Ngaahi Ngāue ʻOku Tākiekina ki he Fiefiá

Naʻe akoʻi ʻe Palesiteni ʻAealingi “ʻoku fakafalala ʻa e fiefia ʻoku tau fie maʻu ki hotau ngaahi ʻofaʻangá ʻi heʻenau ngaahi filí.”

ʻE lava ke ke lau fekauʻaki mo e ola ʻo e ngaahi filí mei he ngaahi sīpinga ʻa Nīfai, Leimana mo Lēmiuelá. Naʻe lāunga ʻa Leimana mo Lēmiuela pea ʻikai ke na fie tauhi ʻa e ngaahi fekaú (vakai ki he 1 Nīfai 2:12). Ko hono olá, naʻe fakamalaʻiaʻi pea motuhi atu kinaua mo hona hakó mei he ʻao ʻo e ʻEikí (vakai ki he 2 Nīfai 5:20–24). Naʻe fili ʻa Nīfai ke talangofua ki he ngaahi fekaú (vakai ki he 1 Nīfai 3:7), pea koeʻuhí ko ia, naʻá ne “nofo [mo hono kakaí] ʻi he fiefia” (2 Nīfai 5:27).

Te ke lava ʻo fili ke ke māʻoniʻoni mo fiefia. Kae mahalo ʻe kei fili pē e kakai ʻoku mou feohí ki ha ngaahi fili kovi ʻo nau iku ai ki he mamahí pe taʻefiemālié. Neongo ʻoku ʻanautolu ke fai ʻa e ngaahi fili ko iá, ʻe lava ke tākiekina ʻe hoʻo tā sīpingá ʻenau ngaahi filí ki he leleí. ʻE lava fēfē ke ʻomi ʻe hoʻo ngaahi filí ʻa e fiefiá ki he niʻihi kehé? Aleaʻi mo ho fāmilí ha ngaahi founga kehekehe ʻe lava ke mou takiekina lelei ai ʻa kinautolu ʻoku mou feohí mo tokoniʻi ke nau ongoʻi fiefia.