ia meia Sīsū Kalaisi.
Fakakaukau loto ki he pō kimuʻa Hono Tutukí. Naʻá ne fakataha mo ʻEne Kau ʻAposetoló, fufulu honau vaʻé, akoʻi kinautolu mo fakahoko ʻa e sākalamēnití. ʻI ha taimi ʻe taha ʻi he pō ko iá, naʻá Ne lotu leʻo lahi ki Heʻene Tamaí koeʻuhí ko e Kau ʻAposetoló:
“ʻOku ʻikai te u lotú ke ke ʻave ʻa kinautolu mei he māmaní, ka koeʻuhí ke ke fakahaofi ʻa kinautolu mei he koví.
“ʻOku ʻikai ʻo māmani ʻa kinautolu, ʻo hangē ʻoku ʻikai ʻo māmani aú. …
“Hangē ko hoʻo fekau au ki māmaní, ʻoku pehē ʻeku fekau ʻa kinautolu ki māmaní.” (Sione 17:15–16, 18).
Naʻe nofo ʻa e Fakamoʻuí ʻi he māmaní he kotoa ʻo ʻEne moʻuí kae ʻikai ʻo e māmaní. Naʻe ʻahiʻahiʻi Ia, ka naʻe ʻikai te Ne hinga ki he ʻahiʻahí. Naʻá ne fakaʻehiʻehi mei he koví. Naʻá ne feohi mo e kau ākongá mo e kakai tuí kae pehē foki ki he kau angahalá mo e kau mālualoí. Naʻá Ne hoko ko ha sīpinga ki he taha kotoa.
Naʻe ʻikai ke ne pehē pē ki Heʻene kau ākongá, “Kapau ne u fai ia, te mou lava foki ʻo fai ia.” Ka naʻá ne manavaʻofa. Naʻá Ne lotu ki he Tamaí ke tokoniʻi kinautolu. Ka naʻe ʻikai te ne lotu ke toʻo ʻa e ngaahi ʻahiʻahí meiate kinautolu. Lolotonga ʻEne moʻui ʻi he māmaní mo fakafou ʻi Heʻene kau palōfita mo e kau ʻaposetolo ʻi onopooní, naʻe akoʻi mai ʻe he Fakamoʻuí ʻa hono mahuʻinga kiate kitautolu ke tau hoko ko ha faʻifaʻitakiʻanga lelei ʻi he māmaní.
ʻOku fehangahangai maʻu pē ʻa e toʻu tupu kotoa ʻi he funga ʻo e māmaní mo e ʻahiʻahí ʻi heʻenau takatakai holo he ʻū holo ʻo e ʻapiakó, feohi mo e ngaahi kaungāmeʻá, mo kau ʻi he ngaahi ʻekitivitī ki tuʻá. Ka ʻi heʻenau tākaua mo e Fakamoʻuí mo ʻai ʻa e ongoongoleleí ki honau lotó, ʻoku nau maʻu ai ha ngaahi founga ke lehilehiʻi ai kinautolu mei hano maʻu kinautolu ʻe he māmaní. Lau fekauʻaki mo e anga e fili hanau niʻihi ke muimui ki he sīpinga ʻa e Fakamoʻuí.
Ke Mou Femouʻekina He Ngāue Leleí
ʻI he taimi pē ʻoku ou fehangahangai ai mo e ʻahiʻahí, ʻoku ou fehuʻi hifo kiate au, “Ko e hā nai naʻe mei fai ʻe Sīsuú?” pe “Te u toe ofi ange nai heni ki he puleʻanga fakasilesitialé?” ʻOku ou ʻalu he pongipongi kotoa pē ki he seminelí neongo kapau ʻoku ou fuʻu helaʻia, koeʻuhí ʻoku tokoni ia kiate au ke u tupulaki fakalaumālie ai. ʻOku hoko ʻeku lau folofolá mo e taumuʻa ke u ako ha meʻa foʻou pe ha meʻa te ne lava ʻo tokoniʻi au ke u hoko ko ha tokotaha lelei angé, ko ha maʻuʻanga tākiekina ke ne tokoniʻi au. ʻI heʻetau tauhi ʻa e ʻaho Sāpaté ke māʻoniʻoní mo ʻalu ki heʻetau ngaahi ʻekitivitií, ʻe toe lelei ange ai ʻetau ikunaʻi ʻa Sētané. ʻI heʻetau femoʻuekina ʻi he ngāue lelei mo e ʻEikí, te Ne tokoniʻi kitautolu ʻi he ngaahi tūkunga fihituʻu kotoa pē ʻoku tau fou aí.
