Ko e Meʻa ʻOku Mau Tui Ki Aí
ʻOku Mau Tui ʻOku Totonu ke Fakatuʻamelie
ʻOku tau faʻa maʻu ha akonaki ʻi he folofolá ke tau “nēkeneka” mo “fiefia.” ʻOku talamai ʻe he ʻEikí ʻi he 2 Nīfai 2:25, “ʻOku ʻi ai ʻa e faʻahinga ʻo e tangatá koeʻuhi ke nau maʻu ʻa e fiefiá.” Ko e taumuʻa ʻo e moʻuí ni ke tataki kitautolu ki he fiefia ko ia ne talaʻofa ʻe he ʻEikí.
ʻOku ʻikai ʻuhinga ʻa e fiefiá ke taʻeʻilo pe taʻetokanga ki he ngaahi faingataʻa ʻo e moʻuí. Naʻe fakamatalaʻi ʻe ʻEletā Niila A. Mekisuele (1926–2004) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e loto-fiefiá ko “ha falala tō-mata-kakano ki he ngaahi taumuʻa teʻeki-tatala ko ia ʻa e ʻOtuá—ʻo ʻikai ngata pē ʻi he faʻahinga ʻo e tangatá, ka kiate kitautolu fakafoʻituitui.”1 ʻE hoko mai ʻa e ngaahi faingataʻá, he ko ha konga angamaheni ia ʻo e moʻui fakamatelié, ka ʻoku ʻikai totonu ke fusi hifo kitautolu ʻe he lotosiʻí mo e loto mamahí. ʻE lava ke ʻoatu ʻetau falalá ki he ʻEikí pea tau fai lelei.
Naʻe palōmesi mai ʻe Sīsū Kalaisi kiate kitautolu te tau aʻusia ʻa e mamahí, ka naʻá Ne toe naʻinaʻi mai foki, “Mou [fiefia]; kuó u ikuʻi ʻa māmani” (Sione 16:33). Naʻe akonaki ʻa Palesiteni ʻEselā Tafu Penisoni (1899–1994) koeʻuhí ko ʻetau maʻu ʻa e ongoongoleleí, “ʻoku totonu ke tau hoko ʻa kitautolu Kāingalotú ko e kakai fakatuʻamelie tahá mo e kakai fakatuʻatamaki siʻisiʻi tahá.”2
ʻOku tau ongoʻi kotoa pē ʻa e loto-mamahí mo e loto-foʻí ʻi he taimi kotoa pē, ka ʻe lava ke tau kei fiefia pē. Naʻe pehē ʻe ʻEletā Lisiate G. Sikoti (1928–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku ou fakamoʻoni ʻe ʻikai ngata ʻa e fiefiá ʻi he tui ki he Fakamoʻuí mo talangofua ki Heʻene ngaahi akonakí, ka ko e mamahí pē.”3 ʻE lava ke tau moʻui ʻi he fiefia ʻi heʻetau ʻilo “ʻe kiʻi fuofuoloa siʻi pē ʻa [hotau] faingataʻaʻiá” (T&F 121:7).
ʻI heʻetau falala ki he palani ʻa e ʻOtuá maʻatautolú mo fili ke moʻui ʻi ha tōʻonga fakakaukau ʻoku leleí, ʻe fakamālohia ʻetau malava ko ia ʻo fehangahangai mo e ngaahi pole ʻo e moʻuí. ʻE siʻisiʻi ange hono uesia kitautolu ʻe heʻetau hohaʻá mo e manavasiʻí, pea te tau aʻusia ʻa e nēkeneka ʻokú Ne finangalo ke tau maʻú.