Kuo hē hoku kaungāmeʻá mei he Siasí koeʻuhí ko hono manukia ʻe he niʻihi kehé. Ko e hā e meʻa ʻoku totonu ke u faí?

Ko e ngaahi meʻa lelei taha ke fai ʻi he tuʻunga ko iá ko e: (1) angaʻofa, ʻofa, mo hono tali ʻo ho kaungāmeʻá pea (2) ʻoua naʻá ke teitei tuka ʻi hoʻo fakamoʻoní.

Kapau te ke fai ʻa e ngaahi meʻá ni, ʻe lava pē ke ongoʻi ho kaungāmeʻá hoʻo ʻofá mo e mahinó peá ne fie takaofi ʻiate koe. ʻIkai ko ia pē, ka ʻe malava foki ke ne sio tā ko e koto palakū ʻa e ngaahi fakakoví mo e manukí pea ʻilonga ha taha ʻoku taau mo ʻene fakaʻapaʻapá mo e anga fakakaumeʻá he ʻikai te ne ʻohofi ha tui ʻa ha taha ʻi he founga ko iá.

ʻE lava ke hoko hoʻo tā sīpingá ko e taha ia ʻo e ngaahi meʻa lelei taha ʻe lava ke maʻu ʻe ho kaungāmeʻá. ʻAi ke ke hangē ko e kakai ko ia ʻi he misi ʻa Līhaí ne nau kai ʻi he fua ʻo e ʻakau ʻo e moʻuí pea manukia ʻe kinautolu ʻi he fuʻu fale lahi mo ʻataʻataá ka “naʻe ʻikai [te nau] tokanga kiate kinautolu” (1 Nīfai 8:33). Kapau ʻe vakai ho kaungāmeʻá ki hoʻo pukepuke hoʻo tuí mo matuʻuaki e manuki ʻa e niʻihi kehé ʻaki ʻa e ngeia, fakaʻapaʻapa, mo e poto he fakakata leleí, ʻe lava ke ne vakai, tā ʻoku malava pē ke ne fai e meʻa tatau. Kapau ʻoku kei ʻi ai ha tenga ʻo e fakamoʻoní ʻi hono lotó, mahalo ʻe kau hoʻo tā sīpingá mo e fakamoʻoni ʻokú ke maʻú ko e niʻihi ia ʻo e ngaahi meʻa te ne tokoniʻi ia ke ne ongoʻi ʻa e Laumālié mo manatuʻi ʻa e meʻa naʻá ne ʻilo kimuʻá.