Brenda H., 17, Minesota, USA
Maʻu ha MĀLOHI mei he Niʻihi Kehé
ʻOku ou tauhi ʻeku ngaahi tuʻunga moʻuí ʻaki ʻeku kau ʻi he ngaahi ʻekitivitií mo hoku ngaahi kaungāmeʻa mei he lotú. ʻOku ou fakaafeʻi foki hoku ngaahi kaungāmeʻa taʻesiasí ki he ngaahi ʻekitivitií ke nau lava ʻo sio mo mahino ai kiate kinautolu ʻa e ʻuhinga ʻoku tau tauhi ai ʻa e ngaahi tuʻunga moʻui ko ʻení. ʻOku hoko ʻeku ongo mātuʻá mo hoku tuongaʻane lahí ko ha faʻifaʻitakiʻanga lelei kiate au. ʻOku tokolahi hoku ngaahi kaungāmeʻa lelei ʻoku teʻeki ke nau kau ki he Siasí ka ʻoku nau hoko ko ha faʻifaʻitakiʻanga maʻongoʻonga kiate au. ʻOku lahi e ngaahi ʻulungaanga maʻongoʻonga ʻoku ou fie ako meiate kinautolu.
Celina W., 15, Siamane
Fakaava ho Ngutú
ʻOku kehe ʻa Tenimaʻake ia kapau te ke ʻalu ki he lotú, ʻikai ke ke inu, pea māʻolunga hoʻo tuʻunga moʻuí. Ka ne u aʻusia ai kapau ʻoku ʻikai ke ke mā ke talanoa ki he ngaahi tuʻunga moʻui mahuʻinga ʻokú ke tuʻu aí, ʻoku vave ʻaupito hoʻo maʻu ʻa e fakaʻapaʻapa mei ho ngaahi mahení. ʻOku ou sio ʻoku fakakaukau e kakaí ko ha meʻa lelei ia hono tokangaʻi lelei pehē ʻe he niʻihi kehé kinautolú.
Emma K., 18, Tenimaʻake
Fakaulo Hoʻo Māmá
ʻI he ngaahi taʻu siʻi kuohilí ne kau atu ʻemau timi ʻakapulú ki ha feʻauhi (tournament) uike kakato. ʻOku ʻuhinga ʻeni ko e mavahe mei ʻapi mo e kau taki ʻo e Siasí ʻi ha ʻaho ʻe fitu. Koeʻuhí ne mau ako ʻi ha ʻapiako Siasi, ne kau kotoa ʻemau timí ki he Siasí. ʻI he meimei efiafi kotoa he uike ko iá, ne paati e ngaahi timi kehé ʻi honau lokí ʻi he hōtele ne mau ʻi aí mo e hiva longoaʻá, tauʻolunga, inu, ifi, mo tauʻaki kaikaila ʻi ha ngaahi lea taʻefeʻunga. Ne fakatahataha atu ʻemau timí ki ha loki ke fakahoko ʻemau ako folofola anga mahení mo e fakataha lotu ʻi he efiafí. Ne u ongoʻi fiefia ʻi hono fai ʻo e meʻa ʻoku totonú ʻo ʻikai tali ke fakahinohinoʻi ʻe heʻemau mātuʻá. ʻI hono siofi kimautolu ʻe he ngaahi timi kehé mo ʻenau ʻohovalé, ne mau maʻu ʻenau fakaʻapaʻapá. Ne nau fakalongolongo ʻi heʻenau ʻilo ʻoku mau lolotonga fakahoko ʻemau fakataha lotu ʻi he efiafí. Naʻe hangē ne nau saiʻia ʻi he meʻa ne mau faí, pea ne iku kau mai ai ha niʻihi ia ʻo mau lau folofola mo lotu fakataha.
Naʻe ʻikai te mau ikuna e feʻauhí ʻi he uike ko iá, ka ne mau ikuna ʻi ha tafaʻaki ʻe taha. Ne lava ke mau fakaulo atu ʻemau māmá, fakafou ʻi heʻemau ngaahi sīpingá, ke liliu ai ha ngaahi loto mo ha ngaahi fakakaukau.
Elisara E., 20, Haʻamoa