Fānau ʻoku Nau Tuʻu ʻAliʻaliaki
Tuʻu ʻAliʻaliaki ʻi ʻItiopeá
ʻOku nofo ʻa e tokotaha naʻá ne faʻú ʻi ʻIutā, USA.
Ko hoku hingoá ko Taione!
ʻOku ou nofo ʻi ʻItiopea, ʻa ia ko ha fonua ʻi he fakahahake ʻo ʻAfiliká. ʻOku ou saiʻia he vaʻinga soká mo e laukongá. Pea ʻoku ou fie hoko ko ha toketā ʻi he kahaʻú. ʻOku ou feinga ke u tuʻu ʻaliʻaliaki ʻi hono moʻui ʻaki e ongoongoleleí ʻi he ʻaho kotoa pē pea vahevahe ia mo hoku ngaahi kaungāmeʻá!
Founga ʻEku Maʻu ha Fakamoʻoní
Naʻá ku fuofua haʻu ki he lotú ʻi hoku taʻu valú. Naʻá ku lau e Tohi ʻa Molomoná, naʻá ku fanongo ki he kau faifekaú, pea naʻá ku lotu. Naʻe talamai ʻe he Laumālié ʻoku moʻoni ʻa e Siasí, pea naʻá ku fie maʻu ke u papitaiso. ʻOku ngaohi au ʻe he ongoongoleleí ke u fiefia.
Ko hono Tokoniʻi Hoku Fāmilí
ʻOku faʻa luelue pē hoku fāmilí ki he lotú, pea ʻoku faʻa houa ʻe taha. ʻI he taimi ʻoku helaʻia ai hoku kiʻi tehiná, te u fua ia pe ko hoku taʻoketé. ʻOku ou tokoni ʻi ʻapi ʻi hono fufulu e ʻū peletí mo hono fakamaʻa e falé.
Ko Hoku Fatongia ʻi he Siasí
Ko e konga ʻoku ou manako taha ai ʻi he lotú ko e houalotu sākalamēnití. ʻOku ou tataki ʻa e hivá.
ʻOku ou fiefia he ako ki he ongoongoleleí. Ko e talanoa ʻi he folofolá ʻoku ou manako taha aí ko e talanoa ʻo Tēvita mo Kolaiaté. Ko e hiva ʻoku ou saiʻia taha aí ko e “Ngaahi Talanoa ʻo e Tohi ʻa Molomoná.”
Ko hono Vahevahe e Meʻa ʻOku Ou ʻIló
ʻOku ou talanoa ki hoku ngaahi kaungāmeʻa ʻi he akó fekauʻaki mo e ongoongolelei kuo toe fakafoki maí. Naʻe faʻa fehuʻi mai ʻe hoku kaungāmeʻa ʻe taha fekauʻaki mo e Siasí—pea fakafokifā pē kuo ʻikai ke ne toe ʻeke mai. Naʻá ku ʻeke ange kiate ia pe ko e hā hono ʻuhingá. Naʻá ne talamai naʻe loto mamahi ʻene ongomātuʻá. ʻOku ou fakaʻamu pē ʻe ʻi ai ha ʻaho ʻe liliu ai e fakakaukau ʻene ongomātuʻá.
Ko e hā ʻene ʻUhinga kiate Au ʻa e Tuʻu ʻAliʻaliaki
ʻOku ʻuhinga ʻa e “Tuʻu ʻaliʻaliakí” ko hono moʻui ʻaki e ongoongoleleí ʻi he ʻaho kotoa pē. ʻOku fie maʻu ʻe he Tamai Hēvaní mo Sīsū Kalaisi ke u fakamoʻoni kiate Kinaua! ʻOku ou fie maʻu hoku kaungāmeʻa kotoa pē ʻi he funga ʻo e māmaní ke nau vahevahe ʻa e ongoongolelei kuo fakafoki maí mo honau kaungāmeʻá.