Naʻe Feʻunga nai ʻEku Akó?

ʻEnisī Nikolasi, Tekisisi, USA

Naʻá ku faivelenga ʻi hono lau fakaʻaho ʻo e Tohi ʻa Molomoná talu mei heʻeku kei taʻu hongofulu tupú. Naʻe aʻu ki he poʻulí ʻi heʻeku kamata tō hifo ki hoku mohengá heʻeku ongosiá peá u fakatokangaʻi kuo teʻeki ke fai ʻeku laukongá he ʻaho ko iá, te u toʻo hake leva koloa pē ke u lau ha ngaahi veesi.

ʻI he taʻu ʻe ua kuo hilí, naʻe kole mai ai ke u akoʻi ʻa e Fuakava Motuʻá ʻi he semineli he pongipongí. Naʻe lahi ange ʻeku taʻefeangai mo e Fuakava Motuʻá ʻi ha toe tohi folofola kehe, ko ia ne u fakamoleki ai ha houa ʻe tolu ki he fā ʻi ha ngaahi ʻaho ʻi hono ako mo teuteuʻi ʻeku ngaahi lēsoní. Koeʻuhí naʻá ku fakamoleki ha taimi lahi ki hono ako ʻo e Tohi Tapú mo e ngaahi fakahā kimuí ní, naʻe tuʻu ʻeku lau fakaʻaho ʻa e Tohi ʻa Molomoná. Naʻa mau lau fakafāmili ia ʻi he poʻulí, pea ne u faʻa fakaʻaongaʻi ia ke fakafekauʻaki e folofolá, ko ia ne u ongoʻi ai ʻoku ou maʻu feʻunga ʻa e ako folofolá.

ʻI he vaeuaʻanga ʻo e taʻu fakaakó ʻi Sānualí, naʻe fakatukupaaʻi homau siteikí kotoa ʻe heʻeku palesiteni fakasiteikí ke mau lau ha vahe ʻi he Tohi ʻa Molomoná ʻi he ʻaho kotoa pē. Neongo naʻá ku fifili pe ʻe anga fēfē haʻaku maʻu ha faingamālie lolotonga ʻeku femoʻuekina ʻi heʻeku ako ki he seminelí, ka naʻá ku fakakaukau ʻoku totonu ke u tali ʻa e tukupaá. Naʻá ku fie maʻu ke fai ia ʻo ʻikai ngata pē ʻi hono fakamālohia aú ka ke u hoko foki ko ha faʻifaʻitakiʻanga ki heʻeku fānaú mo e kau akó.

Mei he momeniti ko iá naʻá ku lau ha vahe mei he Tohi ʻa Molomoná ʻi he ʻaho kotoa pē ʻi heʻeku kamata teuteuʻi ʻeku lēsoni seminelí pe ko ʻeku teuteu ke mohé. Naʻe toe foki mai ki heʻeku moʻuí ha Laumālie mo ha mālohi naʻe ʻikai ke u ʻilo ne mole meiate au. Naʻe fakaʻau ke toe lelei ange ʻeku ngaahi lēsoni seminelí, ʻa ia naʻe lele leleí. Naʻe toe mahino ange ʻa e ngaahi konga ʻo e Fuakava Motuʻá naʻe faingataʻa ke mahinó. Naʻá ku fakatokangaʻi foki naʻe toe mahino ange kiate au ʻa e Tohi ʻa Molomoná tupu mei he lahi ange ʻa e ako ne u fakahoko fekauʻaki mo e kau palōfitá mo e fono ʻa Mōsesé.

ʻOku kau ʻi he talateu ki he Tohi ʻa Molomoná ʻa e kupuʻi lea ko ʻení mei he Palōfita ko Siosefa Sāmitá: “Naʻá ku fakahā ki he kau takí ko e Tohi ʻa Molomoná ko e tohi totonu taha ia ʻi he ngaahi tohi kotoa pē ʻi he māmaní, pea ko e maka-tuʻu-loto ia ʻo ʻetau tui fakalotú, pea ʻe ofi ange ha tangata ki he ʻOtuá ʻi haʻane tauhi ki hono ngaahi akonakí, ʻi ha toe tohi kehe.”

ʻOku pukepuke fakataha ʻe he Tohi ʻa Molomoná ʻa e ngaahi kongokonga ʻo e ongoongoleleí mo ha fakamoʻoni mālohi kia Sīsū Kalaisi mo e palani ʻo e fakamoʻuí. ʻOkú ne tokoni ke ʻuhingamālie ange ʻa e ngaahi meʻa kotoa ʻi heʻeku moʻuí. ʻOku ou houngaʻia ke maʻu ʻa e Tohi ʻa Molomoná ko ha konga ʻo ʻeku moʻui fakaʻahó.