ʻOku ou ʻIloʻi ʻa e Folofola ʻa e ʻOtuá
Hōsea ʻEvanilato Mataiasi Fenanitesi, Sā Paulo, Palāsila
Tā fakatātā ʻa Allen Garns
ʻI heʻeku ʻi ha malaʻevakapuna ʻi Sā Paulo, ʻi Palāsila ʻi he ngaahi taʻu kuo hilí, naʻá ku mamata ai ʻi ha faletohi ki ha tohi naʻe ui ko e “Tohi ʻa Molomoná: Ko ha Fakamoʻoni ʻe Taha ʻo Sīsū Kalaisi.” Naʻá ku veiveiua ʻe tali ʻe hotau māmani fakalilifu mo heé ha toe fakamoʻoni ʻe taha ʻo Sīsū Kalaisi, pea nofo ʻeku fakakaukaú ʻi he tohí he fakaʻosinga ʻo e uiké.
Ne iku pē, ʻo ʻikai ke u toe lava ʻo mapukepuke ʻeku fie ʻiló, pea naʻá ku foki ai ki he faletohí ke fakatau ia. Ka neongo iá, ʻi heʻeku aʻu atú, naʻe ʻikai lava ke u maʻu ia. Naʻá ku fakamatalaʻi ʻa e tohí ki he tokotaha ngāue he falekoloá, ka naʻá ne pehē naʻe teʻeki ke ne mamata ki ai. Pe te ne maʻu pē ā ha lekooti ki ai, neongo naʻe ʻosi lēkooti kotoa ʻa e ngaahi tohi ne fakaʻaliʻali ʻi aí.
Hili ha taimi mei ai lolotonga ʻeku ʻi he fale talavaí, naʻá ku fakatokangaʻi ha tohi ʻoku fakaava ʻi ha funga kānita. ʻI heʻeku kamata lau iá, naʻá ku ʻilo ai ha tangata ko hono hingoá ko Kolihola ʻa ia naʻá ne fehuʻia e mālohi ʻo e ʻOtuá pea iku pē ʻo ne noa. ʻI he taimi naʻá ku fakakaukau ai ki he ngaahi lea naʻá ku laú, naʻá ku ʻiloʻi naʻe mei he ʻOtuá ia.
Lolotonga ʻa e taimi ko ʻení naʻá ku fekumi ai ki ha fakahinohino fakalangi. ʻI he ʻaho ʻe taha naʻá ku tūʻulutui hifo ai ʻo lotu fakamātoato ʻo kole ki he ʻOtuá ke fakahā mai kiate au ʻa e hala totonu te ne ʻomi au kiate Iá. Hili ha ngaahi ʻaho siʻi mei ai ne puke homa fohá, pea ne u foki atu ki he fale talavaí. ʻI he ʻamanaki ke u mavahé, naʻe hū mai ha kau talavou ʻAmelika ne nau tui ha ngaahi pine hingoa. Naʻá ku ongoʻi leva ha māfana ʻi hoku fatafatá, ʻa ia naʻá ne ueʻi au ke u fakalea kiate kinautolu.
Naʻa nau talamai kiate au naʻa nau ʻi Palāsilá ke malanga ʻaki ʻa e ongoongolelei ʻo Sīsū Kalaisí. Naʻá ku kole ange pe te nau lava ʻo akoʻi au, pea naʻa mau fakataimi-tēpileʻi ha taimi.
ʻI heʻeku fanongo fekauʻaki mo e Palōfita ko Siosefa Sāmitá, ne u ʻilo kuo tali ʻeku lotú. Naʻe foaki mai leva ʻe he ongo faifekaú ha tohi kiate au. Naʻe fakaʻohovale kiate au, ko ha Tohi ʻa Molomona—ʻo hangē pē ko ia naʻá ku mamata ki ai ʻi he fakaʻaliʻalí. Naʻá ku toe maʻu ha ongoʻi loto māfana pea kamata ke u fiefia ʻo ʻikai ke u mei faʻa lea.
Naʻe fakamatalaʻi ʻe he kau faifekaú ʻa e tupuʻanga ʻo e tohí pea nau kole mai kiate au ke u lotu mo kole ki he ʻOtuá pe ʻoku moʻoni ia. Naʻá ku ʻosi maʻu ha ʻilo fakapapau ki hono fakalangi ʻo e tohí, he kuo fakahā mai ia ʻe he ʻEikí kiate au—tuʻo ua. Ka neongo iá, naʻá ku sivisiviʻi fakalelei ia. ʻI heʻeku lau ʻa e vahe 17 ʻi he 3 Nīfaí, naʻá ku ʻilo ʻoku ʻi ai ha talanoa fakalangi ai koeʻuhí ʻoku ʻi ai e ngaahi lea ʻa Sīsū Kalaisí.
Ko e fakavaʻe ʻo ʻeku fakamoʻoní ko ʻeku ʻiloʻi ʻoku ʻi he Tohi ʻa Molomoná ʻa e folofola ʻa e ʻOtuá. Naʻá ne liliu au pea kei hokohoko atu ʻene liliu aú